កូវីដ១៩៖ ចិនជាមហាអំណាចសេដ្ឋកិច្ចតែមួយគត់ ដែលមានកំណើនសេដ្ឋកិច្ចវិជ្ជមានក្នុងឆ្នាំ២០២០
មេរោគជំងឺកូវីដ១៩ បានធ្វើឲ្យពិភពលោកទាំងមូល ឆ្លងកាត់វិបត្តិសេដ្ឋកិច្ចដ៏ធ្ងន់ធ្ងរបំផុត ពេញមួយមួយឆ្នាំ២០២០កន្លងទៅនេះ។ តែយ៉ាងណាក៏ដោយ មានប្រទេសមហាអំណាចសេដ្ឋកិច្ចមួយ ដែលមានកំណើនសេដ្ឋកិច្ចវិជ្ជមាន នៅក្នុងឆ្នាំ២០២០ នោះគឺប្រទេសចិន។ យោងតាមតួលេខរបស់ ការិយាល័យជាតិស្ថិតិរបស់ចិន ក្នុងឆ្នាំ២០២០ ចិនមានកំណើនសេដ្ឋកិច្ចចំនួន២.៣% ដែលជាកំណើនខ្ពស់ លើសពីការរំពឹងទុករបស់អ្នកជំនាញ។
ចុះផ្សាយនៅថ្ងៃ៖
ស្តាប់ - ០៣:០៨
មេរោគជំងឺកូវីដ១៩ បានផ្តើមផ្ទុះឆ្លងរាលដាល ចេញពីទីក្រុងវូហានប្រទេសចិន កាលពីដើមឆ្នាំ២០២០ ធ្វើឲ្យពិភពលោកទាំងមូល ត្រូវពើបប្រទះនឹងវិបត្តិសេដ្ឋកិច្ច ដ៏ធ្ងន់ធ្ងរបំផុត។ ក៏ប៉ុន្តែ ក្នុងចំណោមប្រទេសមហាអំណាចសេដ្ឋកិច្ចទាំងអស់ គឺមានតែចិនមួយគត់ ដែលបានសម្រេចបាននូវកំណើនសេដ្ឋកិច្ចវិជ្ជមាន ក្នុងឆ្នាំ២០២០ ខណៈដែលប្រទេសផ្សេងៗទៀត បានព្យាករណ៍នូវការធ្លាក់ចុះដល់អវិជ្ជមាន នៃសេដ្ឋកិច្ចរបស់គេ។ ដំណឹងនេះ បានធ្វើឲ្យមានការច្រណែនមិនតិចទេ ពីសំណាក់ ប្រទេសមហាអំណាចសេដ្ឋកិច្ចផ្សេងៗទៀត។
យោងតាមតួលេខផ្លូវការ ផ្សាយដោយការិយាល័យជាតិស្ថិតិចិន នៅត្រីមាសទី៤ ចុងឆ្នាំ២០២០ ចំណូលដុលក្នុងស្រុករបស់ចិនបានកើនឡើងខ្ពស់ ចំនួនដល់ទៅ៦.៥% ពោលគឺជាកម្រិតដែលធ្លាប់មាន កាលពីមិនទាន់មានកូវីដ១៩។ គិតជាមធ្យមក្នុងឆ្នាំ២០២០ កំណើនសេដ្ឋកិច្ចចិន គឺមានចំនួន២.៣%។
គួររំលឹកថា នៅត្រីមាសទី១ដើមឆ្នាំ២០២០ នៅពេលដែលកូវីដ១៩ បានចាប់ផ្តើមឆ្លងរាលដាលដំបូង សេដ្ឋកិច្ចចិនបានធ្លាក់ស្រុតចុះខ្លាំង ចំនួនប្រមាណ ៦.៨% ដោយសារតែវិធានការបិទខ្ទប់ទាំងឡាយ។ តែគឺវិធានការបិទខ្ទប់ដ៏តឹងតែងបំផុត ដើម្បីប្រយុទ្ធប្រឆាំងនឹងការឆ្លងរាលដាលកូវីដ១៩នេះហើយ ដែលធ្វើឲ្យចិន អាចឆាប់ងើបផុតពីវិបត្តិបានលឿនជាងគេ។
សកម្មភាពសេដ្ឋកិច្ចចិន បានចាប់ផ្តើមងើបឡើងវិញ នៅរវាងចុងត្រីមាសទី៣។ នៅត្រីមាសទី៤ ផលិតកម្មឧស្សាហកម្មចិន បានកើនឡើងវិញ ដល់ទៅ៧.៣%។ តម្រូវការនៃផលិតផលមួយចំនួន ដូចជាផលិតផលអេឡិចត្រូនិក បច្ចេកវិទ្យាទំនើប មានកុំព្យូទ័រជាដើម បានកើនឡើងខ្លាំងនៅទូទាំងពិភពលោក ដោយសារតែវិធានការធ្វើការពីផ្ទះ។ ក្រៅពីនេះ វិស័យផលិតកម្មឧស្សាហកម្មចិន បានទាញផលអំពីការកើនឡើង នូវតម្រូវការទំនិញ ដូចជាសម្ភារៈពេទ្យ សម្ភារៈអនាម័យ ម៉ាស សន្លឹកប្លាស្ទិក និងសម្ភារៈបន្ទាប់បន្សំឯទៀត។
យ៉ាងណាក៏ដោយ បើទោះបីជាចិនមានកំណើនសេដ្ឋកិច្ចវិជ្ជមាន ក្នុងឆ្នាំ២០២០ តែអត្រាកំណើននេះ គឺមានទាបណាស់ បើប្រៀបធៀបទៅឆ្នាំ២០១៩ ដែលមានប្រមាណ ៦.១%។ ពោលគឺ២.៣% គឺជាអត្រាកំណើតទាបបំផុត របស់ចិន បើគិតរាប់ពីទសវត្សឆ្នាំ១៩៧០មក។ តម្រូវការប្រើប្រាស់ក្នុងស្រុក របស់ចិនវិញ គឺស្ថិតនៅកម្រិតទាបនៅឡើយ ជាពិសេសក្នុងវិស័យសេវាកម្ម។
អត្រាអ្នកអត់ការងារធ្វើវិញ មានចំនួន ៥.២% នៅចុងខែធ្នូឆ្នាំ២០២០ ដោយតួលេខនេះ អាជ្ញាធរចិនគិតតែនៅក្នុងចំណោមប្រជាជន ដែលរស់នៅក្នុងទីក្រុងធំៗតែប៉ុណ្ណោះ។ មានន័យថា វាអាចមាន ពលករកម្មករចិន ចំណាកស្រុកមកពីខេត្តផ្សេងរាប់លាននាក់ទៀត ដែលគ្មានការងារធ្វើ។ លោក Ning Jizhe មន្ត្រីទទួលបន្ទុកម្នាក់ នៃការិយាល័យជាតិស្ថិតិចិន បានទទួលស្គាល់ថា សេដ្ឋកិច្ចចិន កំពុងឆ្លងកាត់ដំណាក់កាលគ្រោះថ្នាក់ និងមានឧបសគ្គជាច្រើន ទាំងក្នុងស្រុក ទាំងក្រៅស្រុក ដោយសារតែវិបត្តិសេដ្ឋកិច្ចសកល បង្កឡើយដោយកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ