អង្គការសុខភាពពិភពលោក ចាត់ទុកកូរ៉ូណាវីរុស ជាសត្រូវលេខមួយពិភពលោក
ផ្ទុះឡើងនៅចិន កូរ៉ូណាវីរុស ដែលអង្គការសុខភាពពិភពលោកទើបដាក់ឈ្មោះថ្មីឱ្យថា “Covid-19” ជាតំណាងនៃការគំរាមកំហែងសុខភាពពិភពលោកយ៉ាងធ្ងន់ធ្ងរ។ មេរោគនេះ គួរតែត្រូវបានគេចាត់ទុកជា សត្រូវសាធារណៈដ៏ធំជាងគេបំផុត។ នេះបើតាមប្រសាសន៍របស់នាយកអង្គការសុខភាពពិភពលោក នៅថ្ងៃអង្គារទី ១១កុម្ភៈ ទៅកាន់អ្នកវិទ្យាសាស្ត្រអន្តរជាតិជាង៤០០នាក់ ដែលមកជួបប្រជុំគ្នាក្នុងអង្គសន្និសីទរយៈពេលពីរថ្ងៃ នៅទីក្រុងហ្សឺណែវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
មានឈ្មោះថ្មី ថា “Covid-19” (កូវីត-១៩)កើតផ្តុំច្រើនតែក្នុងប្រទេសចិន ដល់ទៅ៩៩% ហើយកំណើនអ្នកឆ្លងថ្មីចាប់ធ្លាក់ចុះមែន ប៉ុន្តែមេរោគនេះជាការគំរាមកំហែងដ៏ធ្ងន់ធ្ងរ និងជាសត្រូវលំដាប់លេខមួយរបស់ពិភពលោក។ នេះបើតាមការគូសបញ្ជាក់របស់លោកនាយកអង្គការសុខភាពពិភពលោក ដោយបានអំពាវនាវឱ្យពិភពលោកចែករំលែកគំរូ Echantillons មេរោគ និងបង្កើនល្បឿនស្រាវជ្រាវរកថ្នាំព្យាបាលនិងថ្នាំបង្ការ។ នាយកអង្គការសុខភាពពិភពលោក សង្ឃឹមថា ជំនួបប្រជុំនេះ នឹងផ្តល់លទ្ធផលមួយ នៅពេលបិទបញ្ចប់ គឺការត្រូវរ៉ូវគ្នារវាងក្រុមអ្នកវិទ្យាសាស្ត្រនិងក្រុមអ្នកផ្តល់ថវិកា លើផែនការគោលនៃការស្រាវជ្រាវប្រឆាំងនឹងមេរោគកូរ៉ូណា។
ជាសរុបអង្គការសុខភាពពិភពលោកបាន ដាក់ឱ្យដំណើរការបណ្តាញមន្ទីរពិសោធន៍បង្គោលចំនួន១៥ និងមន្ទីរពិសោធន៍ចំនួន ១៦៨ផ្សេងទៀត នៅលើពិភពលោក ដែលមានបច្ចេកវិទ្យាទំនើបចាំបាច់ក្នុងការធ្វើតេស្តវិភាគមេរោគ Covid-19។ ការចែករំលែកព័ត៌មាន វិធានការការពារប្រជាជន ការផ្តល់ជំនួយជាសម្ភារៈសម្រាប់ការពារមេរោគទៅប្រទេសងាយរងគ្រោះ សុទ្ធសឹងជាសកម្មភាពសំខាន់ៗទាំងអស់ចំពោះក្រសែភ្នែកអង្គការសុខភាពពិភពលោក។
បើមានសកម្មភាពស្របគ្នា នោះអ្វីៗនឹងទៅលឿន: ហេតុដូច្នេះ ហើយបានជាអង្គការសុខភាពពិភពលោកយល់ថា ពិភពលោកពិតជាមានឱកាសជាក់ស្តែងយកឈ្នះមេរោគ កូវីត-១៩បាន។
សូមបញ្ជាក់ថា តាមរយៈទិន្នន័យថ្មី គេអាចចាប់ផ្តើមគូសវាសទម្រង់នៃការរាតត្បាតរបស់កូវីត-១៩បានខ្លះៗហើយ បើទោះបីនៅមានចំណុចអាថ៌កំបាំងច្រើនទៀតក៏ដោយ។ បើតាមការសិក្សា របស់អ្នកស្រាវជ្រាវអង់គ្លេស អត្រាស្លាប់ដោយកូវីត-១៩ មានកំរិត ១៨% នៅក្នុងប្រទេសចិន (បើផ្អែកលើតួលេខផ្លូវការចិន) និងត្រឹមតែប្រមាណ១%ប៉ុណ្ណោះ បើគិតកំរិតពិភពលោក ពោលគឺទាបជាងអត្រាមរណៈបង្កឡើងដោយជំងឺសារស៍ កាលពីឆ្នាំ ២០០២-០៣ និងជំងឺគ្រុនផ្តាសាយធំធម្មតាទេ។ នៅក្នុងចំណោមអ្នកធ្លាក់ខ្លួនឈឺរោគកូរ៉ូណាវីរុស ៨២% មានទម្រង់ជាជំងឺស្រាល ១៥%ធ្ងន់ និង៣%ធ្ងន់ធ្ងរគួរឱ្យព្រួយបារម្ភ។ ប៉ុន្តែកូវីត-១៩មានសមត្ថភាពឆ្លងខ្លាំង។ ដំបូងឡើយគេគិតថា មេរោគអាចសំងំនៅក្នុងខ្លួនមនុស្ស ពីពីរទៅ ១០ថ្ងៃ មុនបញ្ចេញអាការៈរោគ ប៉ុន្តែបើតាមទិន្នន័យថ្មី របស់អ្នកជំនាញសុខភាពចិន រយៈពេលសំងំអាចឡើងដល់២៤ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ