ហុងកុង៖ សកម្មជនប្រជាធិបតេយ្យម្នាក់ទៀត ត្រូវសមត្ថកិច្ចចាប់ខ្លួន មុនពេលបាតុកម្មធំ
សកម្មជនប្រជាធិបតេយ្យហុងកុង ដ៏សំខាន់ម្នាក់ទៀត ឈ្មោះ តាំ តាក់ជី ត្រូវបានសមត្ថកិច្ចហុងកុង ចុះទៅចាប់ឃាត់ខ្លួនដល់ផ្ទះ នៅថ្ងៃអាទិត្យទី៦កញ្ញានេះ ដោយចោទពីបទ ប្រើប្រាស់ពាក្យសំដីបំបែកបំបាក់សង្គម និងសាមគ្គីជាតិ។ ការចាប់ខ្លួន សកម្មជនប្រជាធិបតេយ្យហុងកុងនេះ គឺធ្វើឡើងប៉ុន្មានម៉ោង មុននឹងមានការធ្វើបាតុកម្មធំនៅហុងកុង ដែលធម្មតាថ្ងៃនេះ គឺជាថ្ងៃបោះឆ្នោតសភាហុងកុងអាណត្តិថ្មី តែត្រូវលើកពេល ដោយសារតែបញ្ហាជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:៣៤
លោក តាំ តាក់ជី អនុប្រធានគណបក្សអំណាចប្រជាជន និងដែលជាអតីតពិធីករនិយាយវិទ្យុដ៏ល្បីម្នាក់ផង ត្រូវបានសមត្ថកិច្ចហុងកុង ចាប់ឃាតខ្លួននៅគេហដ្ឋាន ស្ថិតនៅភាគឥសានកោះហុងកុង។ ផ្អែកតាមការអះអាង របស់លោក Li Kwai Wah នាយនគរបាលហុងកុង គឺលោក តាំ តាក់ជី មិនត្រូវបានគេដាក់ឃុំបណ្តោះអាសន្នទេ។
មន្ត្រីនគរបាលហុងកុងម្នាក់នេះ បញ្ជាក់ថា លោក តាំ តាក់ជី ត្រូវជាប់ចោទពីបទ ប្រើប្រាស់ពាក្យសំដីញុះញង់ឲ្យមានការស្អប់ ខឹងមកលើរដ្ឋបាលហុងកុង និងសំដីពន្យុះកំហឹងរបស់ប្រជាជន ដែលវាធ្វើឲ្យមានការបែកបាក់សង្គមនិងសាមគ្គីជាតិ។ លោកពន្យល់ថា នគរបាលទទួលបន្ទុកច្បាប់សន្តិសុខជាតិ បានចុះទៅចាប់ខ្លួនលោក តាំ តាក់ជី ព្រោះថាពីដំបូងគឺអាជ្ញាធរ មានការសង្ស័យចោទពីបទញុះញង់ ឲ្យមានការបះបោរបំបែកទឹកដី យោងទៅលើច្បាប់សន្តិសុខជាតិថ្មី។ តែក្រោយការពិនិត្យល្អិតល្អន់ សមត្ថកិច្ច បានសម្រេចចោទ ដោយយោងលើជំពូកទី១០ នៃច្បាប់ព្រហ្មទណ្ឌហុងកុងវិញ។
គួរកត់សំគាល់ថា ការចាប់ខ្លួនសកម្មជនប្រជាធិបតេយ្យ ដ៏សំខាន់ម្នាក់ទៀតនេះ គឺវាធ្វើឡើង នៅប៉ុន្មានម៉ោង មុនមានបាតុកម្មធំ នៅហុងកុង ដើម្បីប្រឆាំងនឹងច្បាប់សន្តិសុខជាតិ។ មិនត្រឹមតែប៉ុណ្ណោះ ថ្ងៃ៦កញ្ញានេះ តាមធម្មតាគឺជាថ្ងៃបោះឆ្នោតសភាហុងកុង អាណត្តិថ្មី។ ក៏ប៉ុន្តែការបោះឆ្នោតត្រូវលើកពេល ដោយគ្មានកាលបរិច្ឆេទកំណត់ ដោយសារតែបញ្ហាកូវីដ១៩។ ប្រជាជនហុងកុង ក៏បានធ្វើការតវ៉ាផងដែរ ទាក់ទិននឹងប្រតិបត្តិការធ្វើតេស្តកូវីដ១៩ ដែលអាជ្ញាធរហុងកុង បើកដៃផ្តល់ទីផ្សារឲ្យយ៉ាងទូលាយ ទៅឲ្យក្រុមហ៊ុនចិន។ បើទោះបីជាមិនត្រូវបានអាជ្ញាធរហុងកុងអនុញ្ញាតក្តី តែការអំពាវនាវ ចូលរួមបាតុកម្មនៅថ្ងៃនេះ ត្រូវបានទទួលការគាំទ្រ ពីមនុស្សយ៉ាងហោច ១ម៉ឺននាក់ នៅលើបណ្តាញសង្គម។
សូមរំលឹកដែរថា ចាប់តាំងពីច្បាប់សន្តិសុខជាតិចិន ចូលជាធរមាននៅចុងខែមិថុនា មានមនុស្ស២១នាក់ហើយ ដែលត្រូវបានគេចាប់ខ្លួននៅហុងកុង ដោយសំអាងលើច្បាប់ថ្មីនេះ។ ក្នុងនោះមានដូចជាលោក Jimmy Lai និងកញ្ញា Anges Chow ដែលត្រូវជាប់ចោទពីបទញុះញង់ ឲ្យមានការបះបោរបំបែកទឹកដី និងសហការបម្រើផលប្រយោជន៍ឲ្យបរទេស។ សកម្មជនប្រជាធិបតេយ្យ និងប្រជាជនហុងកុងពីគ្រប់មជ្ឈដ្ឋាន បានបរិហារថា ច្បាប់នេះគឺជាច្បាប់ ដែលមកសម្លាប់សិទ្ធិសេរីភាពរបស់ប្រជាជនហុងកុង។ តែយ៉ាងណា អាជ្ញាធរហុងកុង អះអាងថា ច្បាប់សន្តិសុខជាតិនេះ គ្មានកម្មវត្ថុមករារាំងសិទ្ធិសេរីភាព ក្នុងការបញ្ចេញមតិ និងសិទ្ធិសេរីភាពជួបជុំទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ