ជប៉ុនអនុញ្ញាតឲ្យប្រើថ្នាំ Remdesivir ទៅលើអ្នកជំងឺកូវីដ១៩
បន្ទាប់ពីសហរដ្ឋអាមេរិក ជប៉ុនបានក្លាយជាប្រទេសទី២ ដែលបានអនុញ្ញាត ឲ្យប្រើថ្នាំឈ្មោះ Remdesivir ដើម្បីព្យាបាលអ្នកជំងឺកូវីដ១៩។ បើតាមអាជ្ញាធរសុខាភិបាលជប៉ុន នេះគឺជាការអនុញ្ញាតពិសេស ដោយបន្ទាន់បំផុត ដោយសារបច្ចុប្បន្ន ពុំទាន់មានថ្នាំណាសក្តិសិទ្ធិអាចព្យាបាលជំងឺកូវីដ១៩បានទេ។ គិតត្រឹមថ្ងៃទី៧ឧសភា យោងតាមតួលេខរបស់ទីភ្នាក់ងារព័ត៌មាន Reuters ជប៉ុនមានអ្នកឆ្លងជំងឺកូវីដចំនួនប្រមាណជាង ១៦០០០នាក់ ក្នុងនោះស្លាប់ជិត៨០០នាក់។
ចុះផ្សាយនៅថ្ងៃ៖
ស្តាប់ - ០២:៣៣
មួយសប្តាហ៍បន្ទាប់ពីសហរដ្ឋអាេមរិក ជប៉ុនបានសម្រេចបើកភ្លើងខៀវ អនុញ្ញាតការប្រើប្រាស់ ថ្នាំ Remdesivir ទៅលើអ្នកជំងឺកូវីដ១៩។ មន្ត្រីក្រសួងសុខាភិបាលជប៉ុន បានបញ្ជាក់ នៅរសៀលថ្ងៃព្រហស្បតិ៍ទី៧ឧសភាថា បើតាមធម្មតា នីតិវិធីអនុញ្ញាតប្រើឱសថនីមួយៗ គឺត្រូវចំណាយពេលយូរណាស់។ តែនេះជាករណីពិសេស អាជ្ញាធរត្រូវតែពន្លឿន ព្រោះថាកាលៈទេសៈបច្ចុប្បន្ន គ្មានឱសថណា អាចព្យាបាលជម្ងឺកូវីដ១៩ បានទេ។
គួរបញ្ជាក់ថា កាលពីថ្ងៃសុក្រទី ១ឧសភា សហរដ្ឋអាមេរិក បានសម្រេចអនុញ្ញាតិឲ្យប្រើថ្នាំ Remdesivir ទៅលើអ្នកជំងឺកូវីដ១៩ ដោយផ្អែកលើលទ្ធផលនៃការស្ថាវជ្រាវសាកល្បង ធ្វើឡើងដោយក្រុមអ្នកជំនាញអាេមរិក។ យោងតាមលទ្ធផលស្រាវជ្រាវនេះ ថ្នាំ Remdesivir អាចជួយឲ្យអ្នកជំងឺកូវីដ១៩ បានជាសះស្បើយឆាប់រហ័ស។
សូមរំលឹកថា ថ្នាំRemdesivir គឺជាថ្នាំផលិតដោយមន្ទីរពិសោធន៍អាមេរិក Gilead ដើម្បីប្រើទៅលើអ្នកជំងឺអេបូឡា។ ក្រៅពីបានប្រើសាកល្បងនៅឆ្នាំ២០១៦ ទៅលើអ្នកជំងឺអេបូឡា នៅសាធារណៈរដ្ឋប្រជាធិបតេយ្យកុងហ្គោ ថ្នាំRemdesivir មិនដែលធ្លាប់បានសាកប្រើ ក្នុងទ្រង់ទ្រាយធំ ទៅលើជំងឺផ្សេងទៀតទេ។ កាលពីថ្ងៃទី៣០មេសា មន្ទីរពិសោធន៍ Gilead បានប្រកាសថា ថ្នាំ Remdesivir របស់ខ្លួន អាចមានប្រសិទ្ធិភាពព្យាបាលអ្នកជំងឺកូវីដ១៩ បើសិនជាគេប្រើវាទៅលើអ្នកជំងឺកូវីដភ្លាមៗក្រោយឆ្លងមេរោគ។
តែយ៉ាងណាក៏ដោយ បើតាមអ្នកជំនាញខ្លះ ប្រសិទ្ធិភាពរបស់ថ្នាំ Remdesivir ទៅលើជម្ងឺកូវីដ១៩ គឺមានទំហំស្តួចស្តើងណាស់ ព្រោះវាគ្រាន់តែបានជួយឲ្យអ្នកជំងឺកូវីដ១៩ អាចឆាប់ជាជាង ៤ថ្ងៃប៉ុណ្ណោះ។ ពោលគឺ តាមធម្មតាត្រូវការពេល១៥ថ្ងៃ ដើម្បីអាចធូរស្បឿយ តែបើប្រើថ្នាំ Remdesivir គឺអាចធូរស្បឿុយ ក្នុងកំឡុងពេល១១ថ្ងៃ។
ដោយឡែក នៅថ្ងៃព្រហស្បត្តិ៍ទី៧ឧសភាដែរ អ្នកនាំពាក្យរដ្ឋាភិបាលជប៉ុន បានបញ្ជាក់ថា រដ្ឋាភិបាល កំពុងតែពិចារណា សម្រេចអនុញ្ញាត ឲ្យប្រើថ្នាំAvigan ដើម្បីព្យាបាលអ្នកជំងឺកូវីដ១៩។ ថ្នាំ Avigan ត្រូវបានផលិតដោយសហគ្រាសជប៉ុន Fujifilm និងត្រូវបានអនុញ្ញាតនៅឆ្នាំ២០១៤ ឲ្យប្រើទៅលើអ្នកជំងឺផ្តាសាយធំធ្ងន់ធ្ង។ តែដោយយោងលើផលប៉ះពាល់ធ្ងន់ធ្ងរ លើសុខភាពបណ្តាលមកពីថ្នាំនេះ ជាពិសេសទៅលើស្ត្រីមានផ្ទៃពោះ ជប៉ុនបានហាមឃាត់ថ្នាំ Avigan។ ប៉ុន្តែក្រុមអ្នកជំនាញចិន បានអះអាងដោយយោងលើលទ្ធផលសិក្សាសាកល្បង ថាថ្នាំAvigan អាចមានប្រសិទ្ធិភាពគួរជាទីសង្ឃឹម ក្នុងការព្យាបាលអ្នកជំងឺកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ