WTO៖ ការដោះដូរពាណិជ្ជកម្មសកលនឹងអាចធ្លាក់ចុះជាង ៣០ % ដោយសារវិបត្តិកូវីដ១៩
អង្គការពាណិជ្ជកម្មពិភពលោក (WTO) នៅថ្ងៃពុធ ទី៨ មេសា បានព្យាករថា កំណើនពាណិជ្ជកម្មពិភពលោក នឹងអាចធ្លាក់ចុះដល់ចំនួនមួយភាគបី ឬក៏ស្មើនឹងជាង ៣០% នៅឆ្នាំ ២០២០ ដោយសារតែជំងឺរាតត្បាតសកល-កូវីដ១៩។ ទន្ទឹមគ្នានេះ អង្គការពាណិជ្ជកម្មពិភពលោកក៏បានព្រមានដែរថា ការធ្លាក់ចុះទាបដែលមិនអាចជៀសផុតនៃការដោះដូរពាណិជ្ជកម្ម នឹងជះផលវិបាកធ្ងន់ធ្ងរខ្លាំងដល់មនុស្សលោក។
ចុះផ្សាយនៅថ្ងៃ៖
តាមរយៈសេចក្តីថ្លែងការណ៍មួយ អង្គការពាណិជ្ជកម្មពិភពលោកបានលើកឡើងថា ការដោះដូរពាណិជ្ជកម្មនឹងអាចធ្លាក់ចុះចន្លោះពី ១៣% ទៅ ៣២% នៅក្នុងឆ្នាំ ២០២០នេះ ដោយសារជំងឺឆ្លងកូវីដ១៩ វាយសង្គ្រប់ខ្លាំងពេកទៅលើសកម្មភាពសេដ្ឋកិច្ច ហើយនិងជីវិតរស់នៅប្រចាំថ្ងៃរបស់មនុស្សនៅទូទាំងសកលលោក។
ប្រធានអង្គការពាណិជ្ជកម្មពិភពលោក លោក Roberto Azevedo បានព្រមានថា ការធ្លាក់ចុះនេះអាចជាវិបត្តិសេដ្ឋកិច្ចដ៏អាក្រក់បំផុតមួយសម្រាប់ពិភពលោកទាំងមូល។
តាមពិតទៅ ការដោះដូរពាណិជ្ជកម្ម ទទួលរងគ្រោះលែងអាចដើរទៅមុខបានល្អ តាំងតែពីមុនមានការផ្ទុះឡើងនៃមេរោគកូរ៉ូណាថ្មីទៅទៀត។ ក៏ប៉ុន្តែ សង្វាក់ពាណិជ្ជកម្មសកល បានធ្លាក់ទាបខ្លាំងគួរឲ្យបារម្ភ បន្ទាប់ពីសន្ទុះនៃការវាយលុករបស់កូវី១៩ ទៅលើប្រទេសជាច្រើន កាន់តែមានសភាពខ្លាំងក្លាទៅៗ។
នៅក្នុងការព្យាករប្រចាំឆ្នាំមួយ សមាជិករបស់អង្គការពាណិជ្ជកម្មពិភពលោក ដែលមាន ១៦៤ ប្រទេស បានគូសបង្ហាញថា ដំណើរការពាណិជ្ជកម្មបានថយចុះរួចទៅហើយនៅឆ្នាំ ២០១៩ មុនពេលការលេចចេញវីរុសកូវី១៩ ទៅទៀត។
ដោយឡែក សភាពការណ៍កាន់តែធ្លាក់ចូលក្នុងគ្រោះថ្នាក់ធំ បន្ទាប់ពីកូវីដ១៩ ចម្លងទៅដល់មនុស្សជាង ១លាន ៤សែន នៅជុំវិញពិភពលោក និងបានសម្លាប់មនុស្សជាង ៨ ម៉ឺននាក់។ ប្រទេសជាងពាក់កណ្តាលនៃភពផែនដី អនុវត្តនូវវិធានការរឹតត្បិតដូចជាបិទខ្ទប់ទីក្រុង ឬក៏ប្រទេស និងបង្ខាំងឲ្យប្រជាជននៅតែក្នុងផ្ទះ ហើយសកម្មភាពសេដ្ឋកិច្ចរបស់ប្រទេសទាំងនោះក៏ត្រូវឈរទ្រឹងនៅមួយកន្លែងដែរ។
អង្គការពាណិជ្ជកម្មពិភពលោក បាននិយាយថា វិបត្ដិកូវីដ១៩ ធ្វើឲ្យគេនឹកដល់ វិបត្ដិហិរញ្ញវត្ថុឆ្នាំ ២០០៨។ ក៏ប៉ុន្តែ ដោយសារតែទំហំនៃផលប៉ះពាល់ បង្កឡើងដោយកូវីដ១៩ លើសេដ្ឋកិច្ចពិភពលោក ចេះតែរីកធំទៅៗ គេគិតថាស្ថានការណ៍ អាចនឹងអាក្រក់ជាងវិបត្តិហិរញ្ញវត្ថុសកលកាលពីឆ្នាំ ២០០៨។
រហូតមកទល់នឹងពេលនេះ គេនៅមិនទាន់ដឹងច្បាស់នៅឡើយនោះទេតើថាអ្វីៗ នឹងត្រលប់មករកសភាពធម្មតាវិញនៅពេលណានោះ។ ដោយឡែក មានសេណារីយ៉ូពីរអាចនឹងកើតឡើង ដែលទី១នោះគឺ គេអាចគ្រប់គ្រងវិបត្តិកូវីដបាននៅពាក់កណ្តាលឆ្នាំ ២០២០ ហើយការដោះដូរពាណិជ្ជកម្មសកលនឹងចាប់ស្ទុះងើបក្បាលឡើងវិញ។ សេណារីយ៉ូទី២ គឺវិបត្តិកូវីដ១៩ នៅបន្តវាយប្រហារពិភពលោក ហើយការដោះដូរពាណិជ្ជកម្មនៅតែបន្តដាំក្បាលចុះ។
បើតាមអង្គការពាណិជ្ជកម្មពិភពលោក ទោះស្ថិតនៅក្រោមសេណារីយ៉ូណាមួយក៏ដោយ ការដោះដូរមុខទំនិញក្នុងលោក នឹងធ្លាក់ចុះចំនួនពីរខ្ទង់ក្នុងឆ្នាំ២០២០ ហើយទ្វីបអាមេរិកខាងជើង និងអាស៊ីនឹងរងការវាយប្រហារខ្លាំងជាងគេបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ