មួយសប្តាហ៍ក្រោយព្យុះទីហ្វុងម៉ូឡាវ ហ្វ៊ីលីពីនកំពុងរងគ្រោះដោយព្យុះទីហ្វុងហ្គោនី
ខ្យល់ព្យុះទីហ្វុងមួយទៀត ឈ្មោះ ហ្គោនី (Goni) កំពុងតែបោកបក់នៅប្រទេសហ្វ៊ីលីពីន។ មានមនុស្សយ៉ាងហោច ៤នាក់បានស្លាប់ និងប្រជាជនប្រមាណជាង៣សែននាក់ ត្រូវបានអាជ្ញាធរជន្លៀសចេញពីផ្ទះសម្បែង។ កាលពីសប្តាហ៍មុន ហ្វ៊ីលីពីនក៏បានរងគ្រោះគ្រោះដោយខ្យល់ព្យុះទីហ្វុង មួយរួចទៅហើយ គឺខ្យល់ព្យុះ ម៉ូឡាវ (Molave) ដែលបានបណ្តាលឲ្យស្លាប់មនុស្សចំនួន២២នាក់។
ចុះផ្សាយនៅថ្ងៃ៖
ស្តាប់ - ០២:១០
បើតាមអាជ្ញាធរឧត្តុនិយមហ្វ៊ីលីពីន ខ្យល់ព្យុះទីហ្វុង ហ្គោនី (Goni) ដែលកំពុងតែបោកបក់លើប្រទេសហ្វ៊ីលីពីននាពេលនេះ ទំនងជាព្យុះទីហ្វុង ដែលមានកម្លាំងខ្លាំងជាងគេបំផុត ក្នុងឆ្នាំនេះ។ នៅម៉ោង៥ទាបភ្លឺ ព្រឹកថ្ងៃអាទិត្យ ព្យុះហ្គោនី បានចាប់ផ្តើមបោកបក់ លើកោះ Catandouanes ភាគឥសានហ្វ៊ីលីពីន ជាមួយនឹងល្បឿនខ្យល់ ប្រមាណ២២៥គីឡូម៉ែត្រក្នុងមួយម៉ោង អមដោយទឹកភ្លៀងដ៏ជោគជាំ។
កម្លាំងខ្យល់កន្ត្រាក់ បានបោកគួចយកដំបូល និងផ្ទះសម្បែងប្រជាជនរាប់ម៉ឺនខ្នង។ ទឹកភ្លៀង បានជន់លិចយ៉ាងខ្លាំង នឹងបានផ្តាច់ផ្លូវ ក្នុងខេត្ត Albay។ នាយកក្រុមការងារការពារប្រជាជនស៊ីវីល បានអះអាងថា យ៉ាងហោចណាស់ មានមនុស្សប្រមាណ៣៤៥០០០នាក់ ត្រូវបានបញ្ជូនរំដោះចេញ ពីតំបន់ប្រឈមខ្លាំង។
តាមការប្រកាសរបស់ អាជ្ញាធរឧត្តុនិយមហ្វ៊ីលីពីន ព្យុះទីហ្វុង ហ្គោនី កំពុងរំកិលខ្លួន ខិតទៅលើតំបន់កោះ Luçon ដែលស្ថិតនៅភាគខាងជើង ហើយដែលស្ថិតនៅក្បែរទីក្រុងម៉ានីល។ ប្រជាជនមួយចំនួន ដែលរស់នៅក្នុងសង្កាត់សំណង់អាណាធិបតេយ្យ ជាយក្រុងម៉ានីល បាននាំគ្នាភៀសខ្លួន ទៅរកទីទួលមានសុវត្ថិភាព។ ព្រលានយន្តហោះអន្តរជាតិទីក្រុងម៉ានីល ក៏ត្រូវបិទទ្វារផងដែរ ដោយខ្លាចក្រែងមានទឹកជំនន់។
អាជ្ញាធរឧត្តុនិយមហ្វ៊ីលីពីន អះអាងថា ព្យុះទីហ្វុង ហ្គោនី នឹងថយកម្លាំងបន្តិចម្តងៗ ពេលដែលវារំកិលខ្លួនទៅកាន់សមុទ្រចិនខាងត្បូង។ ក៏ប៉ុន្តែ នៅខាងលើមហាសមុទ្រប៉ាស៊ីហ្វិកឯនោះវិញ ខ្យល់ព្យុះទីហ្វុងមួយទៀត កំពុងតែប្រមូលផ្តុំកម្លាំង ហើយនឹងរំកិលមកឆ្លងកាត់ ប្រជុំកោះប្រទេសហ្វ៊ីលីពីន ក្នុងរវាងប៉ុន្មានថ្ងៃខាងមុខទៀត។
សូមបញ្ជាក់ ហ្វ៊ីលីពីន តែងតែរងគ្រោះ ដោយខ្យល់ព្យុះត្រូពិក និងព្យុះទីហ្វុង ចំនួនជាង២០ដង ជារៀងរាល់ឆ្នាំ។ គ្រោះធម្មជាតិជាប្រចាំនេះ បានធ្វើឲ្យខូចខាតផ្ទះសម្បែងប្រជាជន បំផ្លាញផលដំណាំ បំផ្លាញហេដ្ឋរចនាសម្ព័ន្ធ និងបានធ្វើឲ្យប្រជាជនក្នុងតំបន់នេះ រស់នៅក្នុងភាពក្រីក្រ ឥតស្រាកស្រាន្ត។ កាលពីឆ្នាំ២០១៣ ព្យុះទីហ្វុង Haiyan ដ៏មានកម្លាំងខ្លាំងបំផុត បានសម្លាប់ជីវិតប្រជាជនហ្វ៊ីលីពីន ចំនួន៧៣០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ