លោកម៉ាក្រុងប្រឈមនឹងបាតុកម្មប្រឆាំងពីចលនាប្រឆាំងដែលប្រកាសរួមដៃគ្នា
លោកប្រធានាធិបតីបារាំង អេម៉ានុយអែល ម៉ាក្រុង ត្រូវប្រឈមមុខនឹងចលនាបាតុកម្មប្រឆាំងដ៏ធំមួយ នៅថ្ងៃព្រហស្បតិ៍នេះ ក្រោយពីសហជីពនិយោជិតមកពីវិស័យផ្សេងៗគ្នាប្រកាសធ្វើបាតុកម្មរួមគ្នា ដើម្បីប្រឆាំងនឹងកំណែទម្រង់របស់លោកម៉ាក្រុង។ ក៏ប៉ុន្តែ គេនៅតែមិនទាន់ប្រាកដនៅឡើយទេថា តើគម្រោងធ្វើសកម្មភាពប្រឆាំងរួមគ្នានេះអាចនឹងធ្វើទៅបានត្រឹមកម្រិតណា?
ចុះផ្សាយនៅថ្ងៃ៖
គេសង្កេតឃើញថា អស់រយៈពេលជាច្រើនខែមកហើយ ដែលនិយោជិតមកពីវិស័យផ្សេងៗគ្នា តែងតែបាននាំគ្នាធ្វើកូដកម្ម ឬបាតុកម្ម ប្រឆាំងនឹងកំណែទម្រង់របស់លោកប្រធានាធិបតីម៉ាក្រុង។ មន្រ្តីរដ្ឋការនាំគ្នាប្រឆាំងនឹងកំណែទម្រង់ក្នុងមុខងារសាធារណៈ។ និស្សិតនាំគ្នាប្រឆាំងនឹងកំណែទម្រង់ទៅលើនីតិវិធីនៃការជ្រើសរើសនិស្សិតឲ្យចូលរៀនថ្នាក់ឧត្តមសិក្សា។ បុគ្គលិកក្រុមហ៊ុនផ្លូវដែក ដែលជាសហគ្រាសរដ្ឋ នាំគ្នាតវ៉ាប្រឆាំងនឹងកំណែទម្រង់ទៅលើលក្ខន្តិកៈក្រុមហ៊ុន និងក្របខ័ណ្ឌបុគ្គលិក ។ល។ និង ។ល។
ក៏ប៉ុន្តែកន្លងមក សកម្មភាពប្រឆាំងអស់ទាំងនេះត្រូវបានគេរៀបចំឡើងដាច់ដោយឡែកពីគ្នា ទៅតាមវិស័យរៀងៗខ្លួន។ ទើបតែនៅថ្ងៃព្រហស្បតិ៍នេះ ដែលគេគ្រោងធ្វើសកម្មភាពរួមគ្នាក្នុងគ្រប់វិស័យទាំងអស់ តាមរយៈបាតុកម្ម ដែលគេគ្រោងធ្វើនៅទូទាំងប្រទេស ដោយក្នុងនោះ ក្បួនបាតុកម្មនៅក្នុងទីក្រុងប៉ារីសចាប់ផ្តើមចេញដំណើរនៅថ្ងៃរសៀល (ត្រូវនឹងពេលយប់នៅក្នុងប្រទេសកម្ពុជា)។
ការធ្វើសកម្មភាពប្រឆាំងរួមគ្នានេះ ត្រូវបានធ្វើឡើងទៅតាមការអំពាវនាវរបស់សហជីពថ្នាក់ជាតិដ៏ធំមួយ ឈ្មោះថា CGT ក៏ប៉ុន្តែ យុទ្ធសាស្រ្តនេះក៏មិនបានទទួលការគាំទ្រពីសំណាក់គ្រប់សហជីពទាំងអស់នោះដែរ ដោយសហជីពខ្លះយល់ថា វិស័យនីមួយៗត្រូវប្រឈមមុខនឹងកំណែទម្រង់ខុសៗគ្នា ហើយពួកគេមានការទាមទារខុសៗគ្នា ដូច្នេះ គួរតែធ្វើសកម្មភាពទៅតាមវិស័យនីមួយៗ ដើម្បីឆ្លើយតបទៅតាមតម្រូវការរបស់ពួកគេរៀងៗខ្លួន។
សម្រាប់លោកអេម៉ានុយអែល ម៉ាក្រុង សន្ទុះនៃចលនាបាតុកម្មរួមគ្នានៅថ្ងៃព្រហស្បតិ៍នេះ នឹងជាតម្រ៉ុយដ៏សំខាន់មួយ ដែលបង្ហាញពីតុល្យភាពនៃកម្លាំងរបស់ក្រុមប្រឆាំង។ លោកម៉ាក្រុងធ្លាប់បានអះអាង នៅក្នុងបទសម្ភាសន៍តាមទូរទស្សន៍កាលពីចុងសប្តាហ៍កន្លងទៅនេះថា លោកនឹងដាក់ចេញនូវនយោបាយដែលលោកធ្លាប់បានសន្យាក្នុងយុទ្ធនាការឃោសនាបោះឆ្នោត ដោយមិនចុះញ៉មចលនាបាតុកម្មប្រឆាំងនោះទេ។
ការស្ទាបស្ទង់មតិ កាលពីថ្ងៃពុធម្សិលមិញ បានបង្ហាញឲ្យឃើញថា ប្រជាជនបារាំងរហូតដល់ទៅ ៥៨% បានសម្តែងការមិនពេញចិត្តចំពោះការដឹកនាំរបស់លោកម៉ាក្រុង។ ក៏ប៉ុន្តែ ក្នុងពេលជាមួយគ្នា លោកប្រធានាធិបតីបារាំងក៏ប្រហែលជាអាចមានសុទិដ្ឋិនិយមខ្លះដែរ ដោយមើលឃើញថា ចលនាកូដកម្មប្រឆាំងនឹងកំណែទម្រង់របស់លោក ជាពិសេស កូដកម្មរបស់បុគ្គលិកក្រុមហ៊ុនផ្លូវដែក និងកូដកម្មរបស់និស្សិត ដែលកាលពីដំបូងឡើយមានសន្ទុះខ្លាំង ចាប់ផ្តើមមានការថយចុះមកវិញច្រើនកាលពីប៉ុន្មានថ្ងៃកន្លងទៅ ពោលគឺ នៅមុនពេលមានចលនាបាតុកម្មរួមគ្នាថ្នាក់ជាតិនៅថ្ងៃព្រហស្បតិ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ