ចំនួនសត្វខ្លានៅទូទាំងពិភពលោកចាប់កើនឡើងវិញ តែខ្លានៅអាស៊ីអាគ្នេយ៍នៅតែស្ថិតក្នុងគ្រោះថ្នាក់
អង្គការ WWF បានឲ្យដឹង កាលពីថ្ងៃពុធថា ចំនួនសត្វខ្លាបានកើនឡើងវិញ នៅក្នុងប្រទេសចំនួន ៥ ក៏ប៉ុន្តែ បើទោះបីជាយ៉ាងនេះក៏ដោយ គិតជាលក្ខណៈទូទៅ ខ្លាំដែលគេចាត់បញ្ចូលជាពូជសត្វដែលកំពុងប្រឈមនឹងការស្លាប់ផុតពូជនោះ នៅតែស្ថិតនៅក្នុងស្ថានភាពគ្រោះថ្នាក់ធ្ងន់ធ្ងរដដែល ជាពិសេស គឺនៅក្នុងតំបន់អាស៊ីអាគ្នេយ៍។
ចុះផ្សាយនៅថ្ងៃ៖
ក្រោយពីបានធ្លាក់ចុះរហូតដល់កម្រិតទាបបំផុត កាលពីឆ្នាំ២០១០ ចំនួនសត្វខ្លា នៅក្នុងប្រទេសចំនួន ៥ រួមមាន ចិន រុស្ស៊ី ប៊ូតង់ នេប៉ាល់ និងឥណ្ឌា បានចាប់ផ្តើមកើនឡើងមកវិញ គួរឲ្យកត់សម្គាល់។ នេះបើយោងតាមសេចក្តីថ្លែងការណ៍របស់អង្គការ WWF ចេញផ្សាយ កាលពីថ្ងៃពុធ។
នេះអាចរាប់ថាជាដំណឹងល្អមួយ សម្រាប់ពូជសត្វ ដែលកំពុងប្រឈមនឹងការស្លាប់ផុតពូជ។ ក៏ប៉ុន្តែ ក្នុងពេលជាមួយគ្នា អង្គការ WWF ក៏បានបញ្ជាក់ផងដែរថា ពូជសត្វខ្លានៅតែស្ថិតក្នុងគ្រោះថ្នាក់ដដែល ជាពិសេស គឺគ្រោះថ្នាក់បង្កឡើងដោយការបរបាញ់ខុសច្បាប់ និងការបាត់បង់ព្រៃឈើ ដែលជាទីជម្រក។
នៅតាមតំបន់ខ្លះ រួមទាំងក្នុងប្រទេសដែលមានចំនួនសត្វខ្លាកើនឡើងនេះផង គេឃើញថា ថ្វីដ្បិតតែព្រៃជាជម្រកខ្លានៅមាន តែមានជាជម្រកតូចៗ ហើយពីជម្រកមួយទៅជម្រកមួយទៀត ត្រូវកាត់ផ្តាច់ពីគ្នា ដោយសារគម្រោងអភិវឌ្ឍន៍នានា ដូចជា ការសាងសង់ហេដ្ឋារចនាសម្ព័ន្ធ ការធ្វើអាជីវកម្មរ៉ែ ឬការកាប់ព្រៃយកដីធ្វើកសិកម្ម ជាដើម។
ការបាត់បង់ទីជម្រក ឬការស្ថិតនៅក្នុងជម្រកជាតំបន់តូចៗដាច់ពីគ្នាបែបនេះហើយ ដែលជាឧបសគ្គចម្បង មិនអាចឲ្យពូជសត្វខ្លាអាចរីកលូតលាស់បាន។ ហើយបើយោងតាមអង្គការ WWF ខ្លានៅក្នុងតំបន់អាស៊ីអាគ្នេយ៍ ដែលកំពុងស្ថិតក្នុងស្ថានភាពគ្រោះថ្នាក់ គួរឲ្យបារម្ភខ្លាំង ដោយនៅក្នុងនោះ ប្រទេសខ្លះ ដូចជា ភូមា ជាដើម ចំនួនខ្លាធ្លាក់ចុះមកនៅត្រឹមប្រមាណជា ២០ក្បាល ចំណែកឯប្រទេសខ្លះទៀត រួមមាន កម្ពុជា ឡាវ និងវៀតណាម ខ្លាត្រូវបាត់មុខលែងឃើញមានទាំងស្រុង។
គួរបញ្ជាក់ថា នៅក្នុងតំបន់អាស៊ីអាគ្នេយ៍នេះ ចំនួនសត្វខ្លា ដែលគេប៉ាន់ស្មានថាមានរហូតដល់ទៅប្រមាណជា ១០ម៉ឺនក្បាល កាលពីមួយសតវត្សរ៍មុន បានធ្លាក់ចុះមកនៅមិនដល់ ៤ពាន់ក្បាលផង នៅក្នុងពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ