រដ្ឋាភិបាលហ្វីលីពីន និង ក្រុមឧទ្ទាមចាប់ផ្តើមពិភាក្សាគ្នាពីការរំសាយអាវុធ
ក្រុមឧទ្ទាមផ្តាច់ទឹកដីកាន់សាសនាអ៊ីស្លាម នៅភាគខាងត្បូងប្រទេសហ្វីលីពីន បានព្រមព្រៀងជាមួយរដ្ឋាភិបាល ក្នុងការពិភាក្សាគ្នាអំពីដំណើរការរំសាយអាវុធ និងធ្វើសមាហរ័ណកម្ម។ ជាថ្នូរ រដ្ឋាភិបាលហ្វីលីពីនបានសន្យាថា នឹងចាត់ឲ្យតំបន់ដែលគ្រប់គ្រងដោយពួកឧទ្ទាមអ៊ីស្លាម ក្លាយជាតំបន់ស្វ័យត្នពិសេស។
ចុះផ្សាយនៅថ្ងៃ៖
ស្តាប់ - ០១:៤៥
បន្ទាប់ពីកិច្ចព្រមព្រៀងរវាងរដ្ឋាភិបាលហ្វីលីពីន និងក្រុមឧទ្ទាមផ្តាច់ទឹកដីអ៊ីស្លាម ត្រូវបានចុះហត្ថលេខា កាលពីខែមិនា ដើមឆ្នាំនេះ ភាគីទាំងពីរ បានចាប់ផ្តើមពិភាក្សាគ្នា អំពីចំណាត់ការនៃការរំសាយអាវុធ និងការធ្វើសមាហរ័ណកម្មរបស់ពួកឧទ្ទាម ចូលមកក្នុងសង្គមហ្វីលិពីនវិញ។ អាវុធ មួយចំនួនធំ ត្រូវគេរំពឹងថា ពួកឧទ្ទាមនឹងប្រគល់មកឲ្យរដ្ឋាភិបាលហ្វីលីពីនរក្សាទុក្ខ នាដំណាច់ឆ្នាំនេះ។
សូមបញ្ជាក់ថា ពួកឧទ្ទាមអ៊ីស្លាម ដែលមានឈ្មោះថា កងកម្លាំងរំដោះអ៊ីស្លាមម៉ូរ៉ូ(MILF) បានធ្វើការតស៊ូប្រយុទ្ធទាមទារឯករាជ្យ ក្នុងទឹកដីភាគខាងត្បូងហ្វីលីពីន គឺតំបន់ បាងគ្សាម៉ូរ៉ូ ដែលមានប្រជាជនកាន់សាសនាអ៊ីស្លាម ៥លាននាក់រស់នៅ។ ក្នុររយៈពេលប្រយុទ្ធជាច្រើនទសវត្សកន្លងមកនេះ មានមនុស្សជាច្រើនពាន់នាក់បានស្លាប់។ រដ្ឋាភិបាលហ្វីលីពីន បានសន្យាថា នឹងចាត់តំបន់ កាន់កាប់ដោយពួកឧទ្ទាមអ៊ីស្លាម ក្លាយជាតំបន់ស្វ័យត្នពិសេស។ ចំណែក ពួកឧទ្ទាមវិញ បានសន្យាថា នឹងប្រគល់អាវុធ ឈប់បាញ់តទៅទៀត។
ដើម្បីត្រួតពិនិត្យការប្រមូលអាវុធ ប្រកបដោយភាពស្មោះត្រង់ និងច្បាស់លាស់ ភាគីទាំងពីរបានព្រមព្រៀងគ្នា ហៅអ្នកជំនាញ បរទេសបីប្រទេស ជាអជ្ញារកណ្តាល គឺ ទួរគី ប្រ៊ុយណេ និង ន័រវ៉េហ្ស៍។ មេដឹកនាំក្រុមឧទ្ទាម បាននិយាយថា ការប្រគល់អាវុធទៅឲ្យរដ្ឋាភិបាលហ្វីលីពីនរក្សាទុក មិនមែនជាការងាយស្រួលធ្វើទេ។ ពួកគេសុខចិត្តបង្ខំចិត្តធ្វើ ព្រោះពួកគេត្រូវការឲ្យតំបន់ បាងគ្សាម៉ូរ៉ូ ក្លាយជាតំបន់ស្វ័យត្ន ដាច់ពីតំបន់ដ៍ទៃទៀតរបស់ហ្វីលីពីន ដែលភាគច្រើនសំបូរតែមនុស្សកាន់សាសនាកាតូលិក។
ការប្រគល់អាវុធ នឹងត្រូវធ្វើឡើងជាច្រើនដំណាក់។ ក្នុងពេលនេះ ពួកឧទ្ទាមត្រូវប្រគល់បញ្ជីររាយប្រភេទអាវុធ និងចំនួនអាវុធទាំងអស់។ ដោយឡែក រដ្ឋាភិបាលហ្វីលីពីន បានដាក់ស្នើសេចក្តីព្រាងច្បាប់ ស្តីពីការកែប្រែតំបន់ បាងគ្សាម៉ូរ៉ូ ឲ្យក្លាយជាតំបន់ស្វ័យត្ន ទៅសភាតំណាងរាស្រ្តហ្វីលីពីន កាលពីដើមខែ កញ្ញានេះ។ សភា នឹងធ្វើការអនុម័តច្បាប់នេះ នៅដើមឆ្នាំក្រោយ បើសិនជាអ្វីៗប្រព្រឹត្តទៅតាមការគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ