ចិនចាក់បញ្ចូលលុយចំនួន ៧ពាន់លានដុល្លារក្នុងទីផ្សារដើម្បីជួយសង្គ្រោះសេដ្ឋកិច្ច
នៅចិន គិតត្រឹមថ្ងៃអាទិត្យ ទី២៩ មីនា ករណីឆ្លងថ្មីនៃវីរុសកូវីដ១៩ មានចំនួន ៣១ ករណី ដែលក្នុងចំណោមនោះ មានមួយករណីជាករណីឆ្លងក្នុងស្រុក។ ទោះបីជា ករណីឆ្លងនៅក្នុងប្រទេស មានចំនួនថយចុះយ៉ាងណាក្តី ក៏សេដ្ឋកិច្ចចិន នៅតែប្រឈមនឹងគ្រោះថ្នាក់ ដែលបណ្តាលមកពីវិបត្តិកូវីដ១៩ដែរ។ ដូច្នោះហើយ ដើម្បីជួយសង្គ្រោះសេដ្ឋកិច្ច កុំឲ្យរងផលប៉ះពាល់ខ្លាំង នៅថ្ងៃចន្ទនេះ រដ្ឋអំណាចចិន បានសម្រេចកាត់បន្ថយអត្រាការប្រាក់ ដោយការចាក់បញ្ចូលលុយចំនួន ៧ ពាន់លានដុល្លារ ចូលក្នុងទីផ្សារ។
ចុះផ្សាយនៅថ្ងៃ៖
ស្តាប់ - ០២:០៧
ឆ្លើយតបទៅនឹងវិធានការទ្រទ្រង់សេដ្ឋកិច្ចរបស់រដ្ឋាភិបាល នៅថ្ងៃចន្ទ ទី៣០ មីនានេះធនាគារប្រជាជនចិន (PBoC) បានចាប់ផ្តើមចាក់បញ្ចូលសាច់ប្រាក់ចំនួន ៥០ ពាន់លានយ័ន ឬស្មើនឹង ៧ពាន់លានដុល្លារ ទៅក្នុងទីផ្សារ។ បន្ថែមលើនេះ ចិនក៏បាន ទម្លាក់ផងដែរនូវអត្រាការប្រាក់ពីចំនួន ២,៤% មកត្រឹម ២,២ % ដែលនេះ គឺជាទំហំដ៏ធំមួយ ក្នុងរយៈពេល៥ ឆ្នាំ ចុងក្រោយនេះ ពោលគឺចាប់តាំងពីឆ្នាំ ២០១៥មក។
ចំណាត់ការថ្មីចុងក្រោយរបស់ចិននេះ ធ្វើឡើងស្របពេលដែលរដ្ឋាភិបាលនៃប្រទេសផ្សេងៗទៀតមានដូចជាអាមេរិក ជប៉ុន បារាំង និងអាល្លឺម៉ង់ជាដើម បានដាក់ចេញនូវការបន្ធូរបន្ថយគោលនយោយបាយផ្នែករូបិយវត្ថុ ដើម្បីជួយសង្គ្រោះសេដ្ឋកិច្ច។
បើតាមអ្នកជំនាញខាងផ្នែកសដ្ឋកិច្ច ក្នុងកាលៈទេសៈដែលប្រទេស កំពុងរងគ្រោះខ្លាំង ពីជងឺរាតត្បាតសកល-កូវីដ១៩ ប្រសិនណាបើរដ្ឋាភិបាលនៃប្រទេសណាមួយ មិនចាត់វិធានការអ្វី ឬក៏ត្រៀមកញ្ចប់ថវិកាជំនួយនោះទេ សេដ្ឋកិច្ចរបស់ប្រទេសពួកគេនឹងរងផលប៉ះពាល់ខ្លាំងជាក់ជាមិនខាន។
គួរគូសបញ្ជាក់ជូនថា រហូតមកទល់នឹងពេលនេះ វីរុសកូវីដ១៩ ដ៏កាចសាហាវ បានសម្លាប់ជីវិតមនុស្សចំនួនជិត ៤ម៉ឺននាក់ នៅទូទាំងពិភពលោក និងបានធ្វើឲ្យប៉ះពាល់ដល់សង្វាក់ផលិតកម្ម និងដំណើររីកច្រើនទៅមុខនៃសេដ្ឋកិច្ចក្នុងប្រទេសជាច្រើន។
មួយវិញទៀត ការរីករាលដាលនៃជំងឺកូវីដ១៩ ឥតឈប់ ក៏បានកាត់ផ្តាច់ក្តីសង្ឃឹមរបស់ចិន ក្នុងការនាំចេញមុខទំនិញទៅលក់នៅបរទេស ឲ្យច្រើនដូចពីមុនដែរ។ ដោយសារតែ កូវីដ១៩ នៅតែបន្តវាយប្រហារលើសដ្ឋកិច្ចពិភពលោកដូច្នោះហើយ ទើបក្រុមអ្នកវិភាគមួយចំនួន បានព្យាករពីការថយចុះនៃកំណើនសេដ្ឋកិច្ចចិន។
ក្រុមហ៊ុនសេវាកម្មហិរញ្ញវត្ថុអាមេរិក S&P Global Ratings ប៉ាន់ស្មានថា អត្រាកំណើនសេដ្ឋកិច្ចរបស់ចិន ទំនងជាថយចុះពាក់កណ្តាលខុសពីការព្យាការណ៍មុនមានការផ្ទុះជំងឺដែលមានចំនួនប្រមាណ ៥,៧ %។ នេះ មានន័យថា ដោយសារតែវិបត្តិកូវីដ១៩ កំណើនសេដ្ឋកិច្ចចិន អាចនឹងធ្លាក់ចុះមកត្រឹម ២,៨៥ % តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ