វៀតណាម៖លោកង្វៀង ហ៊្វូចុងជាប់ឆ្នោតអាណត្តិទី៣ ជាអគ្គលេខាធិការគណបក្សកុម្មុយនិស្ត
នៅក្នុងប្រទេសវៀតណាម អគ្គលេខាធិការគណបក្សកុម្មុយនិស្តលោកង្វៀង ហ៊្វូចុងត្រូវបានសមាជបក្សលើកទី១៣ បោះឆ្នោតក្នុងថ្ងៃអាទិត្យ ទី៣១ មករាឲ្យបន្តកាន់តំណែងមួយនេះសម្រាប់អាណត្តិទី៣ រយៈពេល ៥ឆ្នាំ។ មានអាយុ ៧៦ឆ្នាំ និងជាអ្នកអភិរក្សនិយមគាំទ្រចិន លោកង្វៀង ហ៊្វូចុងជាអគ្គលេខាធិការបក្សកុម្មុយនិស្តទី១ ដែលទទួលបានតំណែងនេះចំនួន ៣អាណត្តិជាប់គ្នា គិតតាំងពីវៀតណាមបានចាប់ផ្តើមធ្វើកំណែទម្រង់សេដ្ឋកិច្ចក្នុងឆ្នាំ ១៩៨៦។ តែទន្ទឹមនឹងបន្តកាន់តំណែងអាណត្តិទី៣ ជាអគ្គលេខាធិការគណបក្សកុម្មុយនិស្ត លោកង្វៀង ហ៊្វូចុងត្រូវបោះបង់តំណែងប្រធានាធិបតីដែលលោកបានកាន់កាប់តាំងពីឆ្នាំ ២០១៨។ បើគ្មានអ្វីផ្លាស់ប្តូរទេ តំណែងប្រធានាធិបតីនឹងធ្លាក់ទៅលើនាយករដ្ឋមន្រ្តីបច្ចុប្បន្នលោកង្វៀង ស្វឹនហ៊្វុក។ មានអាយុ ៦៦ឆ្នាំ លោកង្វៀង ស្វឹនហ៊្វុកទទួលបានការកោតសរសើរពីការគ្រប់គ្រងជំងឺកូវីដ១៩ បានល្អ និងធ្វើឲ្យសេដ្ឋកិច្ចរីកចម្រើន។ តើលោកង្វៀង ហ៊្វូចុងមានប្រជាប្រិយភាពអ្វីខ្លះបានជាសមាជគណបក្សកុម្មយនិស្តបោះឆ្នោតឲ្យលោកកាន់តំណែងអគ្គលេខាធិការអាណត្តិទី៣?។
ចុះផ្សាយនៅថ្ងៃ៖
ស្តាប់ - ០១:៤៣
« ប្រជាប្រិយភាពទី១ របស់លោកង្វៀង ហ៊្វូចុង គឺមកពីគេចាត់ទុកគាត់ជាអ្នកតំណាងឲ្យមនោគមន៍វិជ្ជា និងទ្រឹស្តីម៉ាក ឡេលីននិយម ព្រោះនៅក្នុងសុន្ទរកថារបស់គាត់ លោកង្វៀង ហ៊្វូចុងតែងបានលើកឡើងច្រើនពីទ្រឹស្តីម៉ាក ឡេលីននិយម។ តាមពិតទៅ ប្រជាជនវៀតណាមបានចាត់ទុកលោកង្វៀង ហ៊្វូចុងដូចជាជីតាម្នាក់តំណាងឲ្យទ្រឹស្តីម៉ាក ឡេលីននិយម នោះបើទោះបីជាប្រជាជនបានសើចចំអកលើទ្រឹស្តីមួយនេះក៏ដោយ។
ប្រជាប្រិយភាពទី២ របស់លោកង្វៀង ហ៊្វូចុង គឺស្នាដៃរបស់គាត់នៅក្នុងយុទ្ធនាការប្រយុទ្ធប្រឆាំងនឹងអំពើពុករលួយដែលគាត់បានបោសសំអាតនៅក្នុងជួរបក្ស កងទ័ព និងប៉ូលិស។ យុទ្ធនាការមួយនេះរបស់លោកង្វៀង ហ៊្វូចុងទទួលបានការសរសើរខ្លាំងណាស់ ព្រោះថាក៏ដូចជានៅក្នុងប្រទេសចិនដែរ មានការរិះគន់ខ្លាំងណាស់លើអំពើពុករលួយរបស់មន្រ្តី និងសមាជិកក្នុងគណបក្ស។ ដូច្នេះ យុទ្ធនាការប្រឆាំងអំពើពុករលួយដោយផ្អែកលើទ្រឹស្តីម៉ាក់ ឡេលីននិយមទទួលបានការសាទរយ៉ាងខ្លាំងពីប្រជាជន។
ចំណែកប្រជាប្រិយភាពទី៣ ចុងក្រោយរបស់លោកង្វៀង ហ៊្វូចុង និយាយដោយឡែក និងរបស់គណបក្សកុម្មុយនិស្ត និយាយជារួម គឺដោយសារតែវៀតណាមគ្រប់គ្រងបានល្អលើវិបត្តិជំងឺកូវីដ១៩ ជាងប្រទេសមួយចំនួន។ តែការងារមួយនេះទទួលបានច្រើនពីការដឹកនាំរបស់នាយករដ្ឋមន្រ្តីលោកង្វៀង ស្វឹនហ៊្វុក ហើយបើតាមខ្ញុំដឹង នាយករដ្ឋមន្រ្តីបច្ចុប្បន្នរូបនេះនឹងក្លាយជាប្រធានាធិបតីនាពេលខាងមុខ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ