ហ្កាហ្សា៖ កងទ័ពអ៊ីស្រាអែល បាញ់សម្លាប់ចំណាប់ខ្មាំង៣នាក់ ដោយច្រឡំ
ល្ងាចថ្ងៃសុក្រ ទី១៥ធ្នូ កងទ័ពអ៊ីស្រាអែល បានប្រកាសព័ត៌មានឲ្យដឹងថា ខ្លួនបានច្រឡំដៃ បាញ់សម្លាប់ ចំណាប់ខ្មាំងចំនួន៣នាក់ នៅភាគខាងជើងតំបន់ហ្កាហ្សា។ ជាការបាញ់សម្លាប់ បន្ទាប់ពីកងទ័ពអ៊ីស្រាអែល បានភ័ន្តច្រឡំ ថាចំណាប់ខ្មាំងទាំង៣នាក់នោះ អាចជាការគំរាមមកលើកងកម្លាំងអ៊ីស្រាអែល ដែលកំពុងតែធ្វើប្រតិបត្តិការ នៅតំបន់ Choujaiya ភាគជាជើងតំបន់ហ្កាហ្សា។ ដំណឹងនេះ បានធ្វើឲ្យប្រជាជនអ៊ីស្រាអែល មានការរំជួលចិត្តជាខ្លាំង និងបានទាមទារឲ្យរដ្ឋាភិបាលអ៊ីស្រាអែល ត្រូវតែចរចាដើម្បីរំដោះចំណាប់ខ្មាំងពីដៃក្រុមហាម៉ាសមកវិញ។
ចុះផ្សាយនៅថ្ងៃ៖
ស្តាប់ - ០៣:១៨
ចំណាប់ខ្មាំងទាំង៣នាក់ ដែលត្រូវកងទ័ពអ៊ីស្រាអែលសម្លាប់ដោយច្រឡំ សុទ្ធតែភេទប្រុស ម្នាក់ឈ្មោះ Yotam Haïm អាយុ២៨ឆ្នាំ ម្នាក់ទៀតឈ្មោះ Alon Lulu Shamriz អាយុ ២៦ឆ្នាំ និងម្នាក់ទៀត ឈ្មោះ Samer al Talalqa អាយុ២៥ឆ្នាំ។ លោកនាយករដ្ឋមន្ត្រីអ៊ីស្រាអែល បេនចាមីន នេតាន់យ៉ាងហ៊ូ បានថ្លែងសារសំដែងការសោកស្តាយ ដោយបានចាត់ទុកករណីនេះ ជាសោកនាដកម្មដែលមិនអាចអត់ទ្រាំបាន។
គួរកត់សំគាល់ថា បន្ទាប់ពីបានទទួលដំណឹងនេះភ្លាម ក្រុមគ្រួសារចំណាប់ខ្មាំង ព្រមទាំងប្រជាជនអ៊ីស្រាអែលជាច្រើនរយនាក់ បាននាំគ្នា ចុះផ្លូវធ្វើបាតកម្មទាំងយប់ នៅខាងមុខក្រសួងការពារជាតិអ៊ីស្រាអែល ក្នុងក្រុងទែលអាវីវ។ ជាមួយនឹងផ្ទាំងបដាព្រោងព្រាត ក្រុមបាតុករបានស្រែកទាមទារ ឲ្យអាជ្ញាធរអ៊ីស្រាអែល ត្រូវតែចរចាជាបន្ទាន់ ដើម្បីរំដោះចំណាប់ខ្មាំងទាំងអស់មកវិញ។ សមាជិកក្រុមគ្រួសារចំណាប់ខ្មាំង បានលើកឡើងថា ការចរចារំដោះចំណាប់ខ្មាំងគឺជាជម្រើសតែមួយគត់ ពុំនោះទេចំណាប់ខ្មាំងទាំងអស់ នឹងប្រាកដជាស្លាប់ បើមិនដោយសារក្រុមហាម៉ាសសម្លាប់ ក៏ដោយសារការវាយប្រយុទ្ធរបស់កងទ័ពអ៊ីស្រាអែលដែរ។
សូមរំលឹកថា នៅថ្ងៃដែលក្រុមភេរវកម្មហាម៉ាស បានមកវាយប្រហារក្នុងទឹកដីអ៊ីស្រាអែល ថ្ងៃទី៧តុលា ក្រុមហាម៉ាស បានសម្លាប់មនុស្សចំនួនប្រមាណ១២០០នាក់ និងបានចាប់ចំណាប់ខ្មាំងយកទៅហ្កាហ្សា ចំនួនប្រមាណ២៥០នាក់។ គិតមកត្រឹមពេលនេះ មានចំណាប់ខ្មាំងចំនួន ១១០នាក់ ត្រូវបានរំដោះបាន និង២២នាក់ ត្រូវបានភាគីអ៊ីស្រាអែលប្រកាសថាបានស្លាប់។ ផ្អែកតាមអាជ្ញាធរអ៊ីស្រាអែល បច្ចុប្បន្នអាចនៅមានចំណាប់ខ្មាំង ចំនួន១២៩នាក់ ដែលកំពុងស្ថិតក្នុងដៃក្រុមហាម៉ាស តែដោយគ្មានដំណឹងជាក់ច្បាស់ថានៅរស់ប៉ុន្មាន ស្លាប់ប៉ុន្មាននោះទេ។
ក្រោយការប្រកាសដំណឹង ស្តីពីការបាញ់សម្លាប់ចំណាប់ខ្មាំង៣នាក់ដោយច្រឡំនេះ គេហទំព័រ Axios បានចុះផ្សាយថា លោក David Barnea មេក្រុម Mossad ដែលជាទីភ្នាក់ងារចារកិច្ចរបស់អ៊ីស្រាអែល នឹងទៅជួបជាមួយនាយករដ្ឋមន្ត្រីកាតា Mohammed Ben Abdelrahmane al-Thani នៅអឺរ៉ុប។ ដោយមិនបញ្ជាក់ថាការប្រជុំនេះធ្វើឡើងនៅទីក្រុងណា ប្រទេសណា គេហទំព័រ Axios បានត្រឹមអះអាងថា ជំនួបនេះនឹងធ្វើឡើងក្នុងរវាងចុងសប្តាហ៍នេះ ដើម្បីនិយាយចរចា អំពីការរំដោះចំណាប់ខ្មាំង។
ដោយឡែក ទាក់ទិននឹងស្ថានការណ៍មនុស្សធម៌នៅហ្កាហ្សាវិញ កាលពីថ្ងៃសុក្រទី១៥ធ្នូ អាជ្ញាធរអ៊ីស្រាអែល បានសម្រេចបើកច្រកថ្មីមួយទៀត នៅចំណុច Keram Shalom។ អាជ្ញាធរអ៊ីស្រាអែលអះអាងថា ជាការបើកជាបណ្តោះអាសន្ន ដើម្បីសម្រាលការកកស្ទះនៅច្រករ៉ាហ្វា ហើយដើម្បីអនុញ្ញាតឲ្យរថយន្តដឹកស្បៀងអាហារ ថ្នាំពេទ្យ និងជំនួយមនុស្សធម៌ទាំងអស់ អាចចូលទៅជួយប្រជាជនហ្កាហ្សា ឲ្យបានរហ័ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ