បារាំង៖ ច្បាប់ស្តីពីសន្តិសុខ បង្កការខឹងសម្បានិងផ្ទុះបាតុកម្មនៅច្រើនកន្លែង
នៅប្រទេសបារាំង ច្បាប់ថ្មីស្តីពី សន្តិសុខទូទៅ បានបង្កការខឹងសម្បាពីប្រជាពលរដ្ឋ និងក្រុមអ្នកកាសែត ដែលស្រឡាញ់សេរីភាព។ រសៀលថ្ងៃសៅរ៍ ទី២១ វិច្ឆិកា គឺមានការរៀបចំក្បួនបាតុកម្ម នៅតាមទីក្រុងធំៗជាច្រើន ដើម្បីសម្តែងមតិប្រឆាំងនឹងសេចក្តីព្រាងច្បាប់ស្តីពីសន្តិសុខ។ ក្នុងក្រុងប៉ារីស ក្បួនបាតុកម្មបានបញ្ចប់ដោយមានការប៉ះទង្គិចរវាងបាតុករ និងកម្លាំងប៉ូលិស។
ចុះផ្សាយនៅថ្ងៃ៖
ស្តាប់ - ០២:៣០
«បើប៉ូលីសទម្លាក់កាំភ្លើងចុះ យើងនឹងដាក់កាមេរ៉ានិងទូរសព្ទចុះដែរ» «ទូរសព្ទថតរូប មិនសម្លាប់មនុស្សទេ តែកាំភ្លើងអាចបាញ់មនុស្សសម្លាប់បាន» «ច្បាប់សន្តិសុខ សម្លាប់សេរីភាព» ទាំងនេះជាបដាពាក្យស្លោក ដែលហ្វូងបាតុករបារាំងស្រែកនិងសរសេរផ្សព្វផ្សាយ ក្នុងឱកាសជួបជុំបាតុកម្ម នៅបណ្តាខេត្តនិងទីប្រជុំជនជាច្រើនកន្លែង។
ទោះបីជាឋិតនៅក្នុងបំរាមឱ្យសម្ងំនៅផ្ទះក្នុងបរិបទទប់ស្កាត់កូវីដ១៩ក្តី ក៏ក្រុមបាតុករបារាំងនៅតែមិនញញើតនឹងមេរោគ ហើយនិងនៅតែមកប្រមូលផ្តុំគ្នា ធ្វើបាតុកម្ម ចំនួនជាង ៧០០០ នាក់ នៅកណ្តាលក្រុងប៉ារីស ក្បែរទួរអែហ្វហ្វែល។ នៅខេត្តម៉ាកសីយ បាតុករជាង ២០០០នាក់។ ខេត្ត Montpellier ១ ៣០០នាក់។ មានបាតុកររាប់រយនាក់ផ្សេងទៀត នៅតាមទីប្រជុំជននិងបណ្តាទីរួមខេត្ត ដូចនៅខែលលីល នីស រ៉ែន ឡូរ៉ែន ប៊័រដូរ ជាដើម។
អ្វីដែលគួរកត់សម្គាល់ គឺមានក្រុមអ្នកកាសែតជាច្រើន មកពីអង្គភាពសារព័ត៌មានជាតិនិងឯកជន ដូចជា សហជីពសារព័ត៌មាន SNJ, កាសែតLe Monde, ភ្នាក់ងារព័ត៌មានបារាំងAFP, កូនសិស្សសាលាកាសែត ក៏មកចូលរួមធ្វើបាតុកម្មនឹងគេដែរ ពីព្រោះពួកគេយល់ថា ច្បាប់ថ្មី ប៉ះពាល់យ៉ាងធ្ងន់ធ្ងរដល់សេរីភាពសារព័ត៌មាន ប៉ះពាល់ដល់ការងារអ្នកកាសែត និងសិទ្ធសេរីភាពផ្តល់ព័ត៌មាន ដែលបានចែងនៅក្នុងច្បាប់បារាំងដ៏ល្បីល្បាញ ឆ្នាំ១៨៨១ ស្តីពី សេរីភាពសារព័ត៌មាន។
គួរបញ្ជាក់ថា មាត្រា២៤ នៃសំណើច្បាប់ថ្មីស្តីពីសន្តិសុខ ដ៏ចម្រូងសម្រាស គឺចែងដាក់ទោសព្រហ្មទណ្ឌជាប់ពន្ធនាគារ១ឆ្នាំ ហើយពិន័យជាប្រាក់៤ម៉ឺន៥ពាន់អឺរ៉ុប ចំពោះបុគ្គលណាដែលថតរូបឬវីដេអូឃើញចំមុខរបស់ប៉ូលីសនិងទាហាន ក្នុងពេលសមត្ថកិច្ចបំពេញប្រតិបត្តិការ ហើយបង្កឱ្យកើតមានហិង្សា និងមានចេតនាធ្វើឱ្យប៉ះពាល់ដល់សុវត្ថិភាពរាងកាយនិងផ្លូវចិត្តរបស់ក្រុមសមត្ថកិច្ច។
មាត្រា២៤នេះ ត្រូវរដ្ឋសភាអនុម័តយល់ព្រមរួចហើយ កាលពីថ្ងៃសុក្រ។ អង្គការអ្នកកាសែតគ្មានព្រំដែន ដែលមានមូលដ្ឋានបារាំងប៉ារីសស្រាប់ យល់ថា ច្បាប់សន្តិសុខនេះ បង្កឧបសគ្គខ្លាំង ដល់កិច្ចការផ្តល់ព័ត៌មានរបស់ក្រុមអ្នកកាសែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ