ចិនបញ្ជូនអ្នកជំនាញវេជ្ជសាស្ត្រ ទៅជួយព្យាបាលលោក គីម ជុងអ៊ុន ?
ប្រព័ន្ធឃោសនាព័ត៌មានជាច្រើនរបស់អាមេរិក និងកូរ៉េខាងត្បូង បានជូនដំណឹងថា គីមជុងអ៊ុន ប្រមុខដឹកនាំកូរ៉េខាងជើង ទំនងកំពុងស្ថិតក្នុងស្ថានភាពធ្ងរធ្ងរខ្លាំង ក្រោយពីការវះកាត់បេះដូងរួច។ ក្នុងពេលជាមួយគ្នានេះ គេបានទទួលដំណឹងថា ចិនបានបញ្ជូនអ្នកជំនាញវេជ្ជសាស្ត្រមួយក្រុម ទៅព្យុងយ៉ាង។ តែគេនៅមិនទាន់អាចដឹងច្បាស់ថា តើលោកគីម ជុងអ៊ុនឈឺអ្វីឱ្យពិតប្រាកដ និងមានស្ថានភាពសុខភាពយ៉ាងដូចម្តេចទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ប្រតិភូមួយក្រុម ដឹកនាំដោយតំណាងជាន់ខ្ពស់នៃការិយាល័យទំនាក់ទំនងអន្តរជាតិនៃបក្សកុម្មុយនិស្តចិន អមដោយអ្នកជំនាញវេជ្ជសាស្ត្រផង បានចាកចេញពីទីក្រុងប៉េកាំង នៅល្ងាចថ្ងៃព្រហស្បតិ៍ទី ២៤មេសា។ ស្ថាប័នចិនទទួលបន្ទុកទំនាក់ទំនងជាមួយកូរ៉េខាងជើង ដ៏ដូចជាក្រសួងការបរទេសចិន មិនធ្វើអត្ថាធិប្បាយអ្វីទាំងអស់ទាក់ទងនឹងបេសកកម្មនេះ។
កាលពីថ្ងៃអង្គារទី ២២មេសា សារព័ត៌មានអាមេរិកនិងកូរ៉េខាងត្បូង ជាច្រើន បានលើកឡើង អំពីស្ថានភាពសុខភាពមិនល្អរបស់ គីមជុងអ៊ុន ក្រោយការវះកាត់បេះដូង។ ពីរថ្ងៃក្រោយ លោក ដូណាល់់ត្រាំ ប្រកាសថា មិនជឿលើព័ត៌មាននោះទេ។ មិនដឹងថាតើលោកត្រាំបានទាក់ទងនឹងតំណាងកូរ៉េខាងជើងឬយ៉ាងណាឡើយ។ បើតាមតំណាងម្នាក់ស្និទ្ធនឹងភ្នាក់ងារចារកិច្ចអាមេរិក លោក គីម ជុងអ៊ុន ជាប់ឈ្មោះថាមានបញ្ហាសុខភាពមែន ប៉ុន្តែគ្មានអ្វីដែលអាចបញ្ជាក់បាននៅពេលនេះ ថាប្រមុខដឹកនាំវ័យ៣៦ឆ្នាំរបស់កូរ៉េខាងជើង ឈឺធ្ងន់ និងគ្មានសមត្ថភាពបង្ហាញមុខជាសាធារណៈនៅពេលខាងមុខឡើយ។ ប្រភពមកពីខាងកូរ៉េខាងត្បូងមួយទៀត ដែលបដិសេធមិននិយាយអំពីស្ថានភាពសុខភាពគីមជុងអ៊ុនពេលនេះ និងអំពីការបញ្ជូនអ្នកជំនាញសុខភាពចិនទៅព្យុងយ៉ាង ក៏បានអះអាងដូចគ្នានៅថ្ងៃសុក្រទី ២៥មេសានេះថា គីមជុងអ៊ុននៅមានជីវិត និងគង់បង្ហាញវត្តមានវិញក្នុងពេលឆាប់ៗ។
កូរ៉េខាងជើងជាប្រទេសដ៏ឯកា និងអាថ៌កំបាំងជាងគេបំផុតនៅលើពិភពលោក។ ចំណោទសុខភាពរបស់មេដឹកនាំ ត្រូវបានចាត់ទុកជាកិច្ចការសម្ងាត់សន្តិសុខជាតិ។ គេបានឃើញរូបលោកគីមជុងអ៊ុន ជាលើកចុងក្រោយកាលពីថ្ងៃទី ១១មេសា តែសារព័ត៌មានផ្លូវការកូរ៉េខាងជើង ពុំបានបង្ហាញអំពីវត្តមានរបស់លោកគីម ជុងអ៊ុន ក្នុងពិធីប្រារព្វខួបកំណើតបិតាជាតិគីមអ៊ីលស៊ុង ថ្ងៃទី ១៥មេសាទេ ទើបមានពាក្យចចាមអារាមសុខភាពកាន់តែរីកធំធាត់ឡើង។
លោក គីម ជុងអ៊ុន ធ្លាប់បាត់មុខម្តង កាលពីឆ្នាំ២០១៤ អស់រយៈពេលជាងមួយខែ។ នៅពេលលេចមុខមកវិញលើកញ្ចក់ទូរទស្សន៍ជាតិ លោកដើរបាក់ខ្ញើច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ