អង្គការសហប្រជាជាតិបើកមហាសន្និបាទប្រចាំឆ្នាំ
បណ្តាមេដឹកនាំ និងប្រមុខការទូតមកពី១៩៣ប្រទេសជុំវិញពិភពលោកបានជួបប្រជុំគ្នាកាលពីថ្ងៃពុធ ម្សិលម៉ិញក្នុងឱកាសបើកមហាសន្និបាទប្រចាំឆ្នាំរបស់អង្គការសហប្រជាជាតិ នាទីក្រុងញូវយ៉ក។ ប្រធានបទសំខាន់ៗដែលពិភពលោកកំពុងប្រឈមក្នុងពេលបច្ចុប្បន្ននេះត្រូវបានលោកអគ្គលេខាធិការអង្គការសហប្រជាជាតិ បាន គីមូន ប្រកាសឡើង។
ចុះផ្សាយនៅថ្ងៃ៖
ស្តាប់ - ០២:០២
លោកអគ្គលេខាធិការអង្គការសហប្រជាជាតិ បាន គីមូនបានស្នើសុំអោយបណ្តាមេដឹកនាំលើពិភពលោកស្វែងរកបណ្តុះ «គ្រាប់ពូជនៃក្តីសង្ឃឹម» ក្នុងពេលដែលពិភពលោកហាក់ដូចជាបែកបាក់ជាចំណែកតូចៗដោយសារអំពើហឹង្សា និងភ្លើងសង្គ្រាមដែលកំពុងឆាបឆេះស្ទើរគ្រប់ទីកន្លែង។
នៅក្នុងសុន្ទរកថាបើកមហាសន្និបាទប្រចាំឆ្នាំរបស់អង្គការសហប្រជាជាតិ លោក បាន គីមូន បានរំលឹកពីបញ្ហាធំៗមួយចំនួនដូចជា វិបត្តិនៅប្រទេសអ៊ុយក្រែន ការគំរាមកំហែងរបស់ពួកជីហាតនៅប្រទេសស៊ីរី និងប្រទេសអ៊ីរ៉ាក់ ការវាយប្រហាររបស់អ៊ីស្រាអ៊ែលមកលើតំបន់ហ្គាហ្សា និងអំពើហឹង្សាដែលប្រព្រឹត្តដោយក្រុម Boko Haram នៅប្រទេសនីហ្សេរីយ៉ាជាដើម។ក្រៅពីនោះផងដែរ លោក បាន គីមូន បានលើកយកប្រធានបទផ្សេងទៀតដូចជា ការរីករាលដាលនៃជំងឺ Ebola នៅទី្វបអាហ្វ្រិក ការលេចចេញឡើងវិញនៃសញ្ញាសង្គ្រាមត្រជាក់រវាងប្រទេសមហាអំណាច និងអំពើហឹង្សាដែលកើតចេញពីបដិវត្តផ្កាម្លិះនៅតាមបណ្តាប្រទេសអារ៉ាប់ ភាពក្រីក្រជុំវិញពិភពលោក និងការប្រែប្រួលអាកាសធាតុជាដើម។
សង្គ្រាមប្រឆាំងនឹងពួកជីហាតត្រូវបានគេយល់ឃើញថាជាសំណុំរឿងដ៏ក្តៅគគុកជាងគេនៅក្នុងជំនួបនេះបន្ទាប់ពីសហរដ្ឋអាមេរិក និងសម្ព័ន្ធមិត្តអារ៉ាប់បានបើកការវាយប្រហារតាមផ្លូវអាកាសក្នុងរយៈពេលប៉ុន្មានថ្ងៃចុងក្រោយនេះ។
បណ្តាអ្នកការទូតដែលមានវត្តមាននៅក្នុងមហាសន្និបាទនេះបានយល់ឃើញថា នេះជាលើកទីមួយហើយបន្ទាប់ពីសង្គ្រាមលោកលើកទី២ ដែលពិភពលោកក្នុងពេលបច្ចុប្បន្នកំពុងប្រឈមចំពោះចំនួនជនភៀសខ្លួនរាប់លាននាក់ដែលពុំធ្លាប់មានពីមុនមក។នៅក្នុងនោះយើងឃើញមានជំលោះនៅប្រទេសស៊ីរី ប្រទេសអ៊ីរ៉ាក់ សាធារណរដ្ឋអាហ្វ្រិកកណ្តាល និងប្រទេសស៊ូដង់ខាងត្បូង។ គួរកត់សំគាល់ផងដែរថា គ្រាន់តែជំលោះនៅប្រទេសស៊ីរីរយៈពេល៤ឆ្នាំចុងក្រោយនេះបានបង្ករអោយមានការបាត់បង់អាយុជីវិតមនុស្ស១៩ ម៉ឺននាក់។
នៅក្នុងឱកាសនោះ លោកប្រធានាធិបតីសហរដ្ឋអាមេរិក បារ៉ាក់ អូបាមាបានឡើងថ្លែងសុន្ទរកថាដោយសង្កត់ធ្ងន់ថាពិភពលោកកំពុងស្ថិតនៅរវាងសង្គ្រាម និងសន្តិភាព ហើយសហរដ្ឋអាមេរិចកសន្យាដឹកនាំសម្ព័ន្ធភាពដើម្បីប្រយុទ្ធប្រឆាំងនឹង «បណ្តាញមរណៈ» របស់ពួកជ្រុលនិយមជីហាត ដែលកំពុងបង្ករភាពភ័យខ្លាចនៅតំបន់មជ្ឈឹមបូព៌ា។ លោក អូបាម៉ា ក៏បានទទូចសុំអោយបណ្តាប្រទេសនៅមជ្ឈឹមបូព៌ាជួយកាត់បន្ថយចលនាជ្រុលនិយមរបស់ពួកជីហាត ជាពិសេសទប់ស្កាត់ការឧបត្ថម្ភថវិការដល់ពួកភេរវករ។សូមបញ្ជាក់ផងដែរថាមហាសន្និបាតអង្គការសហប្រជាជាតិនឹងត្រូវបិទបញ្ជប់នៅថ្ងៃទី៣០ខែកញ្ញាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ