ស្លាប់មនុស្សយ៉ាងហោច១០នាក់ នៅក្នុងប្រតិបត្តិការបង្ក្រាបរបស់កម្លាំងអ៊ីស្រាអែល នៅតំបន់ស៊ីហ្សកដានី
កាលពីថ្ងៃទី២២កុម្ភៈ កងកម្លាំងអ៊ីស្រាអែល បានបើកប្រតិបត្តិការបង្ក្រាបដ៏ធំមួយ ដើម្បីតាមចាប់ក្រុមជនប្រដាប់អាវុធជ្រុលនិយមប៉ាឡេស្ទីន នៅឯតំបន់ស៊ីហ្សកដានីដែនដីប៉ាឡេស្ទីន។ យ៉ាងហោចណាស់ មានមនុស្សស្លាប់ចំនួន១០នាក់ នៅក្នុងប្រតិបត្តិការនេះ។ ក្នុងចំណោមអ្នកស្លាប់ មាន២នាក់ជាសមាជិកនៃចលនា ជីហាតអ៊ីស្លាមប៉ាឡេស្ទីន ដែលអ៊ីស្រាអែល ចាត់ទុកថាជាក្រុមភេរវកម្ម។
ចុះផ្សាយនៅថ្ងៃ៖
ស្តាប់ - ០២:៣៨
បើគិតពីឆ្នាំ២០០៥មក លើកនេះគឺជាប្រតិបត្តិការចុះបង្ក្រាប ដ៏កាចសាហាវបំផុត របស់កម្លាំងអ៊ីស្រាអែល នៅក្នុងទឹកដីប៉ាឡេស្ទីន តំបន់ស៊ីហ្សកដានី។ ថ្ងៃទី២២កុម្ភៈ កងកម្លាំងអ៊ីស្រាអែល បានចុះទៅដល់ក្រុងណាព្លូស ភាគខាងជើងតំបន់ស៊ីហ្សកដានី ដើម្បីឡោមព័ទ្ធចាប់សមាជិកក្រុមជីហាតអ៊ីស្លាមប៉ាឡេស្ទីន។
ការបាញ់រះគ្រាប់កាំភ្លើង បានបណ្តាលឲ្យស្លាប់មនុស្សចំនួនយ៉ាងហោច១០នាក់ ក្នុងនោះមានក្មេងជំទង់ អាយុ១៦ឆ្នាំម្នាក់ និងបុរសប៉ាឡេស្ទីនវ័យជាង៧០ឆ្នាំម្នាក់ផង។ រដ្ឋមន្ត្រីក្រសួងសុខាភិបាលប៉ាឡេស្ទីន បានបញ្ជាក់ថា ក្រៅពីនេះ មានមនុស្សរងរបួសដោយគ្រាប់កាំភ្លើង ចំនួនជាង៨០នាក់ទៀត ដែលខ្លះរងរបួសធ្ងន់ កំពុងទទួលបានការសង្គ្រោះនៅតាមមន្ទីរពេទ្យ។
ឆ្លើយតបទៅនឹងការជជីកសួររបស់អ្នកកាសែត តំណាងកងទ័ពអ៊ីស្រាអែល មិនបានបញ្ជាក់លំអិតអំពីចំនួនមនុស្សស្លាប់ ដោយប្រតិបត្តិការរបស់ខ្លួនទេ គ្មានតែបានបញ្ជាក់ថា កងទ័ពអ៊ីស្រាអែល ពិតជាបានបើកប្រតិបត្តិការបង្ក្រាបនៅក្រុងណាព្លូសពិតមែន ដើម្បីតាមចាប់ក្រុមជីហាតភេរវកម្មអ៊ីស្លាមប៉ាឡេស្ទីន។ ក្រុមជីហាតអ៊ីស្លាមប៉ាឡេស្ទីន ដែលជាក្រុមប្រដាប់អាវុធដ៏សកម្មមួយនៅតំបន់ស៊ីហ្សកដានី បានអះអាងថា មានសមាជិកក្រុមខ្លួនចំនួន២នាក់ បានស្លាប់នៅក្នុងប្រតិបត្តិការបង្ក្រាបរបស់អ៊ីស្រាអែលនេះ។
យោងតាមអ្នកកាសែតបារាំង AFP នៅទីកន្លែងផ្ទាល់ គេឃើញកងទ័ពអ៊ីស្រាអែល បានប្រើគ្រាប់បែកផ្សែង ដើម្បីបំបែកក្រុមយុវជនក្មេងៗប៉ាឡេស្ទីន ដែលនាំគ្នាយកដុំថ្មគុបទៅលើរថពាលដែករបស់ទាហានអ៊ីស្រាអែល។ ក្នុងចំណោមអ្នករបួសដោយគ្រាប់កាំភ្លើង គឺមានអ្នកកាសែតធ្វើឲ្យទូរទស្សន៍ Palestine TV ម្នាក់ផងដែរ។
គួរកត់សំគាល់ថា ប៉ុន្មានខែមកនេះ ភាពហឹង្សាបានផ្ទុះឡើងកាន់តែខ្លាំង រវាងអ៊ីស្រាអែល និងប៉ាឡេស្ទីន។ កាលពីចុងខែមករាថ្មីៗនេះ កងទ័ពអ៊ីស្រាអែល បានបើកប្រតិបត្តិការផ្លូវអាកាស តាមចាប់ក្រុមជីហាតភេវកម្ម នៅឯជំរុំជនភៀសខ្លួនប៉ាឡេស្ទីន នៅតំបន់ Jénine។ គិតពីដើមឆ្នាំ២០២៣នេះមក យ៉ាងហោចណាស់ មានប្រជាជនប៉ាគេស្ទីន ចំនួន៥៨នាក់ បានស្លាប់ ដោយសារប្រតិបត្តិការបង្ក្រាបរបស់កងកម្លាំងអ៊ីស្រាអែល ដែលក្នុងចំណោមនោះ មានទាំងសមាជិកក្រុមប្រដាប់អាវុធជីហាត និងជនស៊ីវីលប៉ាឡេស្ទីន។ ដោយឡែកខាងអ៊ីស្រាអែលវិញ មានស្លាប់ជនស៊ីវីលចំនួន៩នាក់ និងអ្នកទេសចរណ៍ជនជាតិអ៊ុយក្រែនម្នាក់ផង ដោយការវាយប្រហារភេរវកម្ម។ លោក Tor Wennesland តំណាងក្រុមការងារសម្របសម្រួលរបស់អង្គការសហប្រជាជាតិប្រចាំតំបន់ដើមបូព៌ា បានលើកឡើង កាលពីថ្ងៃចន្ទថា ការងារដែលត្រូវធ្វើបន្ទាន់នាពេលនេះ គឺត្រូវកាត់បន្ថយការផ្ទុះឡើងនូវអំពើហិង្សារវាងភាគីទាំង២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ