ប៉ូលិសភូមារឹបអូសបានគ្រឿងញឿនតម្លៃ៣០លានដុល្លារ
ប៉ូលិសភូមាបានរឹបអូសគ្រឿងញឿនគ្រប់ប្រភេទ ក្នុងតម្លៃជាទឹកប្រាក់រហូតដល់ទៅជាង ៣០លានដុល្លារ។ នេះបើយោងតាមមន្រ្តីជាន់ខ្ពស់នៃប៉ូលិសភូមា ដែលបានប្រាប់ទីភ្នាក់ងារព័ត៌មានបារាំង អាអែហ្វប៉េ នៅថ្ងៃអាទិត្យនេះ។ ការរឹបអូសគ្រឿងញឿនដ៏ច្រើនសន្ធឹកសន្ធាប់នេះ គឺជាការបង្ហាញឲ្យឃើញពីកិច្ចខិតខំប្រឹងប្រែងរបស់អាជ្ញាធរភូមា ក្នុងការប្រយុទ្ធប្រឆាំងនឹងគ្រឿងញៀន ក៏ប៉ុន្តែ ក្នុងពេលជាមួយគ្នា វាក៏បង្ហាញឲ្យឃើញផងដែរថា ភូមានៅតែជាសម្បុកដ៏ធំមួយ នៃបណ្តាញផលិត និងជួញដូរគ្រឿងញៀន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
យោងតាមការអះអាងរបស់មន្រ្តីប៉ូលិសភូមា គ្រឿងញឿនដែលគេរឹបអូសបាននេះ រួមមានហេរ៉ូអ៊ីន ២៤គីឡូក្រាម អាភៀន ១៥គីឡូក្រាម មេតំហ្វេតាមីន ៨២គីឡូ ព្រមទាំងថ្នាំញៀនសំយោគរាប់ម៉ឺនគ្រាប់ផ្សេងទៀត ដែលមានតម្លៃជាទឹកប្រាក់សរុបប្រមាណជា ៣០លានដុល្លារ។ គ្រឿងញៀនទាំងនេះត្រូវបានប៉ូលិសឆែករកឃើញនៅក្នុងរថយន្តកុងតឺន័រមួយគ្រឿង នៅក្នុងតំបន់ឧស្សាហកម្មមួយ ក៏ប៉ុន្តែ រហូតមកទល់នឹងពេលនេះ ជនសង្ស័យដែលជាមេខ្លោងជួញដូរគ្រឿងញៀននេះ នៅមិនទាន់ត្រូវបានប៉ូលិសចាប់ខ្លួននៅឡើយទេ។
មន្រ្តីប៉ូលិសភូមាក៏បានលើកឡើងផងដែរ អំពីក្តីបារម្ភ ដោយមើលឃើញពីការរីកដុះដាលយ៉ាងខ្លាំងនៃបណ្តាញជួញដូរគ្រឿងញៀន នៅទូទាំងប្រទេសភូមាទាំងមូល។ គេនៅចាំបានថា កាលពីខែកក្កដាឆ្នាំទៅមិញ ភូមាក៏ធ្លាប់ឆែកឆេររកឃើញគ្រឿងញៀនក្នុងរថយន្តកុងតឺន័រឯកជនម្តងដែរ នៅខាងជើងទីក្រុងរ៉ង់ហ្គូន ដោយគ្រឿងញឿនទាំងនោះមានតម្លៃគិតជាទឹកប្រាក់សរុបរហូតដល់ទៅ ១០០លានដុល្លារអាមេរិក។
គួរបញ្ជាក់ថា ភូមាស្ថិតនៅក្នុងតំបន់ដ៏ល្បីឈ្មោះលើពិភពលោកខាងសម្បុកគ្រឿងញៀន គឺ “តំបន់ត្រីកោណមាស” ដែលជាចំណុចប្រសព្វរវាង៣ប្រទេស គឺភូមា ឡាវ និងថៃ។ អស់រយៈពេលជាច្រើនសិបឆ្នាំមកហើយភូមាល្បីឈ្មោះថាជាប្រទេសផលិតគ្រឿងញៀនដ៏ធំមួយ ក្នុងការនាំចេញយកទៅលក់នៅលើទីផ្សារអន្តរជាតិ។
នៅក្នុងពេលបច្ចុប្បន្ននេះ បើទោះបីជាមានការធ្វើកំណែទម្រង់យ៉ាងច្រើនរបស់រដ្ឋាភិបាលលោកថេន សេន ក៏ប៉ុន្តែ ភូមានៅតែជាប្រទេសផលិតអាភៀនដ៏ធំជាងគេលំដាប់ទី២ នៅលើពិភពលោក បន្ទាប់ពីប្រទេសអាហ្វហ្កានីស្ថាន។ ក្នុងពេលជាមួយគ្នា ប្រជាជនក្រីក្រភូមាជាច្រើន ដែលរស់នៅតាមតំបន់ជនបទដាច់ស្រយាល បាននាំគ្នាលើកឡើងថា ពួកគេមិនមានមុខរបរអ្វីផ្សេង ដើម្បីចិញ្ចឹមជីវិតនោះទេ ក្រៅពីការដាំអាភៀន។
កាលពីពេលថ្មីៗនេះ ការប៉ះទង្គិចគ្នាដោយអំពើហិង្សាបានកើតមានឡើង នៅតំបន់ដាច់ស្រយាលមួយ ក្នុងរដ្ឋកាឈីន នៅពេលដែលក្រុមគ្រិស្តសាសនិកជនប្រឆាំងនឹងគ្រឿងញៀន បាននាំគ្នាព្យាយាមចូលទៅបំផ្លាញចម្ការអាភៀន ប៉ុន្តែ ត្រូវទទួលរងការវាយប្រហារពីសំណាក់ប្រជាជននៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ