ជប៉ុន៖ លោកស៊ិនហ្សូ អាបេ សម្រេចលាលែងពីតំណែង ដោយសារមានជំងឺប្រចាំកាយ
លោកនាយករដ្ឋមន្ត្រីជប៉ុន ស៊ិនហ្សូ អាបេ បានប្រកាសនៅថ្ងៃទី២៨សីហា ថាលោកបានសម្រេចចិត្ត លាលែងចេញពីតំណែង ដោយសារតែលោក មិនអាចបំពេញមុខងារនេះ ឲ្យបានពេញលេញបានទេ ព្រោះលោកមានជំងឺប្រចាំកាយ។ ការប្រកាសរបស់លោក ស៊ិនហ្សូ អាបេ នេះ បានបង្កឲ្យមានការភ្ញាក់ផ្អើលជាខ្លាំង ខណៈដែលអំឡុងពេលនេះ ជប៉ុនកំពុងឆ្លងកាត់វិបត្តិសេដ្ឋកិច្ច ព្រមទាំងវិបត្តិសុខភាពសាធារណៈ បណ្តាលមកពីជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:៣៩
ក្រោយពីចប់ការប្រជុំបន្ទាន់ នៃថ្នាក់ដឹកនាំគណបក្សប្រជាធិបតេយ្យសេរី លោកស៊ិនហ្សូ អាបេ បានចេញមកថ្លែងប្រាប់អ្នកកាសែត នៅល្ងាចថ្ងៃសុក្រទី២៨សីហាថា លោកបានសម្រេចចិត្ត លាលែងចេញពីតំណែងនាយករដ្ឋមន្ត្រី។ លោកបានលើកឡើងថា បញ្ហាសុខភាព ជំងឺប្រចាំកាយរបស់លោក គឺវាបានធ្វើឲ្យលោកគិតថា លោកមិនអាចបំពេញនាទីការងារដ៏ធំនេះ ឲ្យពេញលេញបានទេ។
លោកបានថ្លែងសុំទោស ចំពោះប្រជាជនជប៉ុន ដែលលោកបានសម្រេចចិត្តលាឈប់ពីតំណែង មុនចប់អាណត្តិបែបនេះ ទាំងដែលកាលៈទេសៈពេលនេះ ប្រទេសជាតិ កំពុងតែជួបវិបត្តិធ្ងន់ធ្ងរ ដោយសារ កូវីដ១៩។ តែលោកអះអាងថា លោកនឹងប្រឹងប្រែង បន្តការងារនេះឲ្យអស់ពីសមត្ថភាព ទំរាំដល់ថ្ងៃ ដែលនាយករដ្ឋមន្ត្រីថ្មី នឹងត្រូវតែងតាំងជាផ្លូវការ។
គួររំលឹកដែរ កាលពីសប្តាហ៍មុន លោកស៊ិនហ្សូ អាបេ បានចូលមន្ទីរពេទ្យចំនួន២ដង ដោយគេសង្កេតឃើញ រូបលោកមានអការៈស្គម ស្លេកស្លាំង។ លោក Yoshihide Suga អ្នកនាំពាក្យរដ្ឋាភិបាល បានព្យាយាមរំងាប់ពាក្យចចាមអារ៉ាម ដោយអះអាងថាលោកអាបេ ទៅពេទ្យដើម្បី ធ្វើតេស្តពិនិត្យសុខភាព ធម្មតាប៉ុណ្ណោះ។
សូមបញ្ជាក់ថា យោងតាមការផ្សាយរបស់បណ្តាញទូរទស្សន៍ NHK គឺលោកស៊ិនហ្សូ អាបេ មានជំងឺរលាកពោះវៀនធ្ងន់ធ្ងរ ដែលតម្រូវឲ្យលោកទទួលការព្យាបាល និងសម្រាកឲ្យបានច្រើនបំផុត។ វាគឺជាជំងឺចាស់ ដែលលោកធ្លាប់បានឈឺធ្ងន់ម្តងរួចមកហើយ កាលពីឆ្នាំ២០០៧ ដែលកាលនោះ លោកក៏បាន សម្រេចចិត្តលាលែងពីតំណែងនាយករដ្ឋមន្ត្រីដែរ បន្ទាប់ពីបានឈ្នះឆ្នោតបាន១ឆ្នាំ។
គួរកត់សំគាល់ថា លោកស៊ិនហ្សូ អាបេ បច្ចុប្បន្នអាយុ៦៥ឆ្នាំ គឺជានាយករដ្ឋមន្ត្រីដែលបានកាន់តំណែងនេះជាប់ពីឆ្នាំ២០១២មក ហើយជារយៈពេលយូរជាងគេ។ ក៏ប៉ុន្តែប៉ុន្មានខែចុងក្រោយនេះ ប្រជាប្រិយភាពរបស់លោក បានធ្លាក់ចុះខ្លាំងណាស់។ យ៉ាងណាក៏ដោយ ការប្រកាសលាលែងចេញពីតំណែងនាពេលនេះ បានបង្កការភ្ញាក់ផ្អើលខ្លាំង នៅក្នុងចំណោមប្រជាជនសាមញ្ញ ក៏ដូចជាអ្នកនយោបាយជប៉ុន។ លោកស្រី Tomomi Inada សាមជិកបក្សប្រជាធិបតេយ្យសេរី បានថ្លែងថាលោកស្រី មិននឹកស្មានថា លោកអាបេ សម្រេចលាឈប់ យ៉ាងតក់ក្រហល់បែបនេះទេ។
លោក Shinichi Nashikawa សាស្ត្រាចារ្យនៅសកលវិទ្យាល័យម៉ីជីតូក្យូ បានលើកឡើងថា ដំណឹងដ៏ភ្ញាក់ផ្អើលនេះ នឹងធ្វើឲ្យរញ្ជួយឆាកនយោបាយជប៉ុន ខណៈដែលពេលនេះ ជប៉ុនកំពុងឆ្លងកាត់វិបត្តិសេដ្ឋកិច្ចធ្ងន់ធ្ងរ។ តាមការគ្រោងទុក គណបក្សប្រជាធិបតេយ្យសេរី នឹងត្រូវប្រជុំគ្នា បោះឆ្នោតរើសមនុស្សថ្មីមកជំនួសលោកអាបេ។ តាមការវិភាគ លោក តារ៉ូ អាសូ បច្ចុប្បន្នជាឧបនាយករដ្ឋមន្ត្រី រដ្ឋមន្ត្រីក្រសួងហិរញ្ញវត្ថុ និងជាមនុស្សស្និទនឹងលោកអាបេ អាចនឹងត្រូវគេតែងតាំង ឲ្យធ្វើជានាយករដ្ឋមន្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ