បោះឆ្នោតភូមា៖ គណបក្សលោកស្រីអ៊ុងសាន ស៊ូជី ប្រកាសថាបានឈ្នះភ្លូកទឹកភ្លូកដី
កាលពីថ្ងៃអាទិត្យទី៨វិច្ឆិកា ប្រជាជនភូមា បានចូលរួមបោះឆ្នោតសភាអាណត្តិថ្មី ដែលនេះគឺ ជាលើកទី២ហើយ បន្ទាប់ពីរបបសិក បានបិទបញ្ចប់ជាផ្លូវការ។ គណបក្សសម្ព័ន្ធជាតិដើម្បីប្រជាធិបតេយ្យ របស់លោកស្រីអ៊ុងសាន ស៊ូជី បានប្រកាសថាលើកនេះ ខ្លួនបានទទួលជ័យជំនះភ្លូកទឹកភ្លូកដី លើសកាលពីលើកមុនទៅទៀត។ តែយ៉ាងណា អង្គការសិទ្ធិមនុស្សខ្លះបានលើកឡើងថា ការបោះឆ្នោតនេះ ពុំមានភាពសេរីនិងសកលទេ។
ចុះផ្សាយនៅថ្ងៃ៖
ស្តាប់ - ០២:៤៩
ថ្លែងប្រាប់អ្នកយកព័ត៌មានបារាំង AFP លោក Myo Nyunt អ្នកនាំពាក្យគណបក្សសម្ព័ន្ធជាតិដើម្បីប្រជាធិបតេយ្យ បានអះអាងថា ថ្វីបើលទ្ធផលផ្លូវការ នឹងត្រូវប្រកាសក្នុងរវាងប៉ុន្មានថ្ងៃខាងមុខក្តី ក៏ប៉ុន្តែគណបក្សលោកជឿទុកចិត្តថា លើកនេះ ប្រជាជនភូមាបានបោះឆ្នោត ជូបបក្សសម្ព័ន្ធជាតិដើម្បីប្រជាធិបតេយ្យ យ៉ាងភ្លូកទឹកភ្លូកដី។ លោកបន្ថែមថា លើកនេះ គណបក្សលោកប្រហែលជាបានបំបែកឯកត្តកម្មចំនួនអាសនៈ លើសកាលពីការបោះឆ្នោត ក្នុងឆ្នាំ២០១៥។
គួរកត់សំគាល់ថា ថ្វីបើស្ថិតក្នុងស្ថានភាពឆ្លងរាលដាលជំងឺកូវីដ១៩ គួរឲ្យបារម្ភ តែប្រជាជនភូមា បានទៅចូលរួមបោះឆ្នោតសភា អាណត្តិថ្មី កាលពីថ្ងៃអាទិត្យទី៨វិច្ឆិកា យ៉ាងច្រើនកុះករ។ នៅយប់ថ្ងៃអាទិត្យ ក្រុមសកម្មជន និងអ្នកគាំទ្រ គណបក្សសម្ព័ន្ធជាតិដើម្បីប្រជាធិបតេយ្យ បានធ្វើការជួបជុំគ្នា ដើម្បីអបអរជ័យជំនះ ថែមទៀតផង។
តែយ៉ាងណាក៏ដោយ មានអង្គការសិទ្ធិមនុស្សមួយចំនួនធំ បានបរិហារការបោះឆ្នោតនៅភូមានេះ ថាមិនឆ្លើយតបទៅនឹងក្របខណ្ឌលទ្ធិប្រជាធិបតេយ្យទេ។ ការបោះឆ្នោតលើកនេះ បានប្រព្រឹត្តិធ្វើទៅ តែនៅតាមរដ្ឋ ឬតំបន់ដែលមានជនជាតិភូមារស់នៅច្រើនបំផុត។ ចំណែករដ្ឋមួយចំនួន ដែលមានជនជាតិភាគតិចរស់នៅច្រើន គេមិនបានរៀបចំការបោះឆ្នោតទេ ដោយសំអាងថាមានបញ្ហាអសន្តិសុខ។ ក្នុងន័យនេះ គណបក្សផ្សេងៗ ដែលតំណាងឲ្យសម្លេងជនជាតិភាគតិច គឺត្រូវគេធីបចោល។ យ៉ាងណាមិញ ប្រជាជនរ៉ូហ៊ីងយ៉ាងប្រមាណ៦សែននាក់ ដែលរស់នៅភាគខាងលិចភូមា គឺពួកគេគ្មានសិទ្ធិបើឆ្នោតឡើយ។ លោក Ismail Wolff តំណាងអង្គការ Fortify Rights បានលើកឡើងថា ការបោះឆ្នោតនៅភូមានេះ មិនមានលក្ខណៈសេរី និងសកល ដូចមានចែងក្នុងគោលការណ៍គ្រិះនៃច្បាប់អន្តរជាតិទេ។
គួររំលឹកថា បក្សសម្ព័ន្ធជាតិដើម្បីប្រជាធិបតេយ្យ របស់លោកស្រីអ៊ុងសាន ស៊ូជី បានឈ្នះឆ្នោតកាលពីឆ្នាំ២០១៥។ ក៏ប៉ុន្តែបក្សនេះ បានសុខចិត្តបែងចែកអំណាច គ្រប់គ្រងប្រទេសជាមួយនឹងក្រុមយោធា ដែលកាន់កាប់អាសន្នៈសភា ចំនួន២០%។ ក្រសួងធំៗ៣ គឺក្រសួងមហាផ្ទៃ ក្រសួងការពារជាតិ និងក្រសួងកិច្ចការព្រំដែន ត្រូវបានប្រគល់ទៅឲ្យក្រុមយោធា។ ចំណែកលោកស្រី អ៊ុងសាន ស៊ូជី បានត្រឹមទទួលតំណែងជាទីប្រឹក្សាពិសេសរបស់រដ្ឋប៉ុណ្ណោះ ដោយសាររដ្ឋធម្មនុញ្ញសរសេរដោយក្រុមយោធា បានដាក់រនាំង មិនឲ្យអ្នកដែលមានប្តី ឬប្រពន្ធជាជនជាតិបរទេស ឡើងកាន់តំណែងជាប្រធានាធិបតី។
គួរកត់សំគាល់ដែរថា ថ្វីបើលោកស្រីអ៊ុងសាន ស៊ូជី នៅតែត្រូវបានប្រជាជនភូមា គោរពស្រលាញ់ក្នុងស្រុក ក៏ប៉ុន្តែនៅលើឆាកអន្តរជាតិឯនោះវិញ កិត្តិយសរបស់លោកស្រីអ៊ុងសាន ស៊ូជី បានធ្លាក់ចុះជាខ្លាំង។ គេបានរិះគន់ពីភាពកំសាក និងភាពអសកម្មរបស់លោកស្រី ដែលបណ្តោយឲ្យមានការកាប់សម្លាប់ ធ្វើទុក្ខបុកម្នេញទៅលើជនជាតិរ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ