អ៊ីរ៉ង់ ទំនងជាបានជួយចលនាហាម៉ាសក្នុងការវាយប្រហារអ៊ីស្រាអែល
ចលនាហាម៉ាសធ្វើសកម្មភាពតែម្នាក់ឯង? បើតាមសារព័ត៌មានអាមេរិក The Wall Street Journal អ្នកទទួលខុសត្រូវផ្នែកសន្តិសុខអ៊ីរ៉ង់ទំនងជាបានជួយរៀបចំផែនការឱ្យចលនាហាម៉ាស់ឆ្មក់វាយប្រហារលើអ៊ីស្រាអែលកាលពីថ្ងៃទី៧តុលា២០២៣។
ចុះផ្សាយនៅថ្ងៃ៖
ស្តាប់ - ០២:៥៤
តើចលនាហាម៉ាសបានបញ្ចេញសកម្មភាពវាយប្រហារអ៊ីស្រាអែលតែម្នាក់ឯង ឬក៏មានអ្នកជួយនៅពីក្រោយខ្នង? កាលពីថ្ងៃសៅរ៍ ក្រោយហេតុការណ៍ភ្លាម អ្នកទទួលខុសត្រូវជាន់ខ្ពស់អាមេរិកយល់ថាគ្មានអ្វីគួរសង្ស័យឡើយជុំវិញការពាក់ព័ន្ធរបស់អ៊ីរ៉ង់ក្នុងការវាយប្រហារនេះ ព្រោះអ៊ីរ៉ង់បានផ្តល់ជំនួយហិរញ្ញវត្ថុនិងយោធាដល់ចលនាហាម៉ាស់។ តែថា តើការពាក់ព័ន្ធដោយផ្ទាល់ពីសំណាក់អ៊ីរ៉ង់ មានដល់កម្រិតណា គឺស្ថិតក្នុងការស៊ើបអង្កេតនៅឡើយ។
បើតាមកាសែតអាមេរិកThe Wall Street Journal អ្នកទទួលខុសត្រូវអ៊ីរ៉ង់ផ្នែកសន្តិសុខ ទំនងជាបានជួយរៀបផែនការវាយប្រហារលើអ៊ីស្រាអែល និងបើកភ្លើងខៀវឱ្យចលនាហាម៉ាស់ធ្វើប្រតិបត្តិការ នៅក្នុងជំនួបប្រជុំមួយនៅទីក្រុងបេរ៉ូតរបស់សកម្មជនមួយក្រុមផ្សេងទៀតគាំទ្រដោយអ៊ីរ៉ង់ កាលពីថ្ងៃចន្ទសប្តាហ៍មុន។
សម្ព័ន្ធនេះបានកំណត់កិច្ចព្រមព្រៀងតាំងពីខែសីហាមក រៀបចំផែនការវាយប្រហារតាមផ្លូវអាកាស តាមផ្លូវគោក និងផ្លូវទឹក។ ដើម្បីសម្រេចសម្រួចប្រតិបត្តិការវាយប្រហារនេះ ពួកគេទំនងជាបានរៀបចំជំនួបប្រជុំជាច្រើនលើកនៅក្រុងបេរ៉ូត ដោយមានភ្នាក់ងាររបស់ឆ្មាំបដិវត្តអ៊ីរ៉ង់ចូលរួមជានិច្ច។ តែសម្រាប់ពេលនេះ អាមេរិកគ្មានព័ត៌មានសម្រាប់ចង់ភ្ជាប់ហេតុនិងផលឱ្យចេញជាសេចក្តីសន្និដ្ឋានទេ។ នេះបើតាមសេចក្តីប្រកាសរបស់អ្នកទទួលខុសត្រូវអាមេរិកជុំវិញជំនួបប្រជុំរបស់ក្រុមចលនាហាម៉ាស ហេស្បូឡានិងអ៊ីរ៉ង់។
ប៉ុន្តែអ្នកទទួលខុសត្រូវហាម៉ាសឈ្មោះ Mahmoud Mirdawi បានប្រកាសថាចលនាហាម៉ាស់បានរៀបចំផែនការវាយប្រហារលើអ៊ីស្រាអែលដោយខ្លួនឯង។ នេអជាសេចក្តីសម្រេចរបស់ពលរដ្ឋប៉ាឡេស្ទីននិងចលនាហាម៉ាស។ អ៊ីរ៉ង់គ្មានពាក់ព័ន្ធនឹងការសម្រេចចិត្តរបស់ប៉ាឡេស្ទីនទេ ព្រោះជាសេចក្តីសម្រេចរបស់ប៉ាឡេស្ទីនតែមួយគត់។ នេះជាការអះអាងរបស់អ្នកនាំពាក្យអ៊ីរ៉ង់នៅអង្គការសហប្រជាជាតិ។
មានទំនាក់ទំនងយ៉ាងជិតស្និទ្ធជាមួយប៉ាឡេស្ទីន អ៊ីរ៉ង់ជាប្រទេសដំបូងគេមួយដែលបានចេញមុខអបអរស្វាគមន៍ការវាយប្រហាររបស់ចលនាហាម៉ាសលើអ៊ីស្រាអែលកាលពីថ្ងៃសៅរ៍ទី៧តុលា។ “អ៊ីរ៉ង់គាំទ្រសិទ្ធិការពារខ្លួនរបស់ជាតិប៉ាឡេស្ទីន។ អ៊ីស្រាអែលជាអ្នកទទួលខុសត្រូវក្នុងការវាយប្រហារនេះ។” នេះជាសាររបស់លោកប្រធានាធិបតីអ៊ីរ៉ង់ លោក រ៉ៃស៊ី ផ្ញើជូនប្រជាពលរដ្ឋប៉ាឡេស្ទីន នៅល្ងាចថ្ងៃអាទិត្យទី៨តុលា។ ប្រមុខដឹកនាំអ៊ីរ៉ង់បានបញ្ចប់សារដោយលើកសរសើរគ្រប់ចលនាតស៊ូ មានជាអាទិ៍ ចលនាហាម៉ាស់ ចលនាជីហាតអ៊ីស្លាម ចលនាតស៊ូរបស់ប៉ាឡេស្ទីននៅលីបង់ ស៊ីរី អ៊ីរ៉ាក់ អាហ្វហ្កានីស្ថាន និងយេម៉ែន ព្រមទាំងវីរភាពតស៊ូរបស់តំបន់ហ្កាហ្សា។
នៅព្រឹកព្រហាមថ្ងៃសៅរ៍ទី ៧តុលា ចលនាហាម៉ាសបានបើកប្រតិបត្តិការវាយប្រហារដ៏ភ្ញាក់ផ្អើលនិងក្នុងទ្រង់ទ្រាយធំមិនធ្លាប់មានលើអ៊ីស្រាអែល ដោយបានបាញ់រ៉ុកែតរាប់ពាន់គ្រាប់និងបញ្ជូនកងយុទ្ធជនប្រដាប់អាវុធឱ្យជ្រៀតចូលក្នុងទឹកដីអ៊ីស្រាអែលហើយចាប់ខ្លួនមនុស្សជាច្រើននាក់ទៀត។ ទីប្រឹក្សារបស់អគ្គមគ្គុទេសក៍អ៊ីរ៉ង់ទស្សន៍ទាយថាជោគជ័យនៃប្រតិបត្តិការរបស់ចលនាហាម៉ាសនឹងពន្លឿនការដួលរលំរបបអ៊ីស្រាអែល។
សម្រាប់អ្នកវិភាគជំនាញតំបន់ដើមបូព៌ា អ៊ីរ៉ង់បានផ្ទេរសព្វាវុធ ចំណេះធ្វើមកឱ្យចលនាហាម៉ាសក្នុងការផលិតមីស៊ីលក្នុងស្រុក ហើយបើគ្មានការធានានិងការគាំទ្រពីសំណាក់ចលនាហេស្បូឡានិងអ៊ីរ៉ង់ទេ ហាម៉ាសពិតជាមិនហ៊ានបើកប្រតិបត្តិការវាយប្រហារលើអ៊ីស្រាអែលឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ