កូរ៉េខាងត្បូងប្រកាសឲ្យដឹងពីការផ្តាច់ខ្លួនវរសនីយឯកកូរ៉េខាងជើងម្នាក់
នៅថ្ងៃចន្ទ ទី១១ មេសានេះ រដ្ឋាភិបាលកូរ៉េខាងត្បូងបានប្រកាសឲ្យដឹងជាផ្លូវការពីការផ្តាច់ខ្លួនរបស់វរសេនីយឯកកូរ៉េខាងជើងម្នាក់ចូលក្នុងទឹកដីកូរ៉េខាងត្បូងកាលពីឆ្នាំ ២០១៥ កន្លងទៅ។ តែរដ្ឋាភិបាលក្រុងសេអ៊ូលមិនបានបញ្ជាក់លំអិតលើអត្តសញ្ញាណរបស់មន្រ្តីយោធាជាន់ខ្ពស់កូរ៉េខាងជើងរូបនោះទេ។ បើផ្អែកតាមទីភ្នាក់ងារផ្លូវការកូរ៉េខាងត្បូងឈ្មោះ Yonhap ឲ្យដឹងថា វរសេនីយឯកកូរ៉េខាងជើងផ្តាច់ខ្លួន គឺជាអ្នកទទួលខុសត្រូវផ្នែកប្រតិបត្តិការចារកម្មលើកូរ៉េខាងត្បូង។
ចុះផ្សាយនៅថ្ងៃ៖
វាមិនមែនជារឿងគួរឲ្យភ្ញាក់ផ្អើលទេដែលពលរដ្ឋនៅកូរ៉េខាងជើងបានរត់ និងកំពុងបន្តព្យាយាមរត់ទៅកាន់ទឹកដីកូរ៉េខាងត្បូង។ តែអ្វីដែលគួរឲ្យភ្ញាក់បន្តិចនៅក្នុងករណីរូបវរសេនីយឯកដែលគេមិនបានស្គាល់ឈ្មោះគឺថា លោកជាមន្រ្តីយោធាជាន់ខ្ពស់កូរ៉េខាងជើងមួយរូបដែលបានផ្តាច់ខ្លួនទៅកាន់ទឹកដីកូរ៉េខាងត្បូងក្បែរខាង។ ព័ត៌មានមួយនេះបានធ្លាក់មក ៣ថ្ងៃបន្ទាប់ពីរដ្ឋាភិបាលក្រុងសេអ៊ូលបានប្រាប់ឲ្យដឹងពីការផ្តាច់ខ្លួនរបស់ពលរដ្ឋកូរ៉េខាងជើងចំនួន ១៣នាក់ចូលទឹកដីកូរ៉េខាងត្បូងកាលពីថ្ងៃព្រហស្បតិ៍ ទី៧ មេសាថ្មីៗនេះ។
ពលរដ្ឋកូរ៉េខាងជើងទាំង ១៣នាក់ដែលមានស្រ្តី ១២នាក់ជាបុគ្គលិកបម្រើការងារនៅក្នុងភោជនីយដ្ឋានមួយរបស់រដ្ឋកូរ៉េខាងជើងស្ថិតប៉ែកខាងកើតប្រទេសចិន។ បុគ្គលិកទាំង ១៣នាក់បានរត់ទៅកូរ៉េខាងត្បូងដោយឆ្លងកាត់តាមប្រទេសអាស៊ីអាគ្នេយ៍មួយ។ កន្លងមក ក៏ធ្លាប់មានបុគ្គលិកក្នុងភោជនីយដ្ឋានដដែលនេះផ្តាច់ខ្លួនចូលក្នុងទឹកដីកូរ៉េខាងត្បូងដែរ តែជាលក្ខណៈបុគ្គល ពោលមិនមែនជាក្រុមដូចលើកនេះទេ។
ជាទូទៅ ទីក្រុងសេអ៊ូលកម្របញ្ចេញជាសាធារណៈនូវព័ត៌មាន ឬអត្តសញ្ញាណរបស់ពលរដ្ឋកូរ៉េខាងជើងផ្តាច់ខ្លួនទៅកាន់ទឹកដីកូរ៉េខាងត្បូង ពិសេសរូបពលរដ្ឋកូរ៉េខាងជើងណាដែលមានតួនាទីនៅក្នុងរដ្ឋាភិបាល។ មូលហេតុ គឺចង់រក្សាសន្តិសុខរបស់ក្រុមអ្នកផ្តាច់ខ្លួនទាំងនោះ និងម្យ៉ាងទៀត ទីក្រុងសេអ៊ូលក៏មិនបង្កឲ្យមានបញ្ហាការទូតជាមួយប្រទេសអាស៊ីផ្សេងដែលអ្នកផ្តាច់ខ្លួនបានរត់ឆ្លងកាត់ មុននឹងទៅដល់ទឹកដីកូរ៉េខាងត្បូង។
យ៉ាងណាក៏ដោយ ដំណឹងផ្តាច់ខ្លួនរបស់វរសេនីយឯកកូរ៉េខាងជើងម្នាក់បានទទួលការរិះគន់យ៉ាងខ្លាំងពីក្រុមប្រឆាំងនៅកូរ៉េខាងត្បូង។ ក្រុមប្រឆាំងបានចោទរដ្ឋាភិបាលក្រុងសេអ៊ូលពីបទយកដំណឹងតាំងពីឆ្នាំទៅមកប្រកាសពេលនេះដើម្បីកេងចំណេញនយោបាយ ពិសេសកេងចំណេញសន្លឹកឆ្នោតនៅ ២ថ្ងៃ មុនការរៀបចំឆ្នោតសភា។ តែរដ្ឋាភិបាលតាមរយៈក្រសួងការពារជាតិបានឆ្លើយបដិសេធចំពោះការចោទប្រកាន់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ