បាតុកម្មនៅហុងកុងប្រឆាំងនឹងការរឹតត្បឹតសិទ្ធិសេរីភាពពីសំណាក់ក្រុងប៉េកាំង
បណ្តាជនហុងកុងរាប់ពាន់នាក់ បាននាំគ្នាចេញធ្វើបាតុកម្ម នៅថ្ងៃចន្ទនេះ ដើម្បីនាំគ្នាតវ៉ាប្រឆាំងនឹងនយោបាយរបស់រដ្ឋាភិបាលក្រុងប៉េកាំង ដែលពួកគេយល់ថា ជាការរឹតត្បឹតកាន់តែខ្លាំងឡើង នូវសិទ្ធិសេរីភាព និងស្វយ័តភាពនៃដែនដីហុងកុង។ បាតុកម្មនេះបានកើតឡើង តែមួយសប្តាហ៍ប៉ុណ្ណោះ ក្រោយពីអាជ្ញាធរហុងកុងបានប្រកាសបិទគណបក្សមួយដែលមាននិន្នាការឯករាជ្យនិយម។
ចុះផ្សាយនៅថ្ងៃ៖ កែប្រែថ្ងៃទី៖
បាតុកម្ម នៅថ្ងៃចន្ទទី១តុលានេះ គឺចំនឹងថ្ងៃបុណ្យជាតិចិន ដែលបក្សកុម្មុយនិស្តចិនកំណត់យកជាថ្ងៃរំឭកខួបនៃការចាប់កំណើតរបបសាធារណរដ្ឋប្រជាមានិតចិន ក៏ប៉ុន្តែ ជារៀងរាល់ឆ្នាំ សកម្មជនប្រជាធិបតេយ្យនៅហុងកុងតែងតែនាំគ្នាឆ្លៀតយកឱកាសនេះ ដើម្បីធ្វើបាតុកម្មតវ៉ាជំទាស់នឹងការជ្រៀតជ្រែករបស់រដ្ឋាភិបាលក្រុងប៉េកាំង មកលើកិច្ចការរបស់ហុងកុងដែលជាដែនដីស្វយ័ត និងជាពិសេស គឺតវ៉ាប្រឆាំងនឹងវិធានការរឹតត្បឹតសិទ្ធិសេរីភាពរបស់ប្រជាជនហុងកុង។
ការព្រួយបារម្ភពីការរឹតត្បឹតសិទ្ធិសេរីភាពពីសំណាក់រដ្ឋាភិបាលក្រុងប៉េកាំងនេះកំពុងតែកើតមានកាន់តែខ្លាំងឡើង ក្រោយពីអាជ្ញាធរទើបនឹងបានចេញបម្រាមលែងឲ្យគណបក្សឯករាជ្យនិយមមួយធ្វើសកម្មភាពនៅហុងកុងតទៅទៀត ដោយលើកយកហេតុផលសន្តិសុខជាតិមកធ្វើជាសំអាង។
មេដឹកនាំចលនាប្រជាធិបតេយ្យហុងកុង គឺ Joshua Wong ដែលបានចូលរួមក្នុងបាតុកម្ម នៅថ្ងៃចន្ទនេះដែរ បានលើកឡើងពីក្តីបារម្ភថា គណបក្សរបស់លោកក៏អាចនឹងត្រូវប្រឈមមុខនឹងការហាមឃាត់ពីសំណាក់អាជ្ញាធរដូចគ្នានេះដែរ ដោយសារតែគណបក្សនេះតែងតែធ្វើការតស៊ូមតិការពារស្វយ័តភាពដែនដីហុងកុង ទល់នឹងការលូកដៃជ្រៀតជ្រែកពីសំណាក់បក្សកុម្មុយនិស្តចិន។
ក៏ប៉ុន្តែ អ្វីដែលជាការកត់សម្គាល់ ប្រឈមមុខនឹងក្តីបារម្ភអំពីការកើនឡើងនៃនយោបាយរឹតត្បឹតសិទ្ធិសេរីភាពពីសំណាក់ក្រុងប៉េកាំងនេះ ចំនួនអ្នកចូលរួមបាតុកម្មនៅថ្ងៃចន្ទនេះ បែរជាមានចំនួនធ្លាក់ចុះទៅវិញ បើធៀបទៅនឹងឆ្នាំមុនៗ។ យោងតាមតួលេខដែលផ្តល់ដោយអាជ្ញាធរ បាតុកម្មនៅថ្ងៃចន្ទនេះ មានមនុស្សចូលរួមប្រមាណជា ១៥០០នាក់ប៉ុណ្ណោះ។ រីឯ អ្នកយកការណ៍ឲ្យទីភ្នាក់ងារព័ត៌មានអាអែហ្វប៉េដែលស្ថិតនៅទីតាំងបាតុកម្មបានសង្កេតឃើញថា ចំនួនបាតុករទំនងជាមានច្រើនជាងតួលេខរបស់អាជ្ញាធរ ក៏ប៉ុន្តែ បើទោះបីជាយ៉ាងណាក៏ដោយ ក៏នៅតែតិចជាងយ៉ាងដាច់ឆ្ងាយ ពីបាតុកម្ម កាលពីឆ្នាំ២០១៧កន្លងទៅ ដែលកាលណោះ មានមនុស្សចូលរួមរហូតដល់ទៅរាប់ម៉ឺននាក់។
យោងតាមសកម្មជនប្រជាធិបតេយ្យហុងកុង ការធ្លាក់ចុះនៃចំនួនអ្នកចូលរួមបាតុកម្មនេះ គឺដោយសារតែប្រជាជន ជាពិសេស យុវជនហុងកុងមួយចំនួនមានការធ្លាក់ទឹកចិត្ត ក្រោយពីការតវ៉ាប្រឆាំងយ៉ាងខ្លាំងក្លាអស់រយៈពេលប៉ុន្មានឆ្នាំកន្លងទៅនេះ ជាពិសេស គឺចាប់ពីឆ្នាំ២០១៤មក ហាក់ដូចជាមិនបានទទួលផលអ្វី ក្នុងពេលដែលឥទ្ធិពលរបស់បក្សកុម្មុយនិស្តចិន នៅហុងកុង ចេះតែបន្តកើនឡើងឥតឈប់ឈរពីមួយថ្ងៃទៅមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ