អ្នកជំនាញអន្តរជាតិ ចាប់ផ្តើមស៊ើបអង្កេតអំពីប្រភពកូវីដ១៩នៅវូហាន ខណៈអាមេរិកថាមិនទាន់ទុកចិត្ត
នៅថ្ងៃទី២៨មករានេះ ក្រុមអ្នកជំនាញនៃអង្គការសុខភាពពិភពលោក បានចាប់ផ្តើម ធ្វើការស៊ើបអង្កេត ស្តីពីប្រភពនៃមេរោគជំងឺកូវីដ១៩ នៅទីក្រុងវូហាន បន្ទាប់ពីបានធ្វើចត្តឡីស័ក រយៈពេល២សប្តាហ៍។ ជាប្រតិបត្តិការស៊ើបអង្កេត ដែលលក្ខណៈរសើបជាទីបំផុត សម្រាប់រដ្ឋាភិបាលចិន ដែលធ្លាប់ត្រូវបានគេចោទ ថាមិនមានភាពស្មោះត្រង់ ហើយបានប្រើឥទ្ធិពលលើអង្គការសុខភាពពិភពលោក។ យ៉ាងណាមិញ រដ្ឋាភិបាលលោកចូ បៃដិនបានលើកឡើងថា សហរដ្ឋអាេមរិក នឹងពិនិត្យមើលថាតើខ្លឹមសារនៃការស៊ើបអង្កេតនេះ វាភាពគួរឲ្យទុកចិត្តកម្រិតណា។
ចុះផ្សាយនៅថ្ងៃ៖
ស្តាប់ - ០២:២៤
អ្នកកាសែតបារាំង AFP ដែលត្រូវបានអាជ្ញាធរចិនទប់ មិនឲ្យចូលជិតក្រុមការងារពិសេសនេះ បានអះអាងថា គេបានត្រឹមតែឃើញក្រុមអ្នកជំនាញនេះពីចំងាយ មានគ្នា១០នាក់ ចេញពីសណ្ឋាគារឡើងរថយន្ត តែគេមិនដឹងថាធ្វើដំណើរទៅកន្លែងណាទេ។ ចំណែកកាលវិភាគលំអិត ស្តីពីសកម្មភាពការងារស្រាវជ្រាវនេះ ក៏គ្នាននរណាអាចដឹងបានដែរ។
សូមបញ្ជាក់ថា កូវីដ១៩ បានលេចរូបរាង្គឆ្លងរាលដាលដំបូងបំផុត នៅក្រុងវូហាន កាលពីចុងខែធ្នូ ឆ្នាំ២០១៩។ គិតត្រឹមពេលនេះ កូវីដ១៩បានផ្តាច់ជីវិតមនុស្សប្រមាណ២លាន១សែននាក់ នៅទូទាំងពិភពលោក ហើយបច្ចុប្បន្ន កំពុងបន្តយាយីសុខភាព និងសេដ្ឋកិច្ចប្រទេសជាច្រើន។ រដ្ឋាភិបាលចិន ត្រូវបានគេចោទ ថាបានលាក់បាំង រារាំង មិនចង់ឲ្យមានការអង្កេតស្រាវជ្រាវស្តីពីប្រភពនៃមេរោគនេះ។ ប្រភពនៃកូវីដ១៩ បានក្លាយជាចំណុចវិវាទប្រកែក ចោទគ្នាទៅវិញទៅមក រវាងអាមេរិក និងចិនផងដែរ ប្រមាណមួយឆ្នាំមកនេះ។
កាលពីដំបូងអាជ្ញាធរចិន អះអាងថា គេបានរកឃើញមេរោគនេះ នៅក្នុងទីតាំងផ្សារមួយកន្លែងក្នុងក្រុងវូហាន។ អ្នកជំនាញមួយចំនួនអះអាងថា កូវីដ១៩ ជាប្រភេទមេរោគកូរ៉ូណាវីរុស មានប្រភពចេញពីសត្វប្រចៀវ។ តែទន្ទឹមនឹងនេះ មានពាក្យចចាមអារ៉ាម ដែលគ្មានលក្ខណៈមិនប្រាកដប្រជាផ្សេងទៀត អះអាងថាមេរោគនេះ ធ្លាយចេញពីមន្ទីរពិសោធន៍មួយនៅវូហាន។ ក្រោយមកទៀត មានពាក្យចចាមអារ៉ាមនៅចិន ថាកូវីដ១៩ ឆ្លងចូលមកចិន តាមរយៈសាច់គោកកនាំចូលពីអាមេរិក។ អ្នកនាំពាក្យក្រសួងការបរទេសចិនម្នាក់ ធ្លាប់បានលើកឡើងដោយគ្មានភស្តុតាងថា គឺទាហានអាមេរិក ដែលមកចូលរួមកម្មវិធីប្រកួតកីឡាមួយនៅវូហាន កាលពីចុងឆ្នាំ២០១៩ ដែលបាននាំកូវីដ១៩មក។
យ៉ាងណាក៏ដោយ លោក Michael Ryan មន្ត្រីទទួលបន្ទុកកិច្ចការអាសន្ន នៃអង្គការសុខភាពពិភពលោក បានអះអាងកាលពីសប្តាហ៍មុនថា ក្រុមអ្នកជំនាញរបស់អង្គការលោក នឹងព្យាយាមស្រាវជ្រាវរកការពិត ថាកូវីដ១៩កើតនៅទីណា មិនថានៅចិន ឬនៅក្រៅចិនឡើយ។ លោកអះអាងថា គ្រប់សម្មត្តិកម្មទាំងអស់ នឹងត្រូវយកមកពិចារណា។
ដោយឡែកកាលពីថ្ងៃទី២៧មករា លោក ជែន សាគី អ្នកនាំពាក្យរដ្ឋាភិបាលអាមេរិក បានលើកឡើងថា អាមេរិកចង់បានការស៊ើបអង្កេតអន្តរជាតិមួយ ដែលស៊ីជំរៅ ច្បាស់លាស់បំផុត។ លោកបន្ថែមថា រដ្ឋាភិបាលលោកនឹងថ្លឹងថ្លែងពិនិត្យ ថារបាយការណ៍ស្រាវជ្រាវរបស់អង្គការសុខភាពពិភពលោក មានភាពប្រត្យក្ស អាចគួរឲ្យទុកចិត្តបានកំរិតណា។ សម្តីលើកឡើងខាងលើនេះ បានធ្វើឲ្យភាគីចិន ប្រតិកម្មភ្លាមផងដែរ ថាអាមេរិកកំពុងយកបញ្ហានេះ ទៅលាយឡំនឹងរឿងនយោបាយការបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ