ទីភ្នាក់ងារឱសថចិនអនុញ្ញាតឲ្យប្រើប្រាស់វ៉ាក់សាំងផលិតក្នុងស្រុក
អាជ្ញាធរសុខភាពចិន បានប្រកាស នៅថ្ងៃប្រហស្បតិ៍នេះ ថា ខ្លួនបានផ្តល់ភ្លើងខៀវ អនុញ្ញាតឲ្យគេប្រើប្រាស់វ៉ាក់សាំងបង្ការជំងឺកូវីដ ដែលផលិតឡើងដោយមន្ទីរពិសោធន៍ក្នុងស្រុកចិន ឈ្មោះ Sinopharm។ មន្ទីពិសោធន៍ Sinopharm ទើបតែបានប្រកាស កាលពីថ្ងៃពុធថា វ៉ាក់សាំងរបស់ខ្លួនមានប្រសិទ្ធិភាព ដល់ទៅ ៧៩,៣៤%។
ចុះផ្សាយនៅថ្ងៃ៖
ស្តាប់ - ០២:២៥
នៅក្នុងសន្នីសិទកាសែត នៅទីក្រុងប៉េកាំង អនុប្រធានរបស់ទីភ្នាក់ងារឱសថជាតិចិន បានប្រកាសថា ទីភ្នាក់ងារបានអនុញ្ញាត ដោយភ្ជាប់ជាមួយលក្ខខណ្ឌ ឲ្យគេអាចប្រើប្រាស់វ៉ាក់សាំងSinopharm សម្រាប់ចាក់បង្ការជំងឺកូវីដ១៩។
ទីភ្នាក់ងារឱសថចិនបានប្រើពាក្យ អនុញ្ញាតឲ្យប្រើប្រាស់ ដោយភ្ជាប់ជាមួយលក្ខខណ្ឌ ព្រោះថា វ៉ាក់សាំងSinopharm នៅមិនទាន់ បញ្ចប់ការសាកល្បង នៅដំណាក់កាលទី៣ជាស្ថាពរ ទៅតាមស្តង់ដារ អន្តរជាតិ នៅឡើយទេ ប៉ុន្តែ លទ្ធផលតេស្ត សាកល្បង បានបង្ហាញហើយថា វ៉ាក់សាំងមានប្រសិទ្ធិភាព។
នៅក្នុងសន្នីសិទដដែល អនុរដ្ឋមន្រ្តីក្រសួងសុខាភិបាលចិន លោកZeng Yixin បានបញ្ជាក់ថា ការអនុញ្ញាតិរបស់ទីភ្នាក់ងារឱសថចិន នឹងធ្វើ ឲ្យគេអាចពង្រីក យុទ្ធនាការចាក់វ៉ាក់សាំង ជាសាធារណៈ ទៅដល់ក្រុមដែលប្រឈមខ្លាំងដូចជាមនុស្សចាស់ និងអ្នកដែលមានសុខភាពទន់ខ្សោយជាដើម។ បើតាមអនុរដ្ឋមន្រ្តីចិន គេចាំបាច់ត្រូវចាក់វ៉ាក់សាំង ដល់ប្រជាជន ប្រមាណ ៦០% ទៅ ៧០% នៃប្រជាជនចិនសរុប ដើម្បី អាចធានាការពារទាំងស្រុងប្រជាជនពីជំងឺកូវីដ។
នៅថ្ងៃព្រហស្បតិ៍ អាជ្ញាធរចិនបានអះអាងដែរថា គិតមករហូតមកដល់ថ្ងៃនេះ គេបានប្រើប្រាស់បេក្ខជនវ៉ាក់សាំង របស់ចិន សម្រាប់ចាក់ទៅលើមនុស្ស៤លាន ៥សែននាក់ ដែលនៅក្នុងនោះ មួយចំនួនជាបុគ្គលិកពេទ្យ និងពលករ និស្សិត ចិនដែលត្រូវធ្វើដំណើរទៅបរទេស។
តាមការចុះផ្សាយរបស់ប្រព័ន្ធផ្សព្វផ្សាយ BBC នៅមុនដាក់ឲ្យប្រើប្រាស់ជាផ្លូវការ វ៉ាក់សាំងSinopharm ធ្លាប់ត្រូវបានអាជ្ញាធរចិន យកទៅចាក់លើជនជាតិចិន ១លាននាក់ កាលពីរដូវក្តៅ កន្លងទៅ នៅក្នុងក្របខ័ណ្ឌ កម្មវិធីបន្ទាន់ ដ៏ចម្រូងចម្រាសមួយ។ ទោះស្ថិតក្នុងដំណាក់កាលសាកល្បង វ៉ាក់សាំង Sinopharm ត្រូវបានចុះបញ្ជីដាក់ឲ្យប្រើប្រាស់រួចហើយ នៅ ប្រទេសអេមីរ៉ា អារ៉ាប់រួម នៅដើមខែធ្នូនេះ បន្ទាប់ពីការធ្វើតេស្ត សាកល្បងបង្ហាញថា វ៉ាក់សាំង Sinopharm មានប្រសិទ្ធិភាពដល់ ៨៦%។ សម្រាប់អ្នកជំនាញសុខភាព ការបើកភ្លើងខៀវឲ្យប្រើប្រាស់ ជាផ្លូវការវ៉ាក់សាំង ដែលនៅមិនទាន់បិទបញ្ចប់ដំណាក់កាលសាកល្បង ទី៣ ដូចក្នុងករណីវ៉ាក់សាំងSinopharm របស់ចិន គឺជារឿងដែលមិនអាចទទួលយកបាននោះទេ ជាពិសេស នៅក្នុងបណ្តាប្រទេសលោកខាងលិច។
មួយវិញទៀត បើប្រៀបធៀបនឹងវ៉ាក់សាំងរបស់ក្រុមហ៊ុនអាមេរិក Pfizer និងModerna ដែលមានប្រសិទ្ធិភាព ដល់ទៅ ៩០% វ៉ាក់សាំងSinopharmមានប្រសិទ្ធិភាព តិចជាង (៧៩%) ប៉ុន្តែ ដោយសារលក់ក្នុងតម្លៃថោក វាងាយនឹងប្រកួតប្រជែងជាង ជាពិសេស នៅទីផ្សារអាស៊ី និងអាហ្វ្រិក។ កន្លងទៅ ចិនដែលចង់ដឹកនាំមុខ គេ ខាងជួយសង្រ្គោះ ពិភពលោកពីជំងឺរាតត្បាតកូវីដ បានប្រកាសហើយថា ខ្លួននឹងចែករំលែក ដោយឥតគិតថ្លៃ ឬលក់វ៉ាក់សាំងក្នុងតម្លៃថោក សម្រាប់ប្រទេសកំពុងអភិវឌ្ឍ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ