ក្រោមឥទ្ធិពលច្បាប់សន្តិសុខជាតិ ពលរដ្ឋហុងកុងនាំគ្នាប្រុងប្រយ័ត្នពាក្យសំដី លើបណ្តាញសង្គម
ក្រោយការចូលជាធរមាន នូវច្បាប់ស្តីពីសន្តិសុខជាតិ ដែលប៉េកាំង បានដាក់មកលើដែនដីហុងកុង ប្រជាពលរដ្ឋហុងកុង មួយចំនួនធំ បានចាប់ផ្តើម បង្កើនការប្រុងប្រយ័ត្នខ្ពស់ នៅតាមបណ្តាញសង្គមរៀងៗខ្លួន ដោយត្រូវចៀសវាងនិយាយអ្វី ដែលអាចធ្វើឲ្យគេចាប់កំហុសបាន។ អ្នកខ្លះបានលុបនូវអ្វីដែលខ្លួនបានសរសេរពីមុនមក ឬអ្នកខ្លះបានលប់គណនីបណ្តាញសង្គមចោលតែម្តង។
ចុះផ្សាយនៅថ្ងៃ៖
ស្តាប់ - ០២:៣៦
ឥទ្ធិពលនៃច្បាប់សន្តិសុខជាតិ ក្នុងការបំភ័យប្រជាពលរដ្ឋហុងកុង ឲ្យឈប់និយាយអ្វីប៉ះពាល់ដល់ការដឹកនាំរបស់បក្សកុម្មុយនីស្តចិន កំពុងតែហុចផ្លែផ្កាហើយ។ ប្រជាពលរដ្ឋហុងកុង ទាំងសកម្មជនប្រឆាំងចេញមុខ ទាំងអ្នកមិនចេញមុខ ភាគច្រើនបានអះអាងថាចាប់ពីពេលនេះទៅ ពួកគេត្រូវបង្កើនការប្រុងប្រយ័ត្ន នៅតាមបណ្តាញសង្គម ដើម្បីកុំឲ្យគេចាប់កំហុសបាន។
អ្នកខ្លះបានប្តូរឈ្មោះគណនី អ្នកខ្លះបានលុបសារចាស់ៗចោលទាំងអស់ អ្នកខ្លះទៀត បានលប់គណនីចោលតែម្តង មិនថានៅលើ បណ្តាញTwitter WhatsApp ឬTelegram។ ចំណែកមនុស្សមួយចំនួន បានផ្ទេរគណនីខ្លួន ទៅកាន់បណ្តាញ Signal ដែលគេល្បីថារឹងមាំល្អ ឬប្រើប្រាស់ប្រព័ន្ធឯកជនបិទជិត VPN។ បុគ្គលិក្រុមហ៊ុនហុងកុងម្នាក់ ដោយសុំមិនបញ្ចេញឈ្មោះ បានលើកឡើងថា ខ្លួនត្រូវតែប្រុងប្រយ័ត្នចាប់ពីពេលនេះទៅ មុននឹងនិយាយឬសរសេរអ្វីលើបណ្តាញសង្គម ព្រោះថាបុគ្គលិគផ្សេងទៀត មិត្តភ័ក្ត្រ និងក្រុមហ៊ុនផង អាចរាយការណ៍ទៅនគរបាល ដើម្បីចាប់កំហុស។
នៅលើបណ្តាញ Telegram អ្នកចាត់ចែងក្រុមជជែកគ្នាជាច្រើន បានផ្ញើសារទៅប្រាប់សមាជិកដ៏ទៃ ឲ្យប្រុងប្រយ័ត្នចំពោះសំណេរពាក្យសំដី។ អ្នកខ្លះបានសម្រេចលុបក្រុមជជែក Telegram ចោលតែម្តង។ សកម្មជនប្រជាធិបតេយ្យម្នាក់ ដែលតែងទាក់ទងសារឆ្លងឆ្លើយ ជាមួយអ្នកកាសែតបារាំង AFP បានផ្ញើសារសុំឲ្យសុំឲ្យ លប់សារឆ្លងឆ្លើយពីមុនមកចោលឲ្យអស់។
Billie យុវជនហុងកុង អាយុ២៤ឆ្នាំម្នាក់ បានលើកឡើងថា លោកខ្មាសខ្លួនឯងណាស់ ដែលត្រូវលាក់អត្តសញ្ញាណខ្លួនឯង និងត្រូវលប់ចោលនូវអ្វីដែលខ្លួនបានសរសេរពីមុនមក នៅលើបណ្តាញសង្គម តែលោកគ្មានជម្រើសទេ ព្រោះនេះជារឿងស្លាប់រស់ ចាប់ពីពេលនេះទៅ។
គួរបញ្ជាក់ថា កាលពីថ្ងៃព្រហស្បតិ៍ ទី២កក្កដា គណៈមេធាវីហុងកុង បានចេញលិខិតមួយ ថ្លែងការព្រួយបារម្ភ ទាក់ទិននឹងខ្លឹមសារធំទូលាយជ្រុល នៃច្បាប់ស្តីពីសន្តិសុខជាតិ។ ភាពទូលំទូលាយជ្រុលនេះ នឹងធ្វើឲ្យពលរដ្ឋហុងកុង មានការខ្លបខ្លាច បិទមាត់លែងហ៊ានបញ្ចេញមតិយោបល់ នៅតាមបណ្តាញសង្គម ព្រោះគេអាចយកទៅបកស្រាយ ចាប់កំហុសដាក់ទោសបានយ៉ាងងាយ។
គួរកត់សំគាល់ដែរថា ក្រោយការចូលជាធរមាននូវច្បាប់ថ្មីនេះ មិនត្រឹមតែនៅលើបណ្តាញសង្គមទេ ដែលប្រជាជនហុងកុង មានការភ័យបារម្ភ និងប្រុងប្រយ័ត្ន សូម្បីតែនៅក្នុងជីវភាពជាក់ស្តែងប្រចាំថ្ងៃ ក៏មានការប្រែប្រួលដែរ។ លោក Gordon Lam សកម្មជនប្រជាធិបតេយ្យម្នាក់ បានអះអាងថា ភោជនីយដ្ឋាន ហាងទំនិញនៅហុងកុង បានចាប់ផ្តើម ដោះបោះចោលនូវបដា ឬខិតបណ្ណដែលមានសរសេរសារគាំទ្រប្រជាធិបតេយ្យ ដែលគេបិទនៅលើជញ្ជាំង មិនថាក្នុង ឬក្រៅហាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ