ប្រធានាធិបតីអស់អាណត្តិអាហ្វហ្កានីស្ថានលែងរអានឹងនិយាយបរិហារអាមេរិក
នៅថ្ងៃចុងក្រោយនៃការកាន់អំណាចរបស់ខ្លួន ប្រធានាធិបតីអស់អាណត្តិ លោកអាមីដ កាហ្សៃ បានថ្លែងសុន្ទរកថា វាយប្រហារទៅលើរដ្ឋបាលអាមេរិក។ កាលពីថ្ងៃអង្គារទី ២៣ កញ្ញា លោកអាមីដ កាហ្សៃ ដែលត្រូវបានសហរដ្ឋអាមេរិកលើកបន្តុបជាប្រធានាធិបតីអាហ្វហ្កានីស្ថាន កាលពី១៣ឆ្នាំមុន បាននិយាយចោទប្រកាន់ខ្លាំងៗអាមេរិកថា ជាអ្នកទទួលខុសត្រូវ ធ្វើឲ្យមានសង្រ្គាម នៅអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
លោកអាមីដ កាហ្សៃ បានឡើងក្លាយជាប្រធានាធិបតីអាហ្វហ្កានីស្ថាន នៅឆ្នាំ ២០០១ បន្ទាប់ពីអាមេរិក និងអង្គការអូតង់ប្រើកម្លាំងយោធា បណ្តេញពួកតាលីបង់ ពីអំណាច។ ប៉ុន្តែ នៅប៉ុន្មានឆ្នាំចុងក្រោយនេះ ទំនាក់ទំនងរវាងលោកអាមីដ កាហ្សៃ និងអាមេរិកបានធ្លាក់ចុះដល់ចំណុចសូន្យ បន្ទាប់ពីលោកអាមីដ កាហ្សៃ បានបដិសេធមិនចុះហត្ថលេខា លើកិច្ចព្រមព្រៀងទ្វេភាគី ដែលនៅក្នុងនោះ អាមេរិកទាមទារអភ័យឯកសិទ្ធិឲ្យទាហានរបស់ខ្លួន ដែលត្រូវនៅបន្តតាំងទី ក្រោយកងទ័ពអូតង់ដកអស់ពីអាហ្វហ្កានីស្ថាន នៅចុងឆ្នាំនេះ។
ទាំងភាគីអាមេរិក និងលោកប្រធានាធិបតីអាហ្វហ្កានីស្ថានអស់អាណត្តិ បានលេងល្បែងរិះគន់គ្នាទៅវិញ ទៅមក ដោយអាមេរិកបានចោទអតីតប្រមុខរដ្ឋាភិបាលអាហ្វហ្កានីស្ថានពីរឿងពុករលួយ។ ចំណែកលោកអាមីដ កាហ្សៃបានចោទប្រកាន់មិនលើកថ្ងៃ ថា អាមេរិកជាអ្នកបង្កឲ្យមានសង្រ្គាមនៅអាហ្វហ្កានីស្ថាន។ លោកកាហ្សៃហ៊ាននិយាយទៅដល់ថា អាមេរិកជាអ្នកនៅពីក្រោយការវាយប្រហាររបស់ពួកតាលីបង់ ព្រោះអាមេរិកមានមហិច្ឆតាចង់រក្សាមូលដ្ឋានទ័ពរបស់ខ្លួន នៅក្នុងទឹកដីអាហ្វហ្កានីស្ថាន។
នៅថ្ងៃអង្គារម្សិលមិញនេះទៀត នៅក្នុងឱកាសពិធីនិយាយលាសមាជិករដ្ឋាភិបាល លោកអតីតប្រធានាធិបតីអាហ្វហ្កានីស្ថាន បាននិយាយរំលឹកថា សង្រ្គាមនៅអាហ្វហ្កានីស្ថានមិនមែនជាសង្រ្គាមរបស់ប្រជាជនអាហ្វហ្កានីស្ថានទេ ប៉ុន្តែ ជាសង្រ្គាមដែលគេតម្រូវឲ្យអាហ្វហ្កានីស្ថានទទួលយក ហើយដែលអ្នកដែលរងគ្រោះ គឺប្រជាជនរបស់ប្រទេសនេះ។
សូមបញ្ជាក់ថា សង្រ្គាម១៣ឆ្នាំប្រឆាំងនឹងក្រុមតាលីបង់ បានសម្លាប់ប្រជាជនអាហ្វហ្កានីស្ថានរាប់ម៉ឺននាក់។ អាមេរិក និងប្រទេសដទៃ សមាជិករបស់អូតង់វិញបានបាត់បង់ទាហានរបស់ខ្លួន ជាង២២០០នាក់ នៅក្នុងសង្រ្គាមអាហ្វហ្កានីស្ថាន។
ក្រៅពីអាមេរិក លោកកាហ្សៃ បានចោទផងដែរ ប្រទេសជិតខាង ប៉ាគីស្ថានថា បានលូកដៃ នៅក្នុងនយោបាយការបរទេសរបស់អាហ្វហ្កានីស្ថាន។ សម្រាប់លោកកាហ្សៃដដែល សន្តិភាពអាចកើតមាននៅអាហ្វហ្កានីស្ថាន នៅពេលណាដែលអាមេរិក និងប៉ាគីស្ថានប្រាថ្នាចង់បាន។
ដូច្នេះ នៅថ្ងៃចុងក្រោយនៃអាណត្តិរបស់ខ្លួន ប្រធានាធិបតីចេញពីតំណែង បានថ្លែងផ្តាំផ្ញើផងដែរដល់ប្រធានាធិបតីថ្មី ឲ្យប្រុងប្រយ័ត្នឲ្យមែនទែននឹងអាមេរិក និងប្រទេសលោកខាងលិចផ្សេងទៀត។
លោកអាស្រាហ្វ ហ្កានី ប្រធានាធិបតីថ្មី ដែលនឹងស្បថចូលកាន់តំណែង នៅថ្ងៃទី ២៩កញ្ញាខាងមុខ ធ្លាប់បានសន្យាចុះកិច្ចព្រមព្រៀងទ្វេភាគីអាមេរិក ដែលនិយាយពីការបន្តវត្តមានទ័ពអាមេរិក នៅក្នុងទឹកដីអាហ្វហ្កានីស្ថាន ក្រោយឆ្នាំ ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ