សហគមន៍ព្រៃឡង់៖ បទល្មើសព្រៃឈើនឹងត្រូវកាត់បន្ថយ ប្រសិនបើព្រៃឡង់ក្លាយជាតំបន់អេកូទេសចរណ៍
តំណាងសហគមន៍ព្រៃឡង់ ចង់ឲ្យមានការប្រែក្លាយព្រៃឡង់ ជាតំបន់អេកូទេសចរណ៍ ដែលអាចរួមចំណែកកាត់បន្ថយបទល្មើសព្រៃឈើ និងរកចំណូលឲ្យពលរដ្ឋក្នុងសហគមន៍ផង។ ក្រសួងទេសចរណ៍វិញ អះអាងថាផែនការប្រែក្លាយព្រៃឡង់ជាតំបន់អេកូទេសចរណ៍គឺស្ថិតនៅក្នុងគោលដៅរបស់ក្រសួងសម្រាប់ឆ្នាំ២០២០នេះ។
ចុះផ្សាយនៅថ្ងៃ៖
ស្តាប់ - ០២:១២
កញ្ញា ឈាង លី អ្នកសម្របសម្រួលសហគមន៍ព្រៃឡង់ប្រចាំខេត្តស្ទឹងត្រែង បានអះអាងប្រាប់វិទ្យុបារាំងអន្តរជាតិនៅថ្ងៃទី២០ ខែមករានេះ ថាតំណាងសហគមន៍ព្រៃឡង់ពិតជាចង់ឲ្យអាជ្ញាធរពាក់ព័ន្ធធ្វើការប្រែក្លាយព្រៃឡង់ជាតំបន់អេកូទេសចរណ៍ ដើម្បីកាត់បន្ថយការកាប់ឈើ ការទន្ទ្រានដីព្រៃ និងអាចបង្កើនចំណូល។
បើតាមកញ្ញា ឈាង លី ការប្រែក្លាយតំបន់ព្រៃឡង់ជាតំបន់អេកូទេសចរណ៍នឹងធ្វើឲ្យពលរដ្ឋ ដែលធ្លាប់តែ រកស៊ីដឹកឈើ ឬកាប់ឈើ អាចមកប្រកបរបរជាអ្នកដឹកភ្ញៀវទេសចរ ដែលអាចបង្កើនប្រាក់ចំណូលរបស់ពួកគាត់ ហើយក្រៅពីនេះក៏អាចកាត់បន្ថយការធ្វើចំណាកស្រុកផងដែរ។ កញ្ញា ឈាង លី បន្ថែមថា សហគមន៍ព្រៃឡង់មានគោលដៅទេសចរណ៍មួយចំនួនដូចជាតំបន់ទឹកធ្លាក់ ជិះទូកតាមដងទន្លេ ដើរក្នុងព្រៃ និងកន្លែងមួយចំនួនទៀត។
អ្នកសម្របសម្រួលសហគមន៍ព្រៃឡង់ប្រចាំខេត្តស្ទឹងត្រែងរូបនេះ បានអះអាងថាការកាប់ឈើ និងការទន្ទ្រានដីនៅក្នុងព្រៃឡង់ហាក់មិនមានការថមថយទេនៅក្នុងឆ្នាំ២០១៩កន្លងទៅ។
លោក ជុក ជំនោរ អ្នកនាំពាក្យក្រសួងទេសចរណ៍បានអះអាងប្រាប់វិទ្យុបារាំងអន្តរជាតិថា តំបន់ព្រៃឡង់គឺស្ថិតនៅក្នុងផែនការរបស់ក្រសួងទេសចរណ៍ សហការជាមួយក្រសួងបរិស្ថាន ដើម្បីប្រែក្លាយតំបន់ព្រៃឡង់ទៅជាតំបន់អេកូទេសចរណ៍ និងសហគមន៍ទេសចរណ៍ នៅឆ្នាំ២០២០នេះ។ លោកអះអាងថា កន្លងមកនេះ ក្រសួងទេសចរណ៍ និងក្រសួងបរិស្ថាន បានរៀបចំប្រែក្លាយកន្លែងជាច្រើននៅក្នុងប្រទេសកម្ពុជា ទៅជាតំបន់អេកូទេសចរណ៍ ដូចជាតំបន់ស្ទឹងអារ៉ែងជាដើម។
សូមជម្រាបជូនថាតំបន់ព្រៃឡង់ ដែលស្ថិតក្នុងភូមិសាស្រ្តខេត្តចំនួន៤គឺ កំពង់ធំ ស្ទឹងត្រែង ព្រះវិហារ និងក្រចេះ មានផ្ទៃដីសរុប ៤សែនហិកតា ត្រូវបានរដ្ឋាភិបាលកម្ពុជាចេញអនុក្រឹត្យបង្កើតជាដែនជម្រកសត្វ ព្រៃ “ព្រៃឡង់” កាលពីខែឧសភា ឆ្នាំ២០១៦។ នៅខែមីនា ឆ្នាំ២០១៨ ក្រសួងបរិស្ថាន សង្គមស៊ីវិល និងវិស័យឯកជនបានចុះហត្ថលេខា លើកិច្ចព្រមព្រៀងមួយ ក្នុងគម្រោងការអភិរក្ស ព្រៃឈើតំបន់ព្រៃឡង់នេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ