ហុងកុង៖ ជិត៣០០នាក់ត្រូវចាប់ខ្លួន ក្នុងបាតុកម្មប្រឆាំងនឹងការលើកពេលបោះឆ្នោតសភា
កាលពីថ្ងៃអាទិត្យទី៦កញ្ញា ប្រជាជនហុងកុង ជាច្រើនម៉ឺននាក់ បាននាំគ្នាធ្វើបាតុកម្ម ដើម្បីប្រឆាំងនឹងច្បាប់សន្តិជាតិចិនផង ព្រមទាំងប្រឆាំងនឹងការលើកពេលបោះឆ្នោតសភា ដែលតាមធម្មតា គឺត្រូវធ្វើនៅថ្ងៃទី៦កញ្ញានេះតែម្តង។ ដោយសំអាងលើការបង្ការការឆ្លងរាលដាល ជំងឺកូវីដ១៩ ការជួបជុំបាតុកម្ម មិនត្រូវបានអាជ្ញាធរហុងកុងអនុញ្ញាតទេ។ យ៉ាងហោចណាស់ មានមនុស្សជិត៣០០នាក់ ត្រូវបានសមត្ថកិច្ចចាប់ឃាត់ខ្លួន។
ចុះផ្សាយនៅថ្ងៃ៖
ស្តាប់ - ០២:២៧
ជម្ងឺកូវីដ១៩ ហាក់មិនបានធ្វើឲ្យប្រជាជនហុងកុង មានការភ័យខ្លាចនោះទេ។ សេចក្តីស្រេកឃ្លានចង់បានសិទ្ធិសេរីភាព និងលទ្ធិប្រជាធិបតេយ្យ មានទំហំធំក្រៃ ដែលធ្វើឲ្យប្រជាជនហុងកុងជាច្រើនម៉ឺននាក់ បានចេញធ្វើបាតុកម្ម នៅថ្ងៃអាទិត្យទី៦កញ្ញា បើទោះបីជាដឹង ថាត្រូវប្រឈមនឹងការរារាំងរបស់នគរបាលក្តី។
ថ្ងៃទី៦កញ្ញាដែលតាមធម្មតា គឺជាថ្ងៃបោះឆ្នោតសភាហុងកុង អាណត្តិថ្មី។ ក៏ប៉ុន្តែ កាលពីថ្ងៃទី៣១ កក្កដា លោកស្រី ការីឡាំ ប្រមុខដឹកនាំហុងកុង បានប្រកាសថា ការបោះឆ្នោតនេះ នឹងលើកទៅឆ្នាំក្រោយ ដោយសារតែមូលហេតុជំងឺឆ្លង កូវីដ១៩។ ការសម្រេចនេះ បានធ្វើឲ្យប្រជាជនហុងកុង កាន់តែខឹងក្រេវក្រោធ ដោយពួកគេយល់ថា ប៉េកាំងព្រមទាំងបក្សពួក កំពុងតែចង់បំបិទ មិនឲ្យប្រជាជនហុងកុង អាចសម្តែងមតិតាមការបោះឆ្នោតបាន។
នៅពេញមួយរសៀលថ្ងៃអាទិត្យ ទី៦កញ្ញា បាតុករហុងកុង បានស្រែកតវ៉ា នៅម្តុំសង្កាត់ កូវលុន មានអ្នកខ្លះ លើកបដាសរសេរទាមទារថា ត្រូវតែសងសន្លឹកឆ្នោត មកឲ្យប្រជាជនហុងកុងវិញ ហើយអ្នកខ្លះទៀត សរសេរថា នគរបាលហុងកុងពុករលួយ។
លើទំព័រ Facebook នគរបាលហុងកុង បានប្រកាសថា បានចាប់ឃាត់ខ្លួន មនុស្សចំនួន ២៨៩នាក់ ពីបទធ្វើសកម្មភាពបាតុកម្មហិង្សា ដោយគ្មានការអនុញ្ញាត។ ក្នុងនោះ មានស្ត្រីម្នាក់ដែលបានស្រែកទាមទារឯករាជ្យ ត្រូវជាប់ឃុំបណ្តោះអាសន្ន ដោយយោងលើច្បាប់សន្តិសុខជាតិ។ យោងតាមវីដេអូ ផ្សាយផ្ទាល់តាមបណ្តាញសង្គម គេឃើញសមត្ថកិច្ច បានចាប់ឃាត់ខ្លួន សកម្មជនប្រជាធិបតេយ្យសំខាន់ៗ ចំនួន៣នាក់ គឺលោក Leung Kwok-hung Figo Chan និង Raphael Wong។
អ្នកនាំពាក្យរដ្ឋបាលហុងកុង បានលើកឡើងថា កម្មវត្ថុរបស់អាជ្ញាធរ គឺធ្វើយ៉ាងណា ការពារសុខភាពប្រជាជន ពីការឆ្លងរាលដកូវីដ១៩ តែផ្ទុយទៅវិញ ក្រុមបាតុករបែរជាធ្វើអំពើអត្មានិយម គ្មានការទទួលខុសត្រូវ។
គួរបញ្ជាក់ដែរថា នៅព្រឹកថ្ងៃទី៦កញ្ញា មុននឹងបាតុកម្មបានចាប់ផ្តើម សមត្ថកិច្ចហុងកុង បានចាប់ឃាត់ខ្លួនសកម្មជនប្រជាធិបតេយ្យ និងជាពិធីករវិទ្យុម្នាក់ ឈ្មោះ តាំ តាក់ជី ពីបទប្រើប្រាស់ពាក្យសំដីបំបាក់បំបែកសង្គមជាតិ។ ចំណែកកាលពីថ្ងៃសុក្រ កន្លងទៅ អ្នករាយការណ៍ពិសេសរបស់អង្គការសហប្រជាជាតិ បានលើកឡើងថា ច្បាប់សន្តិសុខជាតិចិន គឺជាគ្រោះមហន្តរាយ ដល់សិទ្ធិសេរីភាព នៃដែនដីស្វ័យយត្នហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ