សាក្សីថាប៉ូលិសភូមាជាអ្នករៀបចំល្បិចដើម្បីទម្លាក់កំហុសលើអ្នកកាសែតរ៉យទ័រ
មន្រ្តីជាន់ខ្ពស់ប៉ូលិសភូមាគឺជាអ្នកបញ្ជាឲ្យប៉ូលិសថ្នាក់ក្រោមរៀបចំល្បិច ដើម្បីដាក់អន្ទាក់ ទម្លាក់កំហុស និងចាប់ខ្លួនអ្នករាយការណ៍ព័ត៌មានរ៉យទ័រពីររូប ដែលបច្ចុប្បន្នកំពុងប្រឈមមុខនឹងតុលាការពីបទរំលោភលើការណ៍សម្ងាត់រដ្ឋ។ នេះបើយោងតាមការអះអាងរបស់សាក្សីមួយរូប ដែលជាមន្រ្តីប៉ូលិសដូចគ្នា នៅក្នុងអង្គសវនាការ កាលពីថ្ងៃសុក្រ ដោយបានបញ្ជាក់ច្បាស់ៗ ពីអត្តសញ្ញាណរបស់មន្រ្តីប៉ូលិសដែលជាអ្នកបញ្ជា។
ចុះផ្សាយនៅថ្ងៃ៖
លោក ម៉ូ យ៉ានណាំង មន្រ្តីប៉ូលិស ដែលតាមការពិតត្រូវបានអាជ្ញាធរបញ្ជូនមកឲ្យធ្វើជាសាក្សីដាក់បន្ទុកលើអ្នករាយការណ៍ព័ត៌មានរ៉យទ័រ តែទីបំផុតទៅបានក្លាយទៅជាសាក្សីដាក់បន្ទុកលើប៉ូលិសខ្លួនឯងទៅវិញ។
នៅក្នុងសវនាការនៅថ្ងៃសុក្រ លោក ម៉ូ យ៉ានណាំង បានរៀបរាប់ប្រាប់ចៅក្រមថា មន្រ្តីប៉ូលិសជាន់ខ្ពស់មួយរូប គឺឧត្តមសេនីយ៍ ទីន កូកូ ដែលជាអ្នកទទួលបន្ទុកខាងស៊ើបអង្កេតផ្ទៃក្នុង ជាអ្នកបានផ្តល់ឯកសារសម្ងាត់ទៅឲ្យមន្រ្តីប៉ូលិសថ្នាក់ក្រោម ហើយបញ្ជាឲ្យទៅណាត់ជួប និងប្រគល់ឯកសារសម្ងាត់នេះទៅឲ្យអ្នករាយការណ៍ព័ត៌មានរ៉យទ័រ។ ក្នុងពេលជាមួយគ្នា កម្លាំងប៉ូលិសមួយក្រុមផ្សេងទៀតត្រូវនៅរង់ចាំជាស្រេច ដើម្បីស្ទាក់ចាប់អ្នកកាសែតទាំងពីររូបភ្លាមៗ នៅពេលដែលពួកគេកំពុងមានឯកសារសម្ងាត់នៅក្នុងដៃ ដើម្បីចោទប្រកាន់ពួកគេពីបទរំលោភការណ៍សម្ងាត់របស់រដ្ឋ។
គួររំឭកឡើងវិញថា អ្នករាយការណ៍ព័ត៌មានរ៉យទ័រទាំងពីររូបត្រូវបានប៉ូលិសចាប់ឃុំខ្លួន តាំងពីថ្ងៃទី១២ខែធ្នូឆ្នាំទៅមិញ ក្នុងពេលដែលពួកគេកំពុងធ្វើការស៊ើបអង្កេតករណីសម្លាប់ជនជាតិភាគតិចរ៉ូហ៊ីងយ៉ា ដែលគេសង្ស័យថាជាស្នាដៃរបស់កងទ័ព។ លោក ម៉ូ យ៉ានណាំង បានឲ្យដឹងថា រូបលោកផ្ទាល់ក៏ត្រូវបានចាប់ខ្លួននៅថ្ងៃជាមួយគ្នានោះដែរ ហើយត្រូវជាប់ឃុំតាំងពីពេលនោះមក មុននឹងត្រូវគេបញ្ជូនឲ្យមកធ្វើសាក្សីនៅពេលនេះ ដោយប្រាប់ឲ្យលោកឆ្លើយទម្លាក់កំហុសទៅលើអ្នកកាសែតទាំងពីររូប។
ក៏ប៉ុន្តែ នៅពេលមកដល់តុលាការ នៅពេលព្រឹកថ្ងៃសុក្រ លោក ម៉ូ យ៉ានណាំង បានឆ្លៀតប្រាប់ដោយខ្លីទៅអ្នកយកព័ត៌មានរបស់អាអែហ្វប៉េថា លោកនឹងបញ្ចេញការពិតទាំងអស់ នៅក្នុងអង្គសវនាការ។
ទីភ្នាក់ងារព័ត៌មានរ៉យទ័របានឲ្យដឹងថា ខ្លួនបានព្យាយាមទាក់ទងទៅឧត្តមសេនីយ៍ ទីន កូកូ ដែលរងការចោទប្រកាន់ថាជាអ្នករៀបចំអន្ទាក់ចាប់អ្នកកាសែតរ៉យទ័រនេះ តែទាក់ទងមិនបាន។ ចំណែកឯអ្នកនាំពាក្យរដ្ឋាភិបាលភូមាវិញ បានបដិសេធមិនធ្វើអត្ថាធិប្បាយអ្វីទាំងអស់ជុំវិញបញ្ហានេះ ដោយលើកឡើងថា វាជាសំណុំរឿងដែលស្ថិតនៅក្នុងដៃតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ