ភេរវកម្ម ១១ កញ្ញា ២០០១៖ព្រឹទ្ធសភាអាមេរិកអនុម័តច្បាប់ឲ្យប្តឹងអារ៉ាប៊ីសាអូឌីត
នៅសហរដ្ឋអាមេរិក ព្រឹទ្ធសភាបានអនុម័តជាឯកច្ឆន្ទលើច្បាប់មួយដែលនឹងអនុញ្ញាតឲ្យក្រុមគ្រួសារជនរងគ្រោះក្នុងមហាភេរវកម្មថ្ងៃ១១ កញ្ញា ២០០១ ប្តឹងពលរដ្ឋ និងមេដឹកនាំអារ៉ាប៊ីសាអូឌីតពីបទជាប់ពាក់ព័ន្ធនឹងមហាភេរវកម្មដែលមិនធ្លាប់កើតមានលើទឹកដីអាមេរិកាំង។ បន្ទាប់ព្រឹទ្ធសភា ច្បាប់ដ៏ចម្រូងចម្រាសមួយនេះនឹងត្រូវឆ្លងកាត់ការបោះឆ្នោតនៅសភាដែលគណបក្សប្រឆាំង គឺគណបក្សសាធារណរដ្ឋក៏កំពុងមានសម្លេងភាគច្រើនដូចនៅព្រឹទ្ធសភាដែរ។ តែលោកប្រធានាធិបតីអូបាម៉ាធ្លាប់បានព្រមានប្រើសិទ្ធិវេតូដើម្បីប្រឆាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:១៨
អ្វីៗបានចាប់ផ្តើមឡើងនៅក្រោយមហាភេរវកម្មថ្ងៃ១១ កញ្ញា ២០០១ នៅក្នុងទីក្រុងវ៉ាស៊ីតោន និងទីក្រុងញូយ៉ក។ នៅប៉ុន្មានថ្ងៃក្រោយថ្ងៃផ្ទុះភេរវកម្ម ១១ កញ្ញា ២០០១ សភាអាមេរិកបានបង្កើតឲ្យមានគណៈកម្មការស៊ើបអង្កេតមួយដើម្បីស្វែងរកអ្នកទទួលខុសត្រូវក្នុងទឹកដីអាមេរិកាំង និងនិងនៅបរទេសដែលជាប់ពាក់ព័ន្ធផ្ទាល់ ឬដោយប្រយោលនៅក្នុងអំពើភេរវកម្ម។ នៅក្នុងខែកក្កដាឆ្នាំ ២០០៤ គណៈកម្មការស៊ើបអង្កេតបានផ្សព្វផ្សាយជាសាធារណៈនូវរបាយការណ៍មួយដែលមានកម្រាស់ ៨៣៨ទំព័រដោយបានបញ្ជាក់ច្បាស់ៗថា ភេរវកម្មថ្ងៃ១១ កញ្ញា ២០០១ ជាស្នាដៃរបស់អង្គការភេរវនិយមអាល់កៃដាមានមេកើយឈ្មោះអ៊ូសាម៉ា បិនឡាដិនជ្រកកោណក្នុងទឹកដីអាហ្វហ្កានីស្ថាន។
នៅពេលនោះ គណៈកម្មការស៊ើបអង្កេតក៏បានដកការចោទប្រកាន់ចេញពីអ៊ីរ៉ាក់ និងពីអ៊ីរ៉ង់វិញ។ ទាក់ទងនឹងប្រទេសអារ៉ាប៊ីសាអូឌីត គណៈកម្មការស៊ើបអង្កេតក៏បានអះអាងថា គ្មានភស្តុតាងណាមួយដែលបញ្ជាក់ពីការទទួលខុសត្រូវរបស់រដ្ឋាភិបាល ឬមេដឹកនាំជាន់ខ្ពស់អារ៉ាប៊ីសាអូឌីតនៅក្នុងមហាភេរវកម្មថ្ងៃ១១ កញ្ញា ២០០១ ទេ។ តែនៅក្នុងរបាយការណ៍ដដែលនោះ គណៈកម្មការស៊ើបអង្កេតបានរក្សាទុកមិនផ្សព្វផ្សាយនូវជំពូក១ មានកម្រាស់ ២៨ទំព័រ និងដែលគេសង្ស័យថា មានជាប់ពាក់ព័ន្ធនឹងការទទួលខុសត្រូវរបស់រដ្ឋាភិបាលបរទេស។
ក្រុមអ្នកតំណាងរាស្រ្ត និងសមាជិកព្រឹទ្ធសភាអាមេរិកបន្តសង្ស័យលើអារ៉ាប៊ីសាអូឌីត
ក្រុមអ្នកតំណាងរាស្រ្ត និងក្រុមសមាជិកព្រឹទ្ធសភាអាមេរិកភាគច្រើនបានយល់ឃើញថា តិច ឬច្រើន និងដោយផ្ទាល់ ឬដោយប្រយោល អារ៉ាប៊ីសាអូឌីតពិតជាមានជាប់ពាក់ព័ន្ធនឹងមហាភេរវកម្មថ្ងៃ១១ កញ្ញា ២០០១។ ការហ៊ានអះអាងយ៉ាងដូចនេះដោយគេសំអាងលើហេតុផលចំនួន ៣ ទី១ នៅក្នុងចំណោមភេរវជនអត្តឃាតទំាង ១៩នាក់ដែលបានបើកយន្តហោះទៅទម្លាក់ខ្លួនកម្ទេចនៅក្នុងទីក្រុងវ៉ាស៊ីនតោន និងទៅបុកអាគារពាណិជ្ជកម្មពិភពលោក « World Trade Center » ទាំងពីរក្នុងទីក្រុងញូយ៉ក មាន ១៥នាក់ជាជនជាតិអារ៉ាប៊ីសាអូឌីត។
ទី២ ជនជាតិបារាំងម្នាក់ឈ្មោះ Zacarias Moussaoui ដែលតុលាការអាមរិកកាន់ទោសពីបទជាប់ពាក់ព័ន្ធនឹងភេរវកម្ម ១១ កញ្ញាបាននិយាយប្រាប់ក្រុមមេធាវីអាមេរិកក្នុងខែកុម្ភៈកន្លងទៅថា ក្រុមគ្រួសាររាជវង្សអារ៉ាប៊ីសាអូឌីតបានផ្តល់លុយរាប់សិបលានដុល្លារឲ្យអង្គការភេរវនិយមអាល់កៃដាក្នុងទសវត្សឆ្នាំ ៩០ និងហេតុផលទី៣ គឺការដែលគណៈកម្មការស៊ើបអង្កេតអាមេរិកបន្តលាក់ទុកមិនព្រមបញ្ចេញឯកសារទាំង ២៨ទំព័រដែលក្រុមគ្រួសារជនរងគ្រោះទាមទារឲ្យផ្សព្វផ្សាយជាសាធារណៈ។
លោកប្រធានាធិបតីអូបាម៉ាបានព្រមានប្រើសិទ្ធិវេតូ
បន្ទាប់ពីការអនុម័តរបស់ព្រឹទ្ធសភា ច្បាប់ដែលនឹងអនុញ្ញាតឲ្យក្រុមគ្រួសារជនរងគ្រោះក្នុងមហាភេរវកម្មថ្ងៃ១១ កញ្ញា ២០០១ ប្តឹងពលរដ្ឋ និងមេដឹកនាំអារ៉ាប៊ីសាអូឌីតនឹងត្រូវឆ្លងកាត់ការបោះឆ្នោតនៅសភានាពេលខាងមុខ។ តែលោកប្រធានាធិបតីអូបាម៉ាបានព្រមានប្រើសិទ្ធិវេតូ។ លោកអូបាម៉ាបានបញ្ជាក់ដូចនេះកាលពីថ្ងៃទី១៧ មេសាកន្លងទៅ មុនចេញទៅបំពេញទស្សនកិច្ចក្នុងប្រទេសអារ៉ាប៊ីសាអូឌីតក្នុងថ្ងៃទី១៨ មេសា។
នៅថ្ងៃអង្គារ ទី១៧ ឧសភាចំថ្ងៃអនុម័តច្បាប់ដ៏ចម្រូងចម្រាសមួយនេះនៅព្រឹទ្ធសភា អ្នកនាំពាក្យសេតវិមានលោក Josh Earnest បានរម្លឹកប្រាប់ជាថ្មីថា លោកអូបាម៉ានឹងប្រើសិទ្ធិវេតូប្រឆាំងច្បាប់នេះដើម្បីបញ្ជៀសការប្តឹងប្រឆាំងបកនឹងរដ្ឋបាលអាមេរិកាំងវិញ។ នៅក្នុងន័យនេះ អ្នកនាំពាក្យសេតវិមានបានសង្កត់ធ្ងន់ពីគោលការណ៍នៃច្បាប់អន្តរជាតិដែលលោកហៅថា « អភ័យឯកសិទ្ធិរដ្ឋ »។ « អភ័យឯកសិទ្ធិរដ្ឋ » ដែលរដ្ឋ និងរដ្ឋត្រូវដោះស្រាយបញ្ហាតាមផ្លូវទូត ពោលមិនមែនដោះស្រាយបញ្ហាតាមផ្លូវតុលាការទេ។
លោក Josh Earnest បានធ្វើការពន្យល់បកស្រាយថា អាមេរិកក្នុងនាមជាមហាអំណាចមួយក្នុងលោកបានចូលរួមយ៉ាងសកម្មនៅក្នុងសកម្មភាពពិភពលោក ពិសេសនៅក្នុងបេសកកម្មមនុស្សធម៌ និងរក្សាសន្តិភាព។ តែបើអាមេរិករំលោភបំពានលើគោលការណ៍ « អភ័យឯកសិទ្ធិរដ្ឋ » នោះដែលអាមេរិកខ្លួនឯង រួមទាំងប្រទេសសម្ព័ន្ធមិត្តអាចនឹងទទួលការប្តឹងផ្តល់ពីពលរដ្ឋរបស់ប្រទេសផ្សេងដែរ ហើយអ្នកដែលប្រឈមនឹងគ្រោះហានិភ័យខ្លាំង គឺពលរដ្ឋអាមេរិកដែលកំពុងបំពេញបេសកកម្មនៅបរទេស។
អារ៉ាប៊ីសាអូឌីតមិនអាចទប់កំហឹង និងព្រមានសងសឹក
ទោះបីជាដឹងថា ច្បាប់ដែលបើកផ្លូវឲ្យប្តឹងពលរដ្ឋ និងមេដឹកនាំអារ៉ាប៊ីសាអ៊ូឌីតទៅតុលាការអាមេរិកពីបទពាក់ព័ន្ធនឹងភេរវកម្ម ១១កញ្ញានឹងត្រូវច្រានចោលដោយលោកប្រធានាធិបតីអូបាម៉ាក៏ដោយ ក៏អារ៉ាប៊ីសាអូឌីតមិនបានចាត់ទុកទង្វើរបៀបនេះជាការលេងសើចដែរ។ កន្លងមក លោកប្រមុខការទូតអារ៉ាប៊ីសាអូឌីតបានព្រមានពីការលក់មូលប័ត្របំណុលរដ្ឋទាំងអស់នៅអាមេរិកដែលគិតជាប្រាក់សរុបប្រមាណជា ៧៥០ ០០០លានដុល្លារ ព្រមទំាំងអចលនទ្រព្យផ្សេងទៀតរបស់អារ៉ាប៊ីសាអូឌីតនៅលើទឹកដីអាមេរិកាំង។
ដូច្នេះឃើញថា ច្បាប់មួយកំពុងចូលទៅបំពុលទំនាក់ទំនងអាមេរិក អារ៉ាប៊ីសាអូឌីតដែលកំពុងតានតឹងស្រាប់ឲ្យកាន់តែឡើងកម្តៅមួយកម្រិតទៀត។ តាមពិតទៅ អារ៉ាប៊ីសាអូឌីតមិនមែនទើបតែក្តៅក្រហាយនឹងអាមេរិកនៅក្នុងច្បាប់មួយនេះទេ តែក្តៅនឹងអាមេរិកដែលបានទៅល្អូកល្អឺនជាមួយអ្នកផ្សេង ពិសេសអ៊ីរ៉ង់ដែលជាសត្រូវស៊ីសាច់ហុតឈាមរបស់ខ្លួននៅក្នុងតំបន់។ តែអាមេរិក និងអារ៉ាប៊ិសាអូឌីតបានយល់ដូចគ្នាថា មិត្តនៅជាមិត្តដែលតែងតែមានភាពរកាំរកូសខ្លះដោយចៀសមិនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ