កូរ៉េខាងត្បូងនិងអាមេរិកបើកសមយុទ្ធយោធារួមគ្នាតាមការគ្រោងទុក
នៅកូរ៉េខាងត្បូង ថ្ងៃចន្ទនេះ កងទ័ពកូរ៉េខាងត្បូងនិងអាមេរិកបានបើកសមយុទ្ធរួមគ្នា តាមការគ្រោងទុក ទោះជាមានការថ្កោលទោសពីកូរ៉េខាងជើងក៏ដោយ។ ប្រធានាធិបតីកូរ៉េខាងត្បូងបានប្រាប់អោយលោកគឹម ជុងអ៊ុន កុំយកសមយុទ្ធយោធានេះ ធ្វើជាលេសបន្តផ្គើន បន្ថែមភាពតានតឹងក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
សមយុទ្ធយោធាប្រចាំឆ្នាំ រវាងអាមេរិកនិងកូរ៉េខាងត្បូងបានដំណើរការដូចគ្រោងទុក នៅថ្ងៃចន្ទនេះ។ ទាហានទាំង២ប្រទេសត្រូវធ្វើសមយុទ្ធនេះ រយៈពេល២សប្តាហ៍។ លោកមូន ចែអ៊ីន បានព្រមានកូរ៉េខាងជើង ថា កូរ៉េខាងជើងត្រូវដឺងថា គឺការផ្គើនដដែលៗរបស់កូរ៉េខាងជើងខ្លួនឯងហ្នឹងហើយ ដែលបង្ខំអោយកូរ៉េខាងត្បូងនិងអាមេរិកធ្វើសមយុទ្ធយោធារួមគ្នាដូច្នេះ។ ប្រធានាធិបតីកូរ៉េខាងត្បូងព្រមានកូរ៉េខាងជើង កុំអោយយក សមយុទ្ធនេះជាលេស ដើម្បីបន្តបន្ថែមភាពតានតឹងតទៅទៀត។ ម្សិលមិញនេះ ក្រុងព្យុងយ៉ាងបានចាត់ទុកសមយុទ្ធយោធាកូរ៉េខាងត្បូង-អាមេរិក ថាជាការយកសាំងមកជះលើភ្លើង។
សមយុទ្ធយោធាប្រចាំឆ្នាំរួមគ្នា រវាងកូរ៉េខាងត្បូង និងអាមេរិក គឺមានតាំងពីឆ្នាំ១៩៧៦មក គេអោយឈ្មោះថា អ៊ុលឈី ហ្វ្រ៊ីដុម ហ្កាដៀន Ulchi Freedom Guardian ឧទ្ទិសដល់មេបញ្ជាការយោធាមួយរូប ដែលបានការពារទឹកដីកូរ៉េ ប្រឈមនឹងការឈ្លានពានរបស់ចិន។ សមយុទ្ធយោធាកូរ៉េខាងត្បូង-អាមេរិកឆ្នាំ២០១៧នេះ មានទាហានចូលរួមរាប់ម៉ឺននាក់ គឺមាន៥ម៉ឺននាក់នៅខាងកូរ៉េខាងត្បូង និង១ម៉ឺន៧ពាន់៥រយនាក់ ខាងសហរដ្ឋអាមេរិក។ គិតជាតួលេខគឺតិចជាងសមយុទ្ធ ឆ្នាំ២០១៦មុននេះ។
សារព័ត៌មានកូរ៉េខាងត្បូងលើកឡើងថា អាមេរិកគ្រោងមិនប្រើនាវាផ្ទុកយន្តហោះ ក្នុងសមយុទ្ធនេះទេ។ គេមើលឃើញថា អាមេរិកប្រហែលជាចង់បន្ថយភាពតានតឹងជាមួយកូរ៉េខាងជើង ទើបបានជាកាត់បន្ថយចំនួនទាហាន និងមិនប្រើនាវាផ្ទុកយន្តហោះ ក្នុងសមយុទ្ធជាមួយកូរ៉េខាងត្បូង។ ប៉ុន្តែ ម្សិលមិញនេះ រដ្ឋមន្ត្រីការពារជាតិអាមេរិក លោក ចេម ម៉ាទីស បានបដិសេធថា មិនបានព្យាយាមបន្ថយភាពតានតឹងជាមួយក្រុងព្យុងយ៉ាងទេ។ លោកម៉ាទីសលើកឡើងថា អាមេរិកមានចេតនាបន្ថយចំនួនទាហានគឺដើម្បីបំពេញទិសដៅសមយុទ្ធប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ