វិបត្តិកូវីដបណ្តាលឲ្យកំណើនសេដ្ឋកិច្ចវៀតណាមធ្លាក់ចុះដល់កម្រិតទាបបំផុតមិនធ្លាប់មាន
នៅវៀតណាម រដ្ឋាភិបាលក្រុងហាណូយបានប្រកាសនៅថ្ងៃអាទិត្យ ទី២៧ ធ្នូ អំពីកំណើនសេដ្ឋកិច្ចចំនួន ២,៩១ % នៅក្នុងឆ្នាំ ២០២០នេះ។ អត្រាកំណើន ២,៩១ % មានកម្រិតទាបបំផុតមិនធ្លាប់មាននោះទេក្នុងរយៈពេលជាង ៣០ឆ្នាំកន្លងមកនេះ ដោយសារតែផលប៉ះពាល់ពីវិបត្តិកូវីដ១៩។
ចុះផ្សាយនៅថ្ងៃ៖
ស្តាប់ - ០២:៣៥
ជារដ្ឋកុម្មុយនិស្ត វៀតណាមស្ថិតក្នុងចំណោមប្រទេសដែលមានកំណើនសេដ្ឋកិច្ចលឿនបំផុតមួយនៅអាស៊ី។ ហើយអត្រាកំណើនឆ្នាំ ២០២០នេះ ក្នុងចំនួន ២,៩១ % បង្ហាញពីការធ្លាក់ចុះខ្លាំងកម្រមានសម្រាប់ទីក្រុងហាណូយ។
អត្រាកំណើន ២,៩១ % គឺជាអត្រាមួយទាបបើធៀបទៅនឹងអត្រាកំណើនសេដ្ឋកិច្ចកាលពីឆ្នាំទៅមិញ ដែលមានចំនួន ៧%។ ក៏ប៉ុន្តែ វាគឺជាអត្រាកំណើនល្អបំផុតមួយក្នុងបរិបទនៃវិបត្តិសេដ្ឋកិច្ចសកលដែលបណ្តាលមកពីជំងឺរាតត្បាតកូវីដ១៩។
មន្ត្រីរដ្ឋាភិបាលវៀតណាម បានចាត់ទុកអត្រាកំណើននេះជាជោគជ័យដ៏ធំធេងមួយ។ ការិយាល័យស្ថិតិទូទៅមានមូលដ្ឋានក្នុងទីក្រុងហាណូយ (GSO) បាននិយាយនៅក្នុងសេចក្តីថ្លែងការណ៍មួយនាថ្ងៃអាទិត្យ ទី២៧ ធ្នូថា កំណើនសេដ្ឋកិច្ចនៅត្រីមាសចុងក្រោយនៃឆ្នាំ២០២០ មានចំនួន ៤,៤៨% ដែលនេះជាកត្តារួមចំណែករុញឲ្យអត្រាប្រចាំឆ្នាំកើនឡើងដល់ ២,៩១%។
"នៅក្នុងបរិបទនៃការឆ្លងរាតត្បាតខ្លាំងនៃជំងឺកូវីដ១៩ ដែលបង្កជាប៉ះពាល់យ៉ាងធ្ងន់ធ្ងរដល់ស្ថានភាពសេដ្ឋកិច្ចសង្គម អត្រាកណើនសេដ្ឋកិច្ចនេះគឺជាជោគជ័យដ៏ធំធេងណាស់សម្រាប់ប្រទេសវៀតណាម"។ នេះគឺជាខ្លឹមសារដែល GSO បាននិយាយនៅក្នុងសេចក្តីថ្លែងការណ៍ខាងលើ។
ខណៈដែលប្រទេសជាច្រើនទទួលរងគ្រោះខ្លាំងពីករណីឆ្លង និងអត្រាស្លាប់ខ្ពស់ដោយសារកូវីដ ប្រទេសវៀតណាមដែលមានចំនួនប្រជាជនច្រើនរហូតដល់ទៅប្រមាណ ៩៧ លាននាក់ មានអត្រាអ្នកឆ្លងកូវីដនៅទូទាំងប្រទេសតិចជាង ១ ៥០០នាក់ និងអ្នកស្លាប់ត្រឹមតែ ៣៥នាក់ប៉ុណ្ណោះ។
វៀតណាម ទទួលបានការកោតសរសើរពីពិភពលោកចំពោះការចាត់វិធានការតឹងរ៉ឹងភ្លាមៗ និងប្រកបដោយជោគជ័យគួរឲ្យកត់សម្គាល់ ក្នុងការប្រយុទ្ធប្រឆាំងនឹងការរីករាលដាលនៃជំងឺកូវីដ១៩ ដើម្បីការពារកុំឲ្យវាអាចចម្លងមេរោគបានលឿន ហើយអាចបើកឲ្យសកម្មភាពសេដ្ឋកិច្ចចាប់ដំណើរការឡើងវិញបានយ៉ាងឆាប់រហ័ស។
គួរជម្រាបជូនថា កំណើនសេដ្ឋកិច្ចវៀតណាមផ្លូវការមានលើសពីចំនួនដែលបានព្យាករដោយមូលនិធិរូបិយវត្ថុអន្តរជាតិ ដែលថា សេដ្ឋកិច្ចវៀតណាម នៅក្នុងឆ្នាំ២០២០នេះ អាចមានកំណើន ២,៤%។
ចំណែក ធនាគារពិភពលោកវិញបានលើកឡើងថា វៀតណាមទំនងជានឹងទទួលបានជោគជ័យបន្ថែមទៀតនៅឆ្នាំ ២០២១ ខាងមុខដោយអាចនឹងមានកំណើនសេដ្ឋកិច្ចចំនួន ៦,៨%ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ