កូរ៉េខាងត្បូង និងអាមេរិកផ្តើមសមយុទ្ធយោធា ខណៈដែលករណីឆ្លងជំងឺកូវីដ-១៩ កំពុងកើនឡើង
នៅថ្ងៃអង្គារ ទី១៨ សីហា កូរ៉េខាងត្បូង និងសហរដ្ឋអាមេរិកចាប់ផ្តើមសមយុទ្ធយោធាប្រចាំឆ្នាំរួមគ្នា និងត្រូវបន្តរហូតដល់ថ្ងៃទី២៨ សីហា។ តាមគម្រោង សមយុទ្ធនេះត្រូវរៀបចំធ្វើតាំងពីថ្ងៃអាទិត្យ ទី១៦ សីហា តែត្រូវបានលើកពេលដោយសារតែករណីឆ្លងជំងឺកូវីដ-១៩ បានស្ទុះឡើងគួរឲ្យព្រួយបារម្ភ។ កូរ៉េខាងជើងនៅមិនទាន់បញ្ចេញប្រតិកម្មយ៉ាងណាទេ តែកន្លងមក ក្រុងព្យុងយ៉ាងតែងសម្តែងការមិនសប្បាយចិត្តចំពោះសមយុទ្ធរបៀបនេះដែលខ្លួនចាត់ទុកជាការរៀបចំជើងព្រួលដើម្បីវាយលុកចូលទឹកដីកូរ៉េខាងជើង។
ចុះផ្សាយនៅថ្ងៃ៖
ស្តាប់ - ០២:០៨
សមយុទ្ធយោធារវាងសហអាមេរិក និងកូរ៉េខាងត្បូងជាសមយុទ្ធមួយដែលសម្ព័ន្ធមិត្តទាំងពីរតែងរៀបចំធ្វើឡើងជារៀងរាល់ឆ្នាំ និងតែងធ្វើឲ្យកូរ៉េខាងជើងក្តៅក្រហាយគ្រប់ពេល។ មានការកត់សម្គាល់ចំនួនពីរសម្រាប់សមយុទ្ធឆ្នាំ ២០២០ នេះ ទី១ វាបានធ្វើឡើងនៅក្នុងបរិបទនៃភាពតានតឹងរវាងកូរ៉េខាងត្បូង និងកូរ៉េខាងជើង បន្ទាប់ពីក្រុងព្យុងយ៉ាងបានកម្ទេចនាវាទំនាក់ទំនងជាមួយកូរ៉េខាងត្បូងក្នុងខែមិថុនាកន្លងទៅ និងទី២ វាបានរៀបចំឡើងក្នុងពេលដែលកូរ៉េខាងត្បូងកំពុងស្គាល់កំណើនករណីឆ្លងជំងឺកូវីដ-១៩ នារយៈពេលប៉ុន្មានថ្ងៃចុងក្រោយនេះ។ ក្រោមភ្នែក ច្រមុះរបស់ក្រុងព្យុងយ៉ាង សមយុទ្ធនេះជាការហ្វឹកហាត់ ត្រៀមកម្លាំងដើម្បីចូលឈ្លានពានទឹកដីកូរ៉េខាងជើង។
តែអគ្គសេនាធិការអាមេរិកបានបញ្ជាក់នៅក្នុងសេចក្តីប្រកាសព័ត៌មានថា សមយុទ្ធដែលត្រូវបន្តរហូតដល់ថ្ងៃទី២៨ សីហាមានកម្មវត្ថុរក្សាប្រព័ន្ធការពារអន្តរកងទ័ពនៃប្រទេសទាំងពីរ។ តាមរូបអគ្គសេនាធិការអាមេរិកដដែល ការសម្រេចរៀបចំសមយុទ្ធពេលនេះបានធ្វើឡើង បន្ទាប់ពីបានគិតគូរ ពិចារណាលើបញ្ហាជាក់ស្តែងមួយចំនួន ដូចយ៉ាងស្ថានភាពទាក់ទងនឹងករណីជំងឺកូវីដ-១៩។ តាមពិតទៅ ក្រុងសេអ៊ូល និងក្រុងវ៉ាស៊ីនតោនគ្រោងរៀបចំសមយុទ្ធរួមគ្នាតាំងពីថ្ងៃទី១៦ សីហា តែបានលើកពេលមកដល់ពេលនេះ បន្ទាប់ពីមានផ្ទុះកំណើនករណីឆ្លងជំងឺកូវីដ-១៩ ថ្មីច្រើនជាង ១០០នាក់ក្នុងរយៈពេល ៥ថ្ងៃជាប់គ្នា។ គិតត្រឹមថ្ងៃអង្គារ ទី១៨ សីហា កូរ៉េខាងត្បូងមានករណីឆ្លងថ្មីចំនួន ២៤៦ករណី ហើយបើគិតសរុបតាំងពីដើមខែកុម្ភៈមក គឺមានអ្នកឆ្លងកូវីដ--១៩ ចំនួន ១៥ ៧៦១នាក់។
គួររម្លឹកថា តាំងពីបរាជ័យនៃជំនួបកំពូលលើកទី២ រវាងមេដឹកនាំកូរ៉េខាជើងលោកគីម ជុងអ៊ុន និងប្រធានាធិបតីអាមេរិកលោកដូណាល់ ត្រាំនាខែកុម្ភៈក្នុងទីក្រុងហាណូយ ប្រទេសវៀតណាមមក ទំនាក់ទំនងរវាងបងប្អូនបង្កើតគូសត្រូវទាំងពីរកូរ៉េខាងជើង និងខាងត្បូងហាក់កំពុងស្គាល់ភាពតានតឹងមកដល់សព្វថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ