អាមេរិកនិងសម្ព័ន្ធមិត្តលោកខាងលិចបារម្ភចំពោះការចាប់ខ្លួនសកម្មជនប្រជាធិបតេយ្យហុងកុង
សហរដ្ឋអាមេរិក អង់គ្លេស អូស្ត្រាលី និងកាដាណា បានចេញសេចក្តីថ្លែងការណ៍រួមមួយកាលពីថ្ងៃសៅរ៍ ៩ មករាម្សិលមិញ ដោយសម្តែងពីក្តីព្រួយបារម្ភយ៉ាងខ្លាំងអំពីការចាប់ខ្លួនសកម្មជនប្រជាធិតេយ្យហុងកុងច្រើនរហូតដល់ជាង ៥០ នាក់។ ជាការចាប់ខ្លួនទ្រង់ទ្រាយធំមិនធ្លាប់មានពីមុនមកនោះទេ និងធ្វើឡើងដោយយោងទៅតាមច្បាប់សន្តិសុខជាតិហុងកុងថ្មីដែលតាក់តែងឡើងដោយចិន។
ចុះផ្សាយនៅថ្ងៃ៖
ស្តាប់ - ០២:៣០
អ្នកនយោបាយនិងសកម្មជនគាំទ្រលទ្ធិប្រជាធិបតេយ្យហុងកុងសរុបប្រមាណ ៥៥ នាក់ ត្រូវបានចាប់ខ្លួនដោយផ្អែកលើច្បាប់សន្តិសុខជាតិថ្មី។ ចំណាត់ការនេះបង្ហាញពីសកម្មភាពបង្ក្រាបដែលមានសន្ទុះខ្លាំងជាងមុនពីសំណាក់រដ្ឋាភិបាលក្រុងប៉េកាំង។ នេះបើយោងទៅតាមសារដែលមាននៅក្នុងសេចក្តីថ្លែងការណ៍រួមរបស់រដ្ឋាភិបាលអាមេរិក និងប្រទេសសម្ព័ន្ធមិត្តលោកខាងលិចរួមមានអង់គ្លេស អូស្ត្រាលី និងកាដាណា។
កាលពីថ្ងៃទី ៦ មករា ប៉ូលិសហុងកុងបានចាប់ឃុំខ្លួនឥស្សរជនលេចធ្លោចំនួន ៥៣ នាក់ ក្នុងនោះរួមមានទាំងមេធាវីជនជាតិអាមេរិកាំងម្នាក់ផងពីបទ “ វិទ្ធង្សនា” ដែលជាបទឧក្រិដ្ឋសន្តិសុខជាតិថ្មីមួយ និងដែលអាចប្រឈមនឹងទោសជាប់ពន្ធនាគារអស់មួយជីវិត។
ការចាប់ខ្លួនទ្រង់ទ្រាយធំមិនធ្លាប់ជួបនេះគឺជាយុទ្ធនាការបង្ក្រាបចុងក្រោយបង្អស់ របស់ក្រុងប៉េកាំងដើម្បីបោសសម្អាតសកម្មភាពប្រឆាំងតវ៉ាផ្សេងៗនៅក្នុងទីក្រុងពាក់កណ្តាលស្វយ័តហុងកុង បន្ទាប់ពីមនុស្សរាប់លាននាក់បាននាំគ្នាចុះផ្លូវធ្វើបាតុកម្មក្នុងឆ្នាំ ២០១៩ ដើម្បីទាមទារលទ្ធិប្រជាធិបតេយ្យ។
បណ្តាប្រទេសលោកខាងលិច បានចោទប្រកាន់ចិនដីគោកថាបានប្រើសកម្មភាពបង្ក្រាបដើម្បីបិទខ្ទប់សិទ្ធិសេរីភាពដែលត្រូវបានសន្យាថែរក្សាការពារនៅហុងកុងក្រោមលក្ខន្តិកៈ “ប្រទេសមួយប្រព័ន្ធពីរ” នៅពេលដែលប្រទេសអតីតអាណានិគមនិយមអង់គ្លេសប្រគល់កោះហុងកុងត្រឡប់ឲ្យចិនវិញក្នុងឆ្នាំ ១៩៩៧។
នៅគ្រាកន្លងមក ទីក្រុងវ៉ាស៊ីនតោនបានដាក់ទណ្ឌកម្មលើមន្ត្រីចិន និងហុងកុងជាច្រើនរូប រួមទាំងមេដឹកនាំហុងកុងលោកស្រីការី ឡាំ ផងដែរ។ ចំណែកនៅសប្តាហ៍នេះវិញ ប្រមុខការបរទេសអាមេរិកលោកម៉ៃក៏ ប៉ុមប៉េអូ បាននិយាយថារដ្ឋបាលលោកត្រាំ នឹងពិចារណាអំពីការដាក់ទណ្ឌកម្មថ្មី ក្រោយពេលមានការចាប់ខ្លួនសកម្មជនប្រជាធិបតេយ្យហុងកុងក្នុងទ្រង់ទ្រាយធំ។
គួររំឭកជូនថា សកម្មជនបក្សប្រឆាំងដែលជាអ្នកស្នេហាលទ្ធិប្រជាធិបតេយ្យជាង ៥០នាក់ក្នុងនោះមានពលរដ្ឋអាមេរិកម្នាក់ផងត្រូវបានមន្រ្តីប៉ូលិសហុងកុងជាង ១ ពាន់នាក់ លបឆ្មក់ចាប់ខ្លួនកាលពីព្រឹកថ្ងៃពុធ ទី៦ មករា ឆ្នាំ២០២១នេះ ពីបទប៉ុនប៉ងធ្វើវិទ្ធង្សនា។
ក្រុមអ្នកប្រជាធិបតេយ្យយល់ថាការចាប់ខ្លួននេះទំនងជាមានជាប់ពាក់ព័ន្ធនឹងការរៀបចំការបោះឆ្នោតផ្ទៃក្នុងមួយកាលពីថ្ងៃទី១១កក្កដា ២០២០ របស់បក្សប្រជាធិបតេយ្យហុងកុងដើម្បីជ្រើសរើសតំណាងរបស់ខ្លួនសម្រាប់ចូលរួមក្នុងការបោះឆ្នោតសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ