ប្រជាជនហុងកុងជួបជុំគ្នារំលឹកខួប បង្រ្កាបបាតុកម្មនៅទីលានធានអានមិន បើទោះបីគ្មានការអនុញ្ញាត
កាលពីល្ងាចថ្ងៃទី៤មិថុនា ដែលជាថ្ងៃរំលឹកខួបទី៣១ នៃការបង្រ្កាបបាតុកម្មនៅទីលានធានអានមិន ប្រជាជនហុងកុងរាប់ពាន់នាក់ បានប្រថុយបំពាននឹងការហាមឃាត់ ដើម្បីជួបជុំគ្នារំលឹកវិញ្ញាណក្ខន្ធបាតុករដែលបានស្លាប់កាលពីឆ្នាំ១៩៨៩ នៅទីលានធានអានមិនទីក្រុងប៉េកាំង។ វាគឺជាការរំលឹកខួប ដែលស្ថិតក្នុងបរិបទមួយដ៏តានតឹងបំផុត រវាងហុងកុងនឹងប៉េកាំង។ សមត្ថកិច្ចហុងកុង បានបំបែកការជួបជុំនេះ ដោយមានប៉ះទង្គិចគ្នាខ្លះ ជាមួយក្រុមបាតុករ ដែលភាគច្រើនជាយុវជន។
ចុះផ្សាយនៅថ្ងៃ៖
ស្តាប់ - ០២:៣៨
ជារៀងរាល់ឆ្នាំ នៅថ្ងៃទី៤មិថុនា ប្រជាជនហុងកុង តែងតែជួបជុំគ្នា ដើម្បីរំលឹកវិញ្ញានក្ខន្ធដល់អ្នកស្លាប់ ក្នុងហេតុការណ៍បង្រ្កាបបាតុកម្មនៅទីលានធានអានមិន ឆ្នាំ១៩៨៩។ តែឆ្នាំនេះ ការជួបជុំនៅហុងកុងត្រូវបានអាជ្ញាធរហាមឃាត់ ក្រោមហេតុផលបង្ការការឆ្លងរាលដាល នៃមេរោគកូរ៉ូណាថ្មី។
ទោះជាយ៉ាងនេះក្តី ប្រជាជនហុងកុងរាប់ពាន់នាក់បានចេញមកជួបជុំគ្នា ក្នុងបរិយាកាសស្ងប់ស្ងាត់ និងស្មឹងស្មាត នៅវេលាម៉ោងប្រមាណ៨យប់។ ពាក់អាវយឺតខ្មៅ ដែលមានសរសេរអក្សរពីលើថា « ការពិត » ប្រជាជនហុងកុងបានអុជទៀនពណ៌ស ដើម្បីជាការឧទ្ទិស ដល់វិញ្ញានក្ខន្ធរបស់អ្នកស្លាប់នៅទីលានធានអានមិន ដែលបានពលីជីវិត ដើម្បីសិទិ្ធសេរីភាព និងលទ្ធិប្រជាធិបតេយ្យ។
នៅសង្កាត់ ម៉ុងកុក ដែលជាសង្កាត់ជំនួញ នគរបាលហុងកុង បានធ្វើការបំបែកក្រុមបាតុករ ដោយចោទថាពួកគេ បានរារាំងការធ្វើចរាចរណ៍តាមផ្លូវសាធារណៈ។ សមត្ថកិច្ចហុងកុង បានប្រើឧស្ម័នបង្ហូរទឹកភ្នែក និងបានឃាត់ខ្លួនមនុស្សជាច្រើននាក់។ នៅទីលានវិកតូរីយ៉ា កណ្តាលក្រុងហុងកុងវិញ មនុស្សម្នា បានរុះរើរនាំ ដែលសមត្ថិកិច្ចដាក់ឃាំងជុំវិញទីលាន ហើយបាននាំគ្នាចូលទៅអង្គុយ ជុំគ្នានៅក្នុងទីលាននោះ។
បុរសចំណាស់វ័យ៧៤ឆ្នាំម្នាក់ បានថ្លែងប្រាប់អ្នកកាសែតថា ៣០ឆ្នាំមកហើយ ដែលគាត់តែងតែមានវត្តមាននៅទីនេះ នៅថ្ងៃទី៤មិថុនា។ ខួបលើកទី៣១ឆ្នាំនេះ កាន់តែមានន័យខ្លាំងណាស់ សម្រាប់ហុងកុង ព្រោះថាហុងកុង កំពុងតែរស់ក្នុងកណ្តាប់ដៃសង្កត់សង្កិនសិទ្ធិសេរីភាព ដូចនៅទីលានធានអានមិនកាលពីឆ្នាំ១៩៨៩។
បុរសវ័យ៥៣ឆ្នាំម្នាក់ទៀត បានលើកឡើងថា លោកមិនជឿទេ ថាគេហាមឃាត់ការជួបឃជុំនេះ ដោយសារតែខ្លាចឆ្លងជម្ងឺកូវីដ១៩។ តាមពិតនោះ គឺគេចង់កៀបសង្កត់ផ្លូវនយោបាយ មកលើប្រជាជនហុងកុងច្រើនជាង។ ស្ត្រីអាយុ៧០ម្នាក់ទៀត លើកឡើងថា ការជួបជុំនេះ គឺដើម្បីរំលឹកវិញ្ញាណក្ខន្ធអ្នកស្លាប់នៅទីលានធានអានមិន គ្មានអ្វីខុសឆ្គងដែលត្រូវហាមឃាត់នោះទេ។
គួរបញ្ជាាក់ថា បច្ចប្បន្ននេះ ភាពតានតឹងនយោបាយរវាងប្រជាជនហុងកុង និងអំណាចនយោបាយបក្សកុម្មុយនីស្ត កាន់តែឡើងកំដៅខ្លាំងឡើង។ ចិនទើបតែបានអនុម័តច្បាប់សន្តិសុខជាតិ ប្រឆាំងនឹងសកម្មភាពបះបោរ ទាំងឡាយណានៅហុងកុង។ ហើយនៅថ្ងៃទី៤មិថុនានេះដែរ សភាហុងកុង ដែលស្ថិតក្រោមចំណុះប៉េកាំង បានអនុម័តច្បាប់ផ្តន្ទាទោសការមិនគោរពភ្លេងជាតិចិន នៅហុងកុង។ ច្បាប់ទាំងនេះ សុទ្ធតែត្រូវបានក្រុមប្រជាធិបតេយ្យហុងកុង ចាត់ទុកថាគឺជាឧបករណ៍វាយបំបាក់សិទ្ធិសេរីភាព របស់ប្រជាជនហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ