រដ្ឋមន្រ្តីការបរទេស និងរដ្ឋមន្រ្តីការពារជាតិអាមេរិកធ្វើដំណើរទៅពង្រឹងសម្ព័ន្ធភាពជាមួយឥណ្ឌា
រដ្ឋមន្រ្តីការពារជាតិអាមេរិក លោកMark Esper បានប្រកាស កាលពីថ្ងៃអង្គារថា លោកនឹងធ្វើដំណើរជាមួយរដ្ឋមន្រ្តីការបរទេស Mike Pompeo ទៅប្រទេសឥណ្ឌា នៅសប្តាហ៍ក្រោយ។ តាមប្រមុខ ការពារជាតិអាមេរិក ទស្សនកិច្ចទៅឥណ្ឌាលើកនេះ គឺដើម្បីពង្រឹងសម្ព័ន្ធភាព ជាមួយទីក្រុងញូវដេលី នៅចំពោះមុខមហិច្ឆតាពង្រីកដែនឥទ្ធិពលរបស់ចិន នៅតំបន់ឥណ្ឌូប៉ាស៊ីហ្វិក។
ចុះផ្សាយនៅថ្ងៃ៖
ស្តាប់ - ០២:៣២
នេះជាលើកទី៣ ដែលអាមេរិក និងឥណ្ឌា បើកកិច្ចប្រជុំ២ បូក ២ ថ្នាក់រដ្ឋមន្រ្តីបរទេស និងរដ្ឋមន្រ្តីការពារជាតិ។ បន្ទាប់ពីអាមេរិក ធ្វើជាម្ចាស់ផ្ទះ ទទួលរដ្ឋមន្រ្តីការបរទេស និងរដ្ឋមន្រ្តីការពារជាតិឥណ្ឌា នៅខែកញ្ញាឆ្នាំមុន ដល់វេនរដ្ឋមន្រ្តីអាមេរិក ដែលត្រូវទៅធ្វើជួបសមភាគីឥណ្ឌានៅទីក្រុងញូវដេលី នៅសប្តាហ៍ក្រោយ។ ទស្សនកិច្ចរបស់រដ្ឋមន្រ្តីអាមេរិកនៅឥណ្ឌា លើកនេះជាផ្នែកមួយនៃគំនិតផ្តួចផ្តើមរបស់អាមេរិក ដែលចង់ពង្រឹងសម្ព័ន្ធភាពជាមួយសម្ព័ន្ធមិត្តចាស់ៗ ហើយនិងអភិវឌ្ឍចំណងមិត្តភាពថ្មីជាមួយប្រទេសដទៃទៀត ដើម្បីទប់ទល់ឥទ្ធិពលរបស់រុស្ស៊ី និងចិន នៅក្នុងពិភពលោក។
ថ្លែងនៅមជ្ឈមណ្ឌលត្រិះរិះ Atlantic Council រដ្ឋមន្រ្តីការពារជាតិ អាមេរិក លោកMark Esper បានថ្លែង ដោយមិនលាក់លៀមថា ឥណ្ឌា ជាប្រទេសដៃគូ ដ៏ជាក់ច្បាស់មួយរបស់អាមេរិក។ សម្រាប់ប្រមុខការពារជាតិអាមេរិក ឥណ្ឌា ដែលជាបិតាប្រជាធិបតេយ្យ នៅក្នុងលោកជាប្រទេសដែលមានសមត្ថភាព និងសំបូរដោយប្រជាជនមានទេពកោសល្យ។ ប៉ុន្តែ ឥណ្ឌា ត្រូវប្រឈមរាល់ថ្ងៃ នឹងការរំលោភបំពានពីចិន នៅ តំបន់ភ្នំហិមាល័យ។
នៅក្រោយ ការប៉ះទង្គិចគ្នា នៅព្រំដែន ត្រង់តំបន់ហិមាល័យ ដែលបានសម្លាប់ទាហានឥណ្ឌា ២០នាក់ កាលពី ខែមិថុនា រដ្ឋមន្រ្តីការពារជាតិ អាមេរិកធ្លាប់បានថ្លែង ហើយថា អាមេរិកតាមដានជាប់ជានិច្ចស្ថានការណ៍ជម្លោះ នៅព្រំដែនចិន និងឥណ្ឌា។
ប្រតិកម្មនឹងការលើកឡើងរបស់រដ្ឋមន្រ្តីការពារជាតិអាមេរិក អ្នកនាំពាក្យរបស់ក្រសួងការបរទេសចិន កាលពីថ្ងៃពុធបាននិយាយថា វាជាកំហុសឆ្គងមួយ ក្នុងយុទ្ធសាស្រ្ត របស់អាមេរិកដែលចាត់ទុកចិនជាសត្រូវ។
ដោយទាត់ចោលការចោទប្រកាន់ដែលថា ចិនកំពុងធ្វើនយោបាយវាតទីនិយម អ្នកនាំពាក្យចិនអះអាងថា ចិនគ្មានបំណង ចង់ប្រជែង ឬដណ្តើមកន្លែងរបស់ប្រទេសណាទេ។ អាទិភាពរបស់ចិន គឺចង់លើកកម្រិតជីវភាពរបស់ប្រជាជនខ្លួនតែប៉ុណ្ណោះ។
រហូតមក ឥណ្ឌា មិនដែលសប្បាយចិត្ត និងមិនទុកចិត្តចិន ដែលកាន់តែពង្រីកឥទ្ធិពលនៅក្នុងតំបន់អាស៊ី។ ចិនដែលបានប្រើនយោបាយទឹកលុយ ដើម្បី ចងសម្ព័ន្ធភាព ជាមួយ ប្រទេស នៅជុំវិញ ឥណ្ឌា ដែលមានតាំង ពី ភូមា បង់ក្លាដែស ស្រីលង្កា ហើយនិងប៉ាគីស្ថាន ដែលជាបងប្អូនសត្រូវរបស់ឥណ្ឌា។ ការប៉ះទង្គិចនៅព្រំដែនបានធ្វើឲ្យភាពតានតឹង រវាងចិន និងឥណ្ឌា កើនឡើងមួយកម្រិតថែមទៀត។ នៅខែកក្កដាកន្លងទៅ ពោលគឺនៅ១ខែក្រោយ ការប៉ះទង្គិចនៅព្រំដែនជាមួយចិន កងទ័ពជើងទឹកឥណ្ឌាបានចូលរួមធ្វើសមយុទ្ធជាមួយនាវាដឹកយន្តហោះចម្បាំងរបស់អាមេរិក Nimitz។ នៅខែ កញ្ញាកន្លងទៅ ប្រទេសទាំងពីរនៅបានសហការគ្នាក្នុងផ្នែកព័ត៌មានវិទ្យាយោធាថែមទៀត។ នេះបើតាមការអះអាងរបស់រដ្ឋមន្រ្តីការពារជាតិអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ