កូរ៉ូណាវីរុស ទៅដល់អាមេរិក និងអាចបំផ្លែងខ្លួនឱ្យកាន់តែងាយឆ្លង
ចំនួនមនុស្សស្លាប់ដោយមេរោគផ្លូវដង្ហើមថ្មី កូរ៉ូណាវីរ៉ុស បានឡើងដល់៩នាក់ គិតត្រឹមថ្ងៃពុធទី ២២មករា ២០២០។ ក្រសួងសុខាភិបាលចិនបានប្រកាសបន្ថែមទៀតថា កូរ៉ូណាវីរុស អាចបំផ្លែងខ្លួននិងងាយចម្លងបំផុត។ ចំនួនអ្នកឆ្លងមេរោគ បានឡើងដល់រាប់រយនាក់ នៅក្នុងប្រទេសចិន និងរកឃើញមានការឆ្លងមួយករណី នៅសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងពេលដែលពិភពលោកកំពុងព្រួយបារម្ភកាន់តែខ្លាំង អង្គការសុខភាពពិភពលោកត្រូវបើកប្រជុំជាបន្ទាន់នៅថ្ងៃពុធនេះ ដើម្បីកំណត់ថា គួរប្រកាសអាសន្នសុខភាពសាធារណៈកំរិតអន្តរជាតិឬយ៉ាងណានោះ កូរ៉ូណាវីរុសបានធ្វើដំណើរយ៉ាងលឿនឆ្លងទ្វីប។ មានករណីឆ្លងទីមួយ ត្រូវបានរកឃើញ នៅសហរដ្ឋអាមេរិក លើបុរសអាយុខ្ទង់សាមសិបឆ្នាំ រស់នៅក្នុងក្រុងSeattle ទើបត្រលប់មកពីក្រុងវូហាន ជាស្រុកកំណើត កាលពីថ្ងៃទី ១៥មករា។
មិនតែប៉ុណ្ណោះ ចំនួនមនុស្សស្លាប់បានឡើងដល់ទៅ៩នាក់ (៤នាក់កាលពីម្សិលមិញ) ឯតួលេខនៃការឆ្លងបានកើនឡើងឥតឈប់ឈរ។ នៅក្នុងសន្និសីទកាសែត ព្រឹកថ្ងៃពុធ ទី ២២មករា ២០២០ នាទីក្រុងប៉េកាំង អនុរដ្ឋមន្ត្រីក្រសួងសុខាភិបាលចិន បានប្រកាសថាមានករណីឆ្លងមេរោគផ្លូវដង្ហើមថ្មី លើអ្នកជំងឺប្រមាណ៤៤០នាក់ ពោលគឺឡើងជាងមួយរយនាក់បើប្រៀបធៀបទៅនឹងតុល្យការមុន។ ករណីឆ្លងថ្មី ក៏សង្កេតឃើញមាននៅកោះ ម៉ាកាវ។ ជាសរុប ខេត្តក្រុងចំនួនជិតពាក់កណ្តាលរបស់ចិន រាប់ទាំង សៀងហៃ និងប៉េកាំងផង សុទ្ធតែក៏រងការឆ្លងមេរោគកូរ៉ូណាវីរុសថ្មីនេះដែរ។
ដោយនៅវេលានេះ ប្រជាពលរដ្ឋចិនរាប់រយលាននាក់ត្រូវធ្វើដំណើរទៅស្រុកកំណើតជួបជុំគ្រួសារនាឱកាសបុណ្យចូលឆ្នាំថ្មីផង វីរុសផ្លូវដង្ហើម ដែលអាចចម្លងពីមនុស្សម្នាក់ទៅមនុស្សម្នាក់ទៀតបាននេះ អាចនឹងបំផ្លែងខ្លួននិងកាន់តែងាយឆ្លង។ នេះបើតាមប្រសាសន៍របស់អនុរដ្ឋមន្ត្រីក្រសួងសុខាភិបាលចិនដដែល។
បន្ទាប់ពីមិនសូវអើពើនៅពេលមេរោគលេចចេញភ្លាមកាលពីខែធ្នូ ប្រជាពលរដ្ឋចិនទើបចាប់ផ្តើមយល់អំពីហានិភ័យនៃមេរោគកូរ៉ូណាវីរុស ដោយនាំគ្នាពាក់ម៉ាស និងប្រើផលិតផលសម្លាប់មេរោគ។ នៅតាមទីក្រុងធំៗ ម៉ាសនិងជែលសម្លាប់មេរោគ លក់ដាច់អស់គ្មានសល់ក្នុងស្តុកទៀតទេ។ អាជ្ញាធរចិនបានប្រកាសចាត់វិធានការការពារមួយចំនួន ដូចជាបោសសម្អាត បាញ់ខ្យល់ បាញ់ថ្នាំសម្លាប់មេរោគ នៅតាមព្រលានយន្តហោះ ស្ថានីយ៍រថភ្លើង និងមជ្ឈមណ្ឌលពាណិជ្ជកម្មនានា។ ម៉ាស៊ីនវាស់សីតុណ្ហភាពអ្នកដំណើរ ក៏នឹងអាចមានដំឡើងនៅតាមមណ្ឌលដែលមនុស្សម្នាច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ