យន្តហោះទាហានអាមេរិក ធ្លាក់នៅអាហ្វហ្កានីស្ថាន ក្នុងតំបន់របស់ក្រុមតាលីបង់
នៅថ្ងៃទី២៧មករា មានយន្តហោះមួយគ្រឿងរបស់កងទ័ពអាមេរិក បានធ្លាក់នៅអាហ្វហ្កានីស្ថាន ក្នុងតំបន់ភាគខាងកើត ដែលជាតំបន់គ្រប់គ្រងដោយក្រុមតាលីបង់។ មូលហេតុនៃការធ្លាក់នេះ ស្ថិតនៅក្នុងភាពស្រពេចស្រពិលនៅឡើយ។ ក្រុមតាលីបង់ អះអាងថា គឺពួកខ្លួនដែលជាអ្នកបាញ់ទំលាក់។ ក៏ប៉ុន្តែ ក្រសួងការពារជាតិអាមេរិក អះអាងថា ពុំមានសញ្ញាណាមួយ ថាយន្តហោះកងទ័ពអាមេរិកដែលធ្លាក់នោះ ត្រូវបានគេបាញ់ទំលាក់ឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
អ្នកនាំពាក្យក្រុមតាលីបង់ បានអះអាងប្រាប់ អ្នកយកព័ត៌មានបារាំង AFP ថា យន្តហោះប្រតិបត្តិការពិសេសមួយ ដែលមានជនជាតិអាមេរិកនៅក្នុងនោះ បានធ្លាក់កាលពីថ្ងៃទី២៧មករា នៅក្នុងខេត្ត Ghazni ភាគខាងកើតអាហ្វហ្កានីស្ថាន។ មនុស្សដែលនៅក្នុងយន្តហោះនោះ បានស្លាប់ទាំងអស់ នេះបើតាមការអះអាង របស់ក្រុមតាលីបង់ដដែល។ ក្រុមនេះអះអាងទៀត ថាយន្តហោះបានធ្លាក់ ដោយសារបាញ់ទំលាក់។
ប៉ុន្មានម៉ោងក្រោយមក មន្ទីរប៉ង់តាហ្គោនអាមេរិក បានបញ្ជាក់ថា យន្តហោះយោធាអាមេរិកមួយគ្រឿងពិតជាបានធ្លាក់មែន នៅភាគខាងកើតអាហ្វហ្កានីស្ថាន តែគេមិនមានសញ្ញាណាមួយបញ្ជាក់ថា យន្តហោះនោះ បានធ្លាក់ដោយការបាញ់ទំលាក់ពីសត្រូវឡើយ។ នៅក្នុងសារTwitter របស់អ្នកនាំពាក្យបញ្ជាការកងទ័ពអាមេរិក ប្រចាំអាហ្វហ្កានីស្ថាន បានឲ្យដឹងថា យន្តហោះដែលធ្លាក់ គឺជាយន្តហោះទំលាក់គ្រាប់បែក ប្រភេទE-11A ដែលយន្តហោះនេះ ជាទូទៅបំពាក់ដោយគ្រឿងឧបករណ៍ បច្ចេកវិទ្យាទំនើបមានតម្លៃ ដើម្បីហោះឈ្លបយកការណ៍។ អ្នកនាំពាក្យដដែល បានអះអាងថា កងទ័ពអាមេរិក កំពុងតែស្រាវជ្រាវ ស្វែងយល់មូលហេតុនៃការធ្លាក់យន្តហោះនេះ។
នៅតាមបណ្តាញសង្គម គេឃើញមានការបង្ហោះរូបថត និងវីដេអូ ដែលមិនអាចស្គាល់ប្រភពច្បាស់លាស់ ហើយក្នុងរូបទាំងនោះ គេឃើញបំណែកយន្តហោះដែលធ្លាក់ នៅទីតាំងមួយដែលក្រាលដោយព្រឹលទឹកកក។ នៅលើតួបំណែកយន្តហោះ គេឃើញមានស្លាកសញ្ញា បញ្ជាក់ថា ជាយន្តហោះរបស់កងទ័ពអាមេរិក ប្រភេទ E-11A។
គួរកត់សំគាល់ថា មានករណីគ្រោះថ្នាក់ផ្លូវអាកាស ជាញឹកញាប់នៅអាហ្វហ្កានីស្ថាន ដោយសារតែស្ថានភាពភូមិសាស្ត្រតំបន់ភ្នំ ពិបាកក្នុងការហោះឡើង ឬចុះចត ជាពិសេសសម្រាប់ឧត្ថម្ភាគចក្រ។ កត្តាអាកាសធាតុ ខ្យស់ខ្លាំង ធ្លាក់ព្រិលខ្លាំង និងអព្វក្រាស ក៏ជាមូលហេតុនៃគ្រោះថ្នាក់ផងដែរ។ តែយ៉ាងណា ជាទូទៅ គឺកងទ័ពអាហ្វហ្កានីស្ថាន ដែលជួបគ្រោះថ្នាក់របៀបនេះច្រើន។ ចំណែកកងទ័ពអាមេរិកវិញមានជំនាញច្បាស់ក្នុងការបញ្ជា ព្រមទាំងមានឧបករណ៍ទំនើបផង កម្រជួបគ្រោះថ្នាក់ណាស់។
តែយ៉ាងណា ការអះអាងរបស់ក្រុមតាលីបង់ ថាបានបាញ់យន្តហោះទំលាក់ គឺជារឿងមួយពិបាកជឿ ដោយសារក្រុមនេះ ត្រូវគេដឹងថា ពុំមានប្រព័ន្ធវាយប្រហារ ឬការពារផ្លូវអាកាសឡើយ។ មួយវិញទៀត ការអង្កេតស្រាវជ្រាវពីមូលហេតុពិត ពិតជាមានឧបសគ្គ ព្រោះតំបន់កើតហេតុ គឺជាតំបន់គ្រប់គ្រងដោយពួកតាលីបង់។
គួររំលឹកផងដែរថា ករណីធ្លាក់យន្តហោះកងទ័ពអាមេរិក នៅក្នុងតំបន់កាន់កាប់ដោយកក្រុមតាលីបង់នេះ គឺវាជួនចំពេល ដែលអាមេរិកកំពុងតែចរចាសន្តិភាព ជាមួយក្រុមតាលីបង់។ ជាថ្នូរនឹងការដកទ័ពចេញ អាមេរិក បានសុំឲ្យក្រុមតាលីបង់ធានាឲ្យបាន ថាត្រូវតែកាត់បន្ថយសកម្មភាពវាយប្រហារ ឬភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ