កូរ៉េខាងត្បូង៖ ម្ចាស់ក្រុមហ៊ុនអេឡិចត្រូនិក សាំសុង មរណភាព ក្នុងវ័យ៧៨ឆ្នាំ
នៅកូរ៉េខាងត្បូង ម្ចាស់ក្រុមហ៊ុនអេឡិចត្រូនិក សាំសុង បានទទួលមរណភាព ក្នុងវ័យ៧៨ឆ្នាំ។ លោក លី គុនហេ (Lee Kun-hee) បានចូលកាន់កាប់តំណែងអគ្គនាយកក្រុមហ៊ុនអេឡិចត្រូនិក សាំសុង នៅឆ្នាំ១៩៨៧ បន្តពីបិតា ហើយលោកបានដឹកនាំក្រុមហ៊ុនគ្រួសារមួយនេះ ឱ្យល្បីរន្ទឺលើកពិភពលោក។ សាំសុង បានចូលចំណែកយ៉ាងសំខាន់មួយ ក្នុងការជំរុញសេដ្ឋកិច្ចកូរ៉េខាងត្បូង ឱ្យក្លាយជាមហាអំណាចសេដ្ឋកិច្ច ទី១២ ទៀតផង។
ចុះផ្សាយនៅថ្ងៃ៖
ស្តាប់ - ០២:៤៣
«យើងត្រូវកែទម្រង់ ផ្លាស់ប្តូរ ប្តូរទាំងអស់ លើកលែងតែប្រពន្ធ និងកូនៗ» នេះជាប្រសាសន៍ដ៏ល្បីល្បាញរបស់អគ្គនាយក លី គុនហេ នៅឆ្នាំ១៩៩៣ គ្រាដែលធ្វើកំណែទម្រង់ស៊ីជម្រៅ ក្នុងក្រុមហ៊ុនអេឡិចត្រូនិក សាំសុង។ វេលានោះ លោកបញ្ជាឱ្យកម្ទេចដុតចោលផលិតផលនិងទូរសព្ទដៃ ប្រមាណ ១សែន៥ម៉ឺន គ្រឿងដែលនៅសល់ក្នុងស្ទុក ហើយចាប់ផ្តើមសករាជថ្មី នៃការច្នៃប្រឌិត កែទម្រង់យុទ្ធសាស្ត្រក្រុមហ៊ុន និងអភិវឌ្ឈន៍បច្ចេកវិទ្យា ព្រមទាំង ពង្រីកទីផ្សារទៅក្រៅប្រទេស។ លោកផ្តើមឈ្វេងយល់ទីផ្សារអន្តរជាតិ និងបានទាក់ទងរកស៊ីជាមួយក្រុមហ៊ុន ចិន ជប៉ុន និងបរទេសផ្សេងៗទៀត ដែលទីបំផុត បានធ្វើឱ្យស្លាកយីហោ សាំសុង ឡើងល្បី លើឆាកអន្តរជាតិ យ៉ាងឆាប់រហ័ស។ សព្វថ្ងៃ សាំសុង ក្លាយជាក្រុមហ៊ុនយក្ស លំដាប់ពិភពលោក ខាង ទូរសព្ទដៃ កញ្ចក់អេក្រង់ទូរទស្សន៍ LCD និងគ្រឿងអេឡេត្រូនិច។
កាលពីក្មេងវ័យ កុមារ លី គុនហេ បានរស់នៅប្រទេសជប៉ុន ហើយនិងបានរៀនបរិញ្ញាបត្រនៅជប៉ុន និងសិក្សាថ្នាក់អនុបណ្ឌិត នៅសកលវិទ្យាល័យ George Washington នៃសហរដ្ឋអាមេរិក។
ក្នុងជីវិតឯកជននិងជំនួញ លោក លី គុនហេ ត្រូវគេមើលឃើញថា មានទំនាក់ទំនងជិតដិតបំផុត ជាមួយអ្នកនយោបាយ និងមន្ត្រីរដ្ឋាភិបាលកូរ៉េខាងត្បូង ដែលជាហេតុនាំឱ្យមានការប្រកួតប្រជែងមិនស្មោះត្រង់។ សូមជ្រាបថា ភរិយារបស់លោក គឺជាកូនស្រីរបស់អតីតរដ្ឋមន្ត្រីក្រសួងយុត្តិធម៌ទៀតផង។
លោក លី គុនហេ ធ្លាប់ត្រូវតុលាការកូរ៉េខាងត្បូង ចោទប្រកាន់ពីបទពុករលួយ សូកប៉ាន់ និងបន្លំគេចពន្ធ ហើយនិងសាលាជម្រះក្តីត្រូវកាត់ទោស ជាច្រើនដង ដូចជានៅឆ្នាំ១៩៩៦ និង២០០៨ ជាដើម។ ឆ្នាំ២០១៤ ជាអកុសល លោកធ្លាក់ខ្លួនឈឺដោយសារជំងឺបេះដូង ហើយត្រូវផ្ទេរកិច្ចការដឹកនាំច្រើនទៅកូនប្រុស ឈ្មោះ Lee Jae-Yong ដែលរូបគាត់នេះ ក៏មានរឿងអាស្រូវពុករលួយច្រើនដែរ និងពាក់ព័ន្ធជាមួយអតីតប្រធានាធិបតី លោកស្រី ប៉ាក់ គុនហេ។ ដំណើរក្តីក្តាំនៅតែបន្តអូសបន្លាយនៅឡើយ។
បើទោះបីជា សាំសុង ជា ក្រុមហ៊ុនបន្តត្រកូលគ្រួសារ តែ សាំសុង បានអភិវឌ្ឍរីកចម្រើន ក្លាយជាក្រុមហ៊ុនយក្ស មានបុគ្គលិករាប់ម៉ឺននាក់ ហើយជួយជ្រោមជ្រែងសេដ្ឋកិច្ចជាតិ យ៉ាងសម្បើម។ ថ្ងៃលោកទទួលអនិច្ចកម្មនេះ ក្រុមហ៊ុនបានចេញសេចក្តីប្រកាសដោយចាត់ទុករូបលោក លី គុនហេ ថាជាសហគ្រិនដ៏មានទស្សនវិស័យវែងឆ្ងាយ ហើយជាអ្នកដឹកនាំឱ្យ សាំសុង ក្លាយជាសហគ្រាសជឿនលឿន ល្បីល្បាញ និងខ្លាំងក្លាលំដាប់សកលលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ