អ.ស.ប៖ រោគរាតត្បាតនាពេលអនាគតទំនងជាកាន់តែសាហាវនិងសម្លាប់មនុស្សកាន់តែច្រើន
សព្វថ្ងៃនេះ កូវីដ១៩ ត្រូវបានគេចាត់ទុកថាជាជំងឺរាតត្បាតដ៏កាចសាហាវ និងកំពុងធ្វើឲ្យពិភពលោកក្រពុលមុខជាខ្លាំង។ ក៏ប៉ុន្តែ នាពេលអនាគត មនុស្សលោកយើងអាចប្រឈមទៅនឹងមហន្តរាយសុខភាពធ្ងន់ធ្ងរជាងនេះទៅទៀត។ ជាក់ស្តែងនាពេលថ្មីៗនេះ ក្រុមប្រឹក្សាជីវចម្រុះរបស់អង្គការសហប្រជាជាតិបានព្រមានថា ជំងឺរាតត្បាតនឹងកើតឡើងញឹកញាប់ជាងពេលបច្ចុប្បន្ន សម្លាប់មនុស្សកាន់តែច្រើន និងធ្វើឲ្យខូចខាតកាន់តែធ្ងន់ធ្ងរដល់សេដ្ឋកិច្ចពិភពលោកជាងជំងឺកូវីដទៅទៀតប្រសិនបើគ្មានការផ្លាស់ប្តូរជាមូលដ្ឋាននៃសកម្មភាពដែលមនុស្សធ្វើចំពោះធម្មជាតិទេនោះ។
ចុះផ្សាយនៅថ្ងៃ៖
ស្តាប់ - ០២:៣០
មានវីរុសរហូតដល់ទៅប្រមាណជា ៨សែន ៥ម៉ឺន ដែលជាប្រភេទវីរុសស្រដៀងទៅនឹងមេរោគកូរ៉ណាថ្មីដែរកំពុងតែមានវត្តមាននៅក្នុងខ្លួនសត្វ និងអាចឆ្លងទៅមនុស្សលោកបាន។ នេះបើយោងតាមអ្នកជំនាញរបស់អង្គការសហប្រជាជាតិដោយបន្ថែមថា រោគរាតត្បាតតំណាងឲ្យការគំរាមកំហែងដែលមានពិតចំពោះមនុស្សលោកយើង។
ក្រុមអ្នកនិពន្ធនៃរបាយការណ៍ពិសេសស្តីពីជីវចម្រុះនិងរោគរាតត្បាតបានមានឲ្យដឹងថាការបំផ្លាញទីជម្រកនិងការកាប់សម្លាប់ ធ្វើអាជីកម្មលើសត្វ បានបណ្តាលឲ្យកើតជាជំងឺផ្សេងៗ។ នៅពេលអនាគត មេរោគនៅក្នុងខ្លួនសត្វទាំងនោះទំនងជាបង្កជាជំងឺជាច្រើនប្រភេទ និងចម្លងទៅដល់មនុស្សកាន់តែច្រើនឡើងៗ។
លោក Peter Daszak ប្រធានសម្ព័ន្ធអេកូសុខភាព និងជាអ្នកជំនាញរបស់ អ.ស.ប បានគូសបញ្ជាក់ថា គ្មានអាថ៌កំបាំងអ្វីបន្តិចសោះទេនៅពីក្រោយការផ្ទុះឡើងនៃជំងឺកូវីដ១៩ ឬជំងឺរាតត្បាតថ្មីផេ្សងទៀត។ លោកបានបន្តថា គឺសកម្មភាពរបស់មនុស្សដដែលជាដដែលទេដែលជាកត្តាជំរុញឲ្យមានការប្រែប្រួលអាកាសធាតុ និងការបាត់បង់ជីវចម្រុះ ក៏ដូចជាបង្កជាហានិភ័យឲ្យមានការរីករាលដាលនៃជំងឺរាតត្បាត។
យោងទៅតាមអ្នកជំនាញរបស់អ.ស.ប ដដែល កូវីដ១៩ គឺជាជំងឺរាតត្បាតទី ៦ហើយ រាប់ចាប់តាំងពីការផ្ទុះឡើងនៃជំងឺផ្តាសាយនៅឆ្នាំ ១៩១៨ ដែលជំងឺទាំងអស់នោះគឺសុទ្ធតែផ្ទុះឡើងដោយសកម្មភាពរបស់មនុស្ស។
សកម្មភាពទាំងនេះរួមមានជាអាទិ៍ ការធ្វើអាជីវកម្មលើបរិស្ថានដោយមិនបានគិតគូរពីនិរន្តរភាព តាមរយៈការកាប់បំផ្លាញព្រៃឈើ ការពង្រីកវិស័យកសិកម្ម ការធ្វើពាណិជ្ជកម្ម ឬហូបសាច់សត្វព្រៃ។ ចំណុចទាំងអស់នេះធ្វើឲ្យមនុស្សមានទំនាក់ទំនងយ៉ាងជិតស្និទ្ធជាមួយសត្វព្រៃនិងសត្វចិញ្ចឹម ហើយបន្ទាប់មកជំងឺថ្មីៗប្លែកៗក៏ចាប់លេចមុខឡើង។
ឧទាហរណ៍ជាក់ស្តែង ៧០ %នៃជំងឺដែលបានផ្ទុះឡើង និងកំពុងមានវត្តមាននាពេលបច្ចុប្បន្ន ដូចជាជំងឺអេបូឡា ហ្ស៊ីកា និងអេដស៍ (HIV/AIDS) គឺសុទ្ធតែមានប្រភពចេញពី ហ្សូណូទីក (zoonotic)។ មានន័យថា ជំងឺទាំងនោះបានចរាចរនៅក្នុងខ្លួនសត្វមុននឹងចម្លងទៅមនុស្ស។
ពាក់ព័ន្ធបញ្ហានេះ អ.ស.ប បានព្រមានថាមានជំងឺថ្មីចំនួន ៥ កើតឡើងក្នុងចំណោមមនុស្សជារៀងរាល់ឆ្នាំ ហើយគ្រប់ប្រភេទជំងឺទាំងនោះសុទ្ធតែមានសក្តានុពលអាចវិវត្តខ្លួនក្លាយជាជំងឺរាតត្បាតបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ