ចិនដោះលែងមេធាវីការពារសិទ្ធិមនុស្សដ៏ល្បីម្នាក់ តែឱ្យនៅដាច់ដោយឡែកសិន
ជាមេធាវីដ៏ល្បីល្បាញម្នាក់ មានជំនាញខាងការពារសិទ្ធិមនុស្ស លោក វ៉ាង គ័នចាង (Wang Quanzhang) ទើបត្រូវបានអាជ្ញាធរចិន ដោះលែងពីពន្ធនាគារនៅថ្ងៃអាទិត្យទី ៥មេសា ២០២០។ នេះបើតាមការអះអាងរបស់អ្នកស្រី លី វេនជួ (Li Wenzu) ជាភរិយា។ ប៉ុន្តែលោកមេធាវី វ៉ាង គ័នចាង មិនបានត្រលប់ចូលផ្ទះជួបជុំគ្រួសារភ្លាមទេ។ លោកត្រូវបានគេយកទៅដាក់ដោយឡែក រយៈពេល១៤ថ្ងៃសិន ក្នុងក្របខ័ណ្ឌនៃការទប់ស្កាត់ជំងឺកូរ៉ូណាវីរុសថ្មី។
ចុះផ្សាយនៅថ្ងៃ៖
ស្តាប់ - ០២:២២
អ្នកស្រី លី វេនជូ ជាភរិយា ដែលអាចដើរពីប៉េកាំងដល់ធានជីន ដើម្បីគាំទ្រស្វាមី កោរសក់ដើម្បីសម្តែងការប្រឆាំងនឹងសេចក្តីសម្រេចរបស់អាជ្ញាធរ ត្រូវរង់ចាំយូរថ្ងៃទៀត ទើបអាចជួបស្វាមី ដែលអាជ្ញាធរបានដោះលែងនៅថ្ងៃអាទិត្យទី៥មេសានេះ។ ក្នុងក្របខ័ណ្ឌនៃការទប់ស្កាត់ការរាតត្បាតជំងឺកូវីដ១៩ លោក វ៉ាង គ័នចាង ត្រូវដាក់ឱ្យនៅដាច់ដោយឡែកពីគេរយៈពេល១៤ថ្ងៃសិន។ ចេញពីពន្ធនាគារ ប៉ូលិសចិនបាននាំ លោក វ៉ាង គ័នចាង (អាយុ ៤៤ ឆ្នាំ) ទៅដាក់នៅក្នុងផ្ទះមួយ នាក្រុង ជីណាន នៃខេត្ត ស្ហាងដុង ជាស្រុកកំណើត។
ប៉ុន្តែសម្រាប់អ្នកស្រី ហេតុផលកូរ៉ូណាវីរុស គ្រាន់តែជាលេសប៉ុណ្ណោះ។ អ្នកស្រី ព្រមទាំងអ្នកសង្កេតការណ៍សិទ្ធិមនុស្សជាច្រើនទៀត ព្រួយបារម្ភថា លោក វ៉ាង គ័នចាង អាចនឹងត្រូវបន្តជាប់ឃុំឃាំងនៅក្នុងគេហដ្ឋានទៀត ដោយពុំអាចមានសិទ្ធិជួបជុំគ្រួសារឡើយ។
សូមបញ្ជាក់ថា លោក វ៉ាង គ័នចាង ត្រូវអាជ្ញាធរចិនចាប់ខ្លួន នៅឆ្នាំ២០០៥ ទន្ទឹមគ្នានឹងការចាប់ខ្លួនសកម្មជនសិទ្ធិមនុស្សប្រមាណ២០០នាក់ផ្សេងទៀត ក្នុងប្រតិបត្តិការបង្ក្រាប “៧០៩”។ ជាមេធាវីសិទ្ធិមនុស្សដ៏សកម្មម្នាក់ ជំនាញខាងការពារក្តីឲ្យសកម្មជននយោបាយ និង ជនរងគ្រោះនៃការរំលោភយកដីធ្លី នៅក្នុងប្រទេសចិន លោក វ៉ាង គ័នចាង បានជាប់ឃុំក្នុងទីសម្ងាត់មួយ និងគ្មានទំនាក់ទំនងជាមួយគ្រួសារសោះ រយៈពេលជាង១០០០ថ្ងៃ មុននឹងលេចមុខមកវិញ នៅក្នុងអង្គសវនាការ ដោយបិទទ្វារ និងដោយគ្មានមេធាវី។ នៅខែមករាឆ្នាំ២០១៩ តុលាការចិន បានសម្រេចកាត់ទោសឲ្យលោកជាប់ពន្ធនាគាររយៈពេល៤ ឆ្នាំ កន្លះ ពីបទវិទ្ធង្សនា។ លោកវ៉ាង គ័នចាង បានជួបមុខគ្រួសារជាលើកទីមួយ នៅខែមិថុនាឆ្នាំ២០១៩។
ការដោះលែងលោក វ៉ាង គ័នចាង ជាទង្វើដ៏វិជ្ជមានរបស់រដ្ឋាភិបាលចិន។ នេះបើតាមសេចក្តីថ្លែងការណ៍របស់សហភាពអឺរ៉ុប ដែលទាមទាមឱ្យអាជ្ញាធរចិន ផ្តល់សេរីភាពដល់លោកមេធាវី ដោយគ្មានលក្ខខណ្ឌ ពោលគឺលោកអាចជួបជុំគ្រួសារ និងមានសិទ្ធិដើរហើរពេញលេញ។
តាំងពីលោកស៊ីជីនពីង ឡើងកាន់តំណែងជាប្រធានាធិបតីចិននៅឆ្នាំ២០១៣មក ចិនបានរឹតបន្តឹង បង្ក្រាបសំឡេងប្រឆាំងនឹងរដ្ឋាភិបាលកុម្មុយនិស្តកាន់តែខ្លាំង។ នេះបើតាមការបរិហាររបស់អង្គការសមាគមសិទ្ធិមនុស្សអន្តរជាតិទាំងឡាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ