លោកហ្សង់ ហ្វីលីប បេហ្សា៖លាក់ការណ៍សម្ងាត់ជាផ្នែកមួយនៃ ADN របស់គណបក្សកុម្មុយនិស្តចិន
សង្រ្គាមពាក្យសម្តីកំពុងបន្តកើតមានយ៉ាងផុសផុលរវាងប្រទេសចិន និងក្រុមប្រទេសបស្ចិមលោកទាក់ទងនឹងព័ត៌មានស្តីពីជំងឺកូវីដ-១៩ ដែលផ្ទុះដំបូងនៅក្នុងទីក្រុងវូហាន។ ក្រុមប្រទេសបស្ចិមលោកមានអាមេរិក បារាំង និងអង់គ្លេសបានចោទចិនពីបទខ្វះតម្លាភាព និងបានលាក់បាំងការពិតជុំវិញវត្តមានមេរោគកូរ៉ូណាថ្មី។ តែចិនតាមរយៈអ្នកនាំពាក្យក្រសួងការបរទេសលោកហ្សាវ លីជាំងបានបញ្ចេញប្រតិកម្មបកវិញនាថ្ងៃសុក្រ ទី១៧ មេសាថា ចិនមិនបានលាក់ពីចំនួនមនុស្សស្លាប់ ចំនួនអ្នកឆ្លង ឬប្រភពវត្តមានកូវីដ-១៩ ទេ។ ទន្ទឹមគ្នានេះ លោកលីជាំងថែមទាំងបានអំពាវនាវឲ្យពិភពលោករួមសាមគ្គីគ្នាដើម្បីប្រយុទ្ធប្រឆាំងនឹងកូវីដ-១៩ ទៀតផង។ តើចិនមានបានលាក់ការពិតដែរ ឬទេ? តើរដ្ឋអំណាចថ្នាក់ក្រោមមានភាពយឺតយ៉ាវក្នុងការបញ្ជូនព័ត៌មានស្តីពីវត្តមានកូវីដ-១៩ ទៅឲ្យថ្នាក់លើ ឬ យ៉ាងណា ឬមួយក៏ថា តើថ្នាក់លើខ្លួនឯងទេដឹងដែលចង់លាក់ការពិតជុំវិញព័ត៌មានកូវីដ-១៩?។ លោកហ្សង់ ហ្វីលីប បេហ្សា អ្នកឯកទេសប្រទេសចិនបានលើកឡើងពីលាក់ការណ៍សម្ងាត់ដែលជាផ្នែកមួយនៃ ADN របស់គណបក្សកុម្មុយនិស្តចិន។
ចុះផ្សាយនៅថ្ងៃ៖
ស្តាប់ - ០១:៤១
« ស្ថិរភាពយកឈ្នះអ្វីៗគ្រប់យ៉ាងដែលគេនិយាយតាំងពីជំនាន់ប្រធានាធិបតីតេង ស៊ាវពីងក្នុងឆ្នាំ ១៩៨៩ ហើយពិតណាស់ដែលប្រធានាធិបតីបច្ចុប្បន្នលោកស៊ី ជីនពីងបានពង្រឹងជំហរមួយនេះ។ លាក់ការណ៍សម្ងាត់ គឺជាផ្នែកមួយនៃ ADN របស់គណបក្សកុម្មុយនិស្តចិន។ ថ្នាក់ដឹកនាំចិនទាំងអស់ចាំបាច់ត្រូវតែមានលទ្ធផលល្អពីការងារដែលខ្លួនបានបំពេញ។ ប្រសិនអស់លោកមិនអាចទប់ស្កាត់ជំងឺឆ្លង និងទុកឲ្យជំងឺមួយនេះរាលដាលកាន់តែខ្លាំង គឺលទ្ធផលអាក្រក់។
ដូច្នេះ គេគ្មានជម្រើសអ្វីផ្សេងក្រៅពីព្យាយាមលាក់បាំងការពិតនោះឡើយ។ អស់លោកដឹងទេ លាក់ការណ៍សម្ងាត់ជាជំងឺមួយដែលមាននៅផ្ទៃក្នុងគណបក្សកុម្មុយនិស្តចិនតាំងពីថ្នាក់ក្រោមដល់ថ្នាក់កំពូល។ អ៊ីចឹងពិតណាស់ ក្រុងវូហានបានព្យាយាមលាក់បាំងការពិត ហើយចៅហ្វាយក្រុងវូហានខ្លួនឯងក៏បានសារភាពថា មានច្បាប់មួយបានហាមរដ្ឋអំណាចថ្នាក់ក្រោមមិនឲ្យផ្សព្វផ្សាយជាសាធារណៈនូវវត្តមានជំងឺឆ្លង។
មុននឹងផ្សព្វផ្សាយ គឺត្រូវតែមានការអនុញ្ញាតពីថ្នាក់លើជាមុនសិន។ លើសពីនេះទៅទៀត ការដែលនាយកដ្ឋានផ្នែកឃោសនាជាអ្នកផ្តល់ការអនុញ្ញាតឲ្យមានការផ្សព្វផ្សាយអត្ថបទរបស់ក្រុមអ្នកវិទ្យាសាស្រ្តស្តីពីមេរោគកូរ៉ូណាថ្មីពិតជារឿងគួរឲ្យបារម្ភក្រែលែង។ ដូច្នេះ ថ្នាក់លើជាអ្នកទទួលខុសត្រូវទាំងស្រុងចំពោះរឿងមេរោគកូរ៉ូណាថ្មីនេះ ព្រោះថា នៅពេលដែលមានសំណុំរឿងដែលពាក់ព័ន្ធនឹងនយោបាយការបរទេសរបស់ចិន និងជំហររបស់ចិននៅលើពិភពលោក គឺរដ្ឋអំណាចថ្នាក់កំពូលជាអ្នកសម្រេច ពោលមិនមែនរដ្ឋអំណាចថ្នាក់ក្រោមទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ