ប្រមុខទីភ្នាក់ងារថាមពលបរមាណូអន្តរជាតិ បាន«ពិភាក្សាគ្នាប្រកបដោយកិច្ចស្ថាបនា» ជាមួយអាជ្ញាធរអ៊ីរ៉ង់
ប្រមុខទីភ្នាក់ងារថាមពលបរមាណូអន្តរជាតិ បញ្ជាក់ថាបាន«ពិភាក្សាគ្នាប្រកបដោយកិច្ចស្ថាបនា»ជាមួយអាជ្ញាធរអ៊ីរ៉ង់ ហើយអាចនឹងនាំឲ្យមាន«កិច្ចព្រមព្រៀងសំខាន់»នៅពេលខាងមុខ។ នេះជាការលើកឡើងរបស់មន្ទ្រីអង្គការសហប្រជាជាតិអន្តរជាតិ បន្ទាប់ពីបញ្ចប់ដំណើរទស្សនកិច្ចរយៈពេល២ថ្ងៃនៅប្រទេសអ៊ីរ៉ង់។ ដំណើរទស្សនកិច្ចជាបន្ទាន់នេះ គឺបន្ទាប់ពី មានរបាយការណ៍សម្ងាត់មួយ បញ្ជាក់ថា បានរកឃើញសារធាតុអ៊ុយរ៉ាញ៉ូមបន្សុទ្ធ រហូតដល់ទៅ ៨៣,៧% គឺជិតស្មើនឹង ៩០% ដែលអាចផលិតជាអាវុធបរមាណូបាន។ សារធាតុអ៊ុយរ៉ាញ៉ូមនេះ រកឃើញ នៅឯមជ្ឈមណ្ឌលនុយក្លេអ៊ែរក្រោមដីមួយ រយៈចម្ងាយប្រមាណ១០០គីឡូម៉ែត្រ ពីរដ្ឋធានីតេហេរ៉ង់។
ចុះផ្សាយនៅថ្ងៃ៖
ស្តាប់ - ០២:២៩
ប្រមុខទីភ្នាក់ងារថាមពលបរមាណូអន្តរជាតិ លោក រ៉ាហ្វាអែល ក្រូស៊ី (Rafael Mariano Grossi) បានជួបប្រាស្រ័យជាមួយប្រធានាធិបតីអ៊ីរ៉ង់ អេប្រាហ៊ីម រ៉ៃស៊ី និងជួបលោករដ្ឋមន្ត្រីការបរទេសអ៊ីរ៉ង់ ព្រមទាំង មន្ត្រីជាន់ខ្ពស់អ៊ីរ៉ង់ទទួលបន្ទុកផ្នែកថាមពល ជាដើម។
កិច្ចពិភាក្សាជាមួយថ្នាក់ដឹកនាំអ៊ីរ៉ង់ទាំងនេះ គឺឋិតក្នុងបរិយាកាស«ស្មោះត្រង់និងគួរឲ្យសហការ»។ នេះបើតាមការគូសបញ្ជាក់ជាសាធារណៈរបស់ ប្រធានទីភ្នាក់ងារថាមពលបរមាណូអន្តរជាតិ ហៅកាត់តាមភាសាបារាំងថា AIEA ក្នុងសន្និសីទកាសែតរួមជាមួយសមភាគីអ៊ីរ៉ង់ មុននឹងលោក រ៉ាហ្វាអែល ក្រូស៊ី អញ្ជើញធ្វើដំណើរហោះហើរទៅកាន់ស្នាក់របស់ខ្លួនវិញ នៅទីក្រុងវីយ៉ែន។ វីយ៉ែន ជាទីដែលលោកនឹងធ្វើសន្និសីទសារព័ត៌មានមួយទៀត ហើយក៏នឹងធ្វើរបាយការណ៍បន្ថែមប្រាប់ទៅក្រុមប្រឹក្សាភិបាល AIEA នៅសប្តាហ៍ខាងមុខ។
អ្វីដែលកាន់តែសំខាន់គួរឲ្យកត់សម្គាល់ពេលនេះ គឺលោក រ៉ាហ្វាអែល ក្រូស៊ី បានផ្សាយក្តីសង្ឃឹម នៅថ្ងៃសៅរ៍ ថា តាមរយៈ«កិច្ចសន្ទនាប្រកបដោយការស្ថាប័នា» អាចនឹងបើកផ្លូវឲ្យមានកិច្ចព្រមព្រៀងសំខាន់ៗ នៅពេលខាងមុខ ជុំវិញសំណុំរឿងនុយក្លេអ៊ែរ៉ង់។
អ្វីដែលចម្លែក គឺ ប្រមុខទីភ្នាក់ងារថាមពលបរមាណូអន្តរជាតិ មិនបញ្ជាក់ថា អាជ្ញាធរអ៊ីរ៉ង់ អនុញ្ញាតឲ្យរូបលោកទៅមើលដោយផ្ទាល់ នៅមជ្ឈមណ្ឌលនុយក្លេអ៊ែរក្រោមដីមួយ ចម្ងាយ១០០គីឡូម៉ែត្រពីរដ្ឋធានីតេហេរ៉ង់ ដែលល្បីថាបានចម្រាញ់បន្សុទ្ធសារធាតុអ៊ុយរ៉ាញ៉ូម រហូតដល់ទៅ ៨៣,៧% នោះឬទេ។ ការបន្សុទ្ធសារធាតុអ៊ុយរ៉ាញ៉ូម នៅមជ្ឈមណ្ឌលនុយក្លេអ៊ែរក្រោមដីនោះហើយ ដែលជាបុព្វហេតុជំរុញដំណើរយ៉ាងបន្ទាន់របស់រូបលោកទៅអ៊ីរ៉ង់។
កិច្ចព្រមព្រៀងនុយក្លេអ៊ែរ៉ង់ បានចុះហត្ថលេខាយល់ព្រមគ្នានៅឆ្នាំ២០១៥។ កាលណោះ អ៊ីរ៉ង់សន្យាយល់ព្រមបោះចោលគម្រោងការចម្រាញ់សារធាតុអ៊ុយរ៉ាញ៉ូម ដើម្បីផលិតគ្រាប់បែកប្រល័យលោក ជាថ្នូរនឹងការដកទណ្ឌកម្មសេដ្ឋកិច្ច-ពាណិជ្ជកម្ម។ ក៏ប៉ុន្តែ នៅឆ្នាំ២០១៨ សហរដ្ឋអាមេរិក ក្រោមអាណត្តិរបស់លោក ដូណាល់ ត្រាំ គឺបានដកខ្លួនចេញពីកិច្ចព្រមព្រៀងនេះ ព្រោះអាមេរិកយល់ថាអ៊ីរ៉ង់មិនបំពេញកាតព្វកិច្ច។ ក្នុងរយៈពេលច្រើនឆ្នាំមកនេះ អ្នកជំនាញសង្កេតឃើញថា អ៊ីរ៉ង់ បានប្រឹងប្រែងចម្រាញ់បន្សុទ្ធសារធាតុអ៊ុយរ៉ាញ៉ូម កាន់តែច្រើន។ ឆ្នាំទៅមិញ គេរកឃើញថា កន្លែងស្នាមដានចម្រើនធាតុអ៊ុយរ៉ាញ៉ូម ចំនួន ៣ ទីតាំង ដែល អាជ្ញាធរអ៊ីរ៉ង់ ពុំបានប្រកាសតម្លាភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ