ចិននឹងចូលជាសមាជិកសន្ធិសញ្ញាស្តីពីការធ្វើពាណិជ្ជកម្មអាវុធ
ចិន ប្រទេសអ្នកផលិតអាវុធលំដាប់ទីពីរពិភពលោកបន្ទាប់ពីសហរដ្ឋអាមេរិក បានប្រកាសនៅថ្ងៃចន្ទទី ២២មិថុនា ២០២០ ថានឹងចូលជាសមាជិកសន្ធិសញ្ញាធ្វើពាណិជ្ជកម្មអាវុធ (TCA)។ សេចក្តីសម្រេចនេះ ជាការពង្រឹងសន្តិភាពនៅលើភពផែនដី។ នេះបើតាមការអះអាងរបស់ប៉េកាំង។
ចុះផ្សាយនៅថ្ងៃ៖
ស្តាប់ - ០២:០៤
“គណៈកម្មការអចិន្ត្រៃយ៍សភាប្រជាជនបានអនុម័តកាលពីថ្ងៃសៅរ៍ ទី ២០មិថុនា២០២០ ភ្ជាប់ប្រទេសទៅនឹងសន្ធិសញ្ញាស្តីពីពាណិជ្ជកម្មអាវុធ។ សេចក្តីសម្រេចនេះ ជាវិធានការដ៏សំខាន់មួយ ដែលបញ្ជាក់ថាចិនគាំទ្រនយោបាយពហុជាតិនិយម”។ នេះបើតាមសេចក្តីប្រកាសរបស់អ្នកនាំពាក្យក្រសួងការបរទេសចិនទៅកាន់អ្នកសារព័ត៌មាននៅថ្ងៃចន្ទទី ២២មិថុនា ដោយបន្ថែមទៀតថា « ចិន នឹងបន្តកិច្ចខិតខំប្រឹងប្រែងរក្សានិងពង្រឹងសន្តិភាព ស្ថិរភាពនៅក្នុងតំបន់និងនៅលើពិភពលោក”។ អ្នកនាំពាក្យក្រសួងការបរទេសចិនដដែលនេះ បានឆ្លៀតបញ្ជាក់ថា តាំងពីដើមមក មហាយក្សចិនតែងតែត្រួតពិនិត្យយ៉ាងហ្មត់ចត់បំផុតការនាំចេញ (លក់) សព្វាវុធ។
សន្ធិសញ្ញាធ្វើពាណិជ្ជកម្មអាវុធ ត្រូវបានអនុម័តដោយអង្គការសហប្រជាជាតិ នៅថ្ងៃទី២មេសាឆ្នាំ២០១៣ និងចូលជាធរមាននៅឆ្នាំ២០១៤។ គិតមកទល់នឹងឆ្នាំ២០១៩ មានប្រទេសចំនួន១០៥បានផ្តល់សច្ចាប័ន ក្នុងចំណោមប្រទេសហត្ថលេខីជាង១៣០ប្រទេស។ តាមរយៈសន្ធិសញ្ញាស្តីពីការធ្វើពាណិជ្ជកម្មអាវុធនេះ ប្រទេសហត្ថលេខី មានកាតព្វកិច្ចត្រូវផ្ទៀងផ្ទាត់និងធានាថាពាណិជ្ជកម្មអាវុធរបស់ខ្លួន គ្មានហានិភ័យជាប់ពាក់ព័ន្ធនឹងការពង្វាងទណ្ឌកម្មអន្តរជាតិ ឬការពង្វាងលក់ទៅឱ្យពួកឧក្រិដ្ឋជន ឬក្រុមប្រព្រឹត្តអំពើហិង្សារំលោភសិទ្ធិមនុស្ស។ អាវុធដែលអាចធ្វើពាណិជ្ជកម្មមានចែងក្នុងសន្ធិសញ្ញា រាប់មានតាំងពីប្រភេទ កាំភ្លើងខ្លីធម្មតា រហូតដល់យន្តហោះ និងនាវាចម្បាំង ព្រមទាំងអាវុធមីស៊ីលទៀត។
បើតាមរបាយការណ៍របស់វិទ្យាស្ថានស្រាវជ្រាវសន្តិភាពអន្តរជាតិ ហៅកាត់ថា Sipri ចេញផ្សាយកាលពីខែមករាឆ្នាំ២០២០ ចិនជាប់ឈ្មោះជាប្រទេសអ្នកផលិតអាវុធលំដាប់ទីពីរពិភពលោកបន្ទាប់ពីសហរដ្ឋអាមេរិក។
សហរដ្ឋអាមេរិកដែលប្រទេសអ្នកផលិតនិងលក់អាវុធលំដាប់លេខមួយពិភពលោក ក្រោមការដឹកនាំរបស់លោកបារ៉ាក់អូបាម៉ា បានចុះហត្ថលេខាភ្ជាប់ខ្លួនទៅនឹងសន្ធិសញ្ញាស្តីពីពាណិជ្ជកម្មអាវុធដែរ ប៉ុន្តែមិនដែលបានផ្តល់សច្ចាប័នទេ។ នៅឆ្នាំ២០១៩ ប្រធានាធិបតីអាមេរិក លោក ដូណាល់ ត្រាំ ដែលមិនទុកចិត្តលើគ្រប់សន្ធិសញ្ញាអន្តរជាតិ បានប្រកាសដកខ្លួនចេញពីសន្ធិសញ្ញាធ្វើពាណិជ្ជកម្មអាវុធនេះទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ