ម៉ាឡេស៊ីចេញផ្សាយរបាយការណ៍ស៊ើបអង្កេតករណីបាត់យន្តហោះ MH370 តែគ្មានតម្រ៉ុយអ្វីថ្មី
របាយការណ៍ផ្លូវការចុងក្រោយ ស្តីពីការស៊ើបអង្កេតលើករណីបាត់យន្តហោះម៉ាឡេស៊ី ជើងហោះហើរ MH370 ត្រូវបានអាជ្ញាធរម៉ាឡេស៊ីចេញផ្សាយជាសាធារណៈ នៅថ្ងៃចន្ទនេះ។ ក៏ប៉ុន្តែ ការចេញផ្សាយរបាយការណ៍ដែលគេទន្ទឹងរង់ចាំជាយូរមកហើយនេះ មិនបានធ្វើឲ្យក្រុមគ្រួសារជនរងគ្រោះស្កប់ចិត្តនោះទេ ដោយសារតែពួកគេយល់ថា នៅក្នុងរបាយការណ៍នេះ គ្មានអ្វីថ្មីដែលគេមិនទាន់ដឹងរួចហើយនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ជាងបួនឆ្នាំមកហើយ ដែលយន្តហោះ MH370 ដឹកអ្នកដំណើរ និងអាកាសយានិក ២៣៩នាក់បានបាត់ស្រមោលឈឹង។ ជាងបួនឆ្នាំដែលអាជ្ញាធរម៉ាឡេស៊ី ដោយមានកិច្ចសហប្រតិបត្តិការពីអូស្រ្តាលី បានបើកប្រតិបត្តិការរុករកយន្តហោះ និងស៊ើបអង្កេតស្វែងរកមូលហេតុនៃការបាត់យន្តហោះ។ ជាងបួនឆ្នាំដែលក្រុមគ្រួសារជនរងគ្រោះទន្ទឹងរង់ចាំលទ្ធផលនៃការស៊ើបអង្កេតនេះ។
ក៏ប៉ុន្តែ នៅពេលដែលរបាយការណ៍ស៊ើបអង្កេតជាស្ថាពរត្រូវបានផ្សព្វផ្សាយ នៅថ្ងៃចន្ទនេះ ក្រុមគ្រួសារជនរងគ្រោះខ្លះបានបង្ហាញនូវការខកចិត្ត ខ្លះចោទជាសំណួរ ហើយខ្លះទៀតខឹងសម្បារ រហូតដើរចេញពីកិច្ចប្រជុំបង្ហាញរបាយការណ៍ ដោយសារតែពួកគេយល់ថា នៅក្នុងរបាយការណ៍នេះ គ្មានអ្វីថ្មី ក្រៅតែពីការរៀបរាប់យ៉ាងវែងអន្លាយពីការបាត់យន្តហោះ និងអំពីប្រតិបត្តិការតាមរុកបំណែកយន្តហោះនោះទេ ពោលគឺ គ្មានអ្វីថ្មី ដែលជាតម្រ៉ុយអាចឲ្យគេដឹងអំពីទីតាំងយន្តហោះដែលបាត់ ឬក៏មូលហេតុនៃការបាត់យន្តហោះនេះ។
ក្រុមគ្រួសារជនរងគ្រោះខ្លះបង្ហាញនូវការមិនសប្បាយចិត្ត ដែលការបង្ហាញរបាយការណ៍ស៊ើបអង្កេតនេះត្រូវបានធ្វើឡើង ដោយមន្រ្តីមកពីក្រសួងដឹកជញ្ជូនម៉ាឡេស៊ី ้ហើយមិនអាចឆ្លើយនឹងសំណួររបស់ក្រុមគ្រួសារជនរងគ្រោះបាន ដោយសារតែពួកគេមិនមែនជាអ្នកសរសេររបាយការណ៍។
គួររំឭកឡើងវិញថា យន្តហោះ MH370 បានបាត់ស្រមោលពីរ៉ាដា កាលពីថ្ងៃទី៨ ខែមីនា ឆ្នាំ២០១៤ ក្នុងអំឡុងពេលហោះហើរពីទីក្រុងគួឡាឡាំពួរ ទៅកាន់ទីក្រុងប៉េកាំង។ ប្រតិបត្តិការរុករកបំណែកយន្តហោះត្រូវបានគេធ្វើឡើង ទាំងលើផ្ទៃសមុទ្រ និងនៅបាតសមុត្រ ក្នុងផ្ទៃក្រឡាប្រមាណជា ១២ម៉ឺនគីឡូម៉ែត្រក្រឡា ក្នុងមហាសមុទ្រឥណ្ឌា ក៏ប៉ុន្តែ គ្មានលទ្ធផលអ្វីទាំងអស់។ រហូតមកទល់នឹងពេលនេះ គេនៅតែមិនដឹងថា តើយន្តហោះនេះនៅទីណាពិតប្រាកដ ហើយតើមូលហេតុអ្វីដែលធ្វើឲ្យយន្តហោះនេះបាត់សម្រោលឈឹងបែបនេះ។
សម្រាប់គ្រួសារជនរងគ្រោះ ការមិនដឹងអំពីមូលហេតុ និងដំណើររឿងពិតប្រាកដនៃការបាត់យន្តហោះនេះហើយ ដែលធ្វើឲ្យពួកគេពិបាកនឹងបើកទំព័រថ្មីនៅក្នុងដំណើរជីវិតរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ