សកម្មជន Tony Chung ក្លាយជាជនជាប់ចោទទីមួយ ពីបទ “ញុះញង់” នៃច្បាប់សន្តិសុខហុងកុងថ្មី
នៅថ្ងៃព្រហស្បតិ៍ទី ២៩ តុលា ២០២០នេះ តុលាការហុងកុងបានធ្វើការចោទប្រកាន់សកម្មជនហុងកុងវ័យក្មេង តូនី ជុង Tony Chung ពីបទញុះញង់លាងលុយកខ្វក់និងផ្សព្វផ្សាយព័ត៌មានអាសអាភាស។ សកម្មជន តូនី ជុង បានក្លាយជាអ្នកតំណាងចលនានយោបាយហុងកុងទីមួយ ដែលរងការចោទប្រកាន់ស្របតាមច្បាប់សន្តិសុខថ្មី តាក់តែងដោយចិននិងទើបចូលជាធរមានកាលពីខែមិថុនាកន្លងទៅ។
ចុះផ្សាយនៅថ្ងៃ៖
មានអាយុ១៩ឆ្នាំ តូនី ជុង ជាសមាជិករបស់ក្រុម "Student Localism" ដែលមានសកម្មភាពទាមទារឯករាជ្យហុងកុងពីកណ្តាប់ដៃចិន និងដែលត្រូវបានអាជ្ញាធររំលាយចោល ក្រោយពីច្បាប់សន្តិសុខជាតិថ្មីហុងកុងបានចូលជាធរមានភ្លាមបន្តិច។ ប៉ុន្តែសាខាអន្តរជាតិនៅសកម្មខ្លាំង។ ច្បាប់សន្តិសុខថ្មី បានរាយបញ្ជីឈ្មោះបទល្មើសជាច្រើន រាប់ទាំងការបញ្ចេញមតិស្តីពីនយោបាយផង។ ការបញ្ចេញមតិការពារឯករាជភាព ឬស្វ័យតភាព ហុងកុង ក៏ចាត់ត្រូវបានចាត់ទុកជាបទឈ្មើសដែរ។
កាលពីខែកក្កដា តូនី ជុង និងសមាជិក"Student Localism" បីនាក់ផ្សេងទៀត ធ្លាប់ត្រូវកងកម្លាំងពិសេសទើបបង្កើត តាមរយៈច្បាប់សន្តិសុខថ្មី ចាប់ខ្លួនម្តង ពីបទសង្ស័យថាបានញុះញង់តាមប្រព័ន្ធសង្គម។ តូនី ជុង ត្រូវបានចាប់ខ្លួនជាថ្មី នៅថ្ងៃអង្គារទី ២៧តុលា ២០២០ នៅក្នុងហាងកាហ្វេមួយ នៅទល់មុខស្ថានកុងស៊ុលអាមេរិកប្រចាំហុងកុង។ បើតាមសេចក្តីថ្លែងការណ៍របស់ក្រុម"Friends of Hong Kong" ថ្ងៃអង្គារនោះ តូនី ជុង កំពុងរៀបចំឱ្យនាំសកម្មជនចូលស្ថានកុងស៊ុល ដើម្បីសុំសិទ្ធជ្រកកោន។
ចាប់ខ្លួននៅថ្ងៃអង្គារ តូនី ជុង ត្រូវបានបញ្ជូនទៅតុលាការ នៅថ្ងៃព្រហស្បតិ៍ ក្រោម ចោទប្រកាន់ពីបទ ញុះញង់ លាងលុយកខ្វក់ និងឃុបឃិតផ្សព្វផ្សាយព័ត៌មានអាសអាភាស។ តុលាការបានបដិសេធមិនឱ្យសកម្មជនរូបនេះ នៅ ក្រៅឃុំបណ្តោះអាសន្នទេ។ ជាមួយនឹងបទចោទប្រកាន់នវ តូនី ជុង អាចនឹងត្រូវជាប់ទោសក្នុងពន្ធនាគារ ពី១០ឆ្នាំ ដល់អស់មួយជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ