ផ្ទុះអំពើហិង្សាដល់ស្លាប់នៅប៉ាឡេស្ទីន ខណៈអាមេរិកនាំផែនការសន្តិភាពទៅអង្គការសហប្រជាជាតិ
នៅថ្ងៃព្រហស្បតិ៍នេះ ហ្សារ៉េដ គូស្នែរ (Jared Kushner) កូនប្រសាររបស់លោកដូណាល់ ត្រាំ បានអញ្ជើញទៅអង្គការសហប្រជាជាតិ ដើម្បីបង្ហាញផែនការសន្តិភាព អ៊ីស្រាអែល-ប៉ាឡេស្ទីន ដល់ក្រុមប្រឹក្សាសន្តិសុខ។ ចំណែកលោក ម៉ះមូដ អាបាស់ ប្រធានរដ្ឋអំណាចប៉ាឡេស្ទីនវិញ ក៏នឹងអញ្ជើញទៅដល់អង្គការសហប្រជាជាតិ នៅសប្តាហ៍ក្រោយ ជាមួយនឹងផែនការសន្តិភាពរបស់លោកដែរ។ ប៉ុន្តែនៅផ្ទៃក្នុងប្រទេសវិញ អំពើហិង្សាប្រដាប់អាវុធបានផ្ទុះឡើងជាថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
នៅថ្ងៃពុធ មានយុវជនប៉ាឡេស្ទីនម្នាក់បានស្លាប់ នៅភាគខាងត្បូងស៊ីហ្សកដានី។ នៅព្រឹកថ្ងៃព្រហស្បតិ៍ ទី ៦កុម្ភៈនេះ មានស្លាប់ម្នាក់ទៀត និង៧នាក់ រងរបួស នៅភាគខាងជើងតំបន់ស៊ីហ្សកដានីម្តង នៅក្នុងការប៉ះទង្គិចដូចគ្នាជាមួយទាហានអ៊ីស្រាអែល។ បើតាមសាក្សី ក្រុមយុវជនប៉ាឡេស្ទីន បាននាំគ្នាគប់ដុំថ្ម លើទាហានអ៊ីស្រាអែល ឯទាហានអ៊ីស្រាអែលបាញ់តបវិញដើម្បីបង្ក្រាប។ ក្នុងថ្ងៃព្រហស្បតិ៍នេះដដែល ទាហានអ៊ីស្រាអែល បានបើកប្រតិបត្តិការបាញ់លើទីតាំងរបស់ចលនាហាម៉ាសនៅតំបន់ហ្កាហ្សា ក្រោយពីក្រុមនេះបានបង្ហោះប៉េងប៉ោងភ្លើងនិងបាញ់កាំភ្លើងត្បាល់ចេញពីទឹកដីប៉ាឡេស្ទីនសំដៅអ៊ីស្រាអែល។
ចំណែកនៅទីក្រុងហ្សេរុយសាឡិមវិញ មានការវាយប្រហារបែបភេរវកម្ម ដោយបើកឡានសំដៅបុកមនុស្ស។ ១៤នាក់រងរបួស ក្នុងនោះ១២នាក់ជាទាហានអ៊ីស្រាអែល។ សម្រាប់ចលនាហាម៉ាសប៉ាឡេស្ទីន ដែលកំពុងកាន់អំណាចនៅតំបន់ហ្កាហ្សា នេះជា “សកម្មភាពតស៊ូ” ប្រឆាំងនឹងអ្វីដែលអ៊ីស្រាអែលបានធ្វើនៅភាគខាងជើងនិងខាងត្បូងស៊ីហ្សកដានី និងជាចម្លើយតបទៅនឹងផែនការសន្តិភាពរបស់លោកដូណាល់ ត្រាំ។
តាំងពីមួយសប្តាហ៍មកនេះ ពលរដ្ឋប៉ាឡេស្ទីន ខឹងសម្បារខ្លាំងណាស់នឹងផែនការសន្តិភាពអាមេរិក ដែលអារកាត់ឱ្យក្រុងហ្សេរុយសាឡិមជារដ្ឋធានីរបស់អ៊ីស្រាអែលដាច់តែឯង។ ផែនការនេះ ត្រូវបានលោក ហ្សារ៉េដ គូស្នែរ ជាកូនប្រសាររបស់លោកដូណាល់ ត្រាំ លើកយកទៅបង្ហាញសមាជិកក្រុមប្រឹក្សាសន្តិសុខអង្គការសហប្រជាជាតិ ទាំង១៥ដោយផ្ទាល់នៅថ្ងៃព្រហស្បតិ៍ ទី ៦កុម្ភៈ២០២០។ ជាជំនួបក្រៅផ្លូវការមែន ប៉ុន្តែជាទង្វើប្រកបដោយឥទ្ធិពលណាស់។
នៅក្នុងសំណុំរឿងអ៊ីស្រាអែល-ប៉ាឡេស្ទីន សមាជិកក្រុមប្រឹក្សាសន្តិសុខអង្គការសហប្រជាជាតិ ១៤ផ្សេងទៀត បានគាំទ្រដំណោះស្រាយបង្កើតរដ្ឋពីររស់ក្បែរគ្នា។ ប៉ុន្តែថ្ងៃនេះ កូនប្រសារលោកត្រាំ ចង់ទៅរៀបចំស្ថានការណ៍ មុនពេលក្រុមប្រឹក្សាសន្តិសុខទទួលជួបប្រធានអាជ្ញាធរប៉ាឡេស្ទីន លោក ម៉ះមូដ អាប៉ាស់ នៅថ្ងៃអង្គារទី ១១កុម្ភៈ។ លោក អាប៉ាស់ នឹងកាន់ទៅជាមួយនូវសេចក្តីសម្រេចចិត្តបដិសេធផែនការអាមេរិក។ ប៉ាឡេស្ទីនបានទទួលជំនួយពីឥណ្ឌូណេស៊ី និងទុយនីស៊ី ដែលជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការប្រជាជាតិ។
នៅថ្ងៃអង្គារខាងមុខនេះ បើមានសមាជិកណា បោះឆ្នោតអនុប្បវាទលើផែនការរបស់លោកអាប៉ាស់ នោះជាជោគជ័យសម្រាប់អាមេរិកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ