អ្នកជំនាញ៖របបសាធារណរដ្ឋអ៊ីស្លាមអ៊ីរ៉ង់គ្មានថ្ងៃគេចផុតពីការដួលរលំដោយចលនាបាតុកម្មមហាជន
នៅក្នុងប្រទេសអ៊ីរ៉ង់ ថ្ងៃសុក្រ ទី១៦ ធ្នូជាថ្ងៃគម្រប់ ៣ខែនៃក្បួនបាតុកម្មរបស់មហាជនដែលកំពុងបន្តមានយ៉ាងគគ្រឹកគគ្រេង។ ក្នុងរយៈពេល ៣ខែកន្លងទៅ បាតុកម្ម កូដកម្ម និងការប្រឆាំងតវ៉ាផ្សេងៗមានកម្មវត្ថុតែមួយដូចគ្នា គឺទម្លាក់រដ្ឋាភិបាលសព្វថ្ងៃ។ គួររម្លឹកថា បាតុកម្មមួយនេះបានចាប់ផ្តើមពីការស្លាប់នារីវ័យក្មេងម្នាក់ឈ្មោះម៉ាសា អាមីនីកាលពីថ្ងៃទី១៦ កញ្ញា។ មានអាយុ ២២ឆ្នាំ នារីម៉ាសា អាមីនីត្រូវបានប៉ូលិសសីលធម៌ចាប់ខ្លួនក្នុងថ្ងៃទី ១៣ កញ្ញាក្រោមបទចោទប្រកាន់ពីការស្លៀកពាក់មិនសមរម្យតាមច្បាប់សាសនាអ៊ីស្លាម។ ប្រឈមនឹងចលនាប្រឆាំងរបស់ប្រជាជន រដ្ឋាភិបាលមិនញញើតប្រើកម្លាំងទ័ព និងប៉ូលិសវាយបង្រ្កាបយ៉ាងហិង្សា។ យោងតាមអង្គការការពារសិទ្ធិមនុស្ស នៅអ៊ីរ៉ង់ឈ្មោះ Iran Human Rights មានមនុស្សជាង ៤៥០នាក់ត្រូវបានសម្លាប់នៅក្នុងក្បួនបាតុកម្ម។ តែទោះជាយ៉ាងនេះក្តី អ្នកប្រវត្តិសាស្រ្តអ៊ីរ៉ង់ និងជាអ្នកជំនាញលោកទូរ៉ា អាតាបាគីបានមើលឃើញថា របបសាធារណរដ្ឋអ៊ីស្លាមអ៊ីរ៉ង់មិនអាចគេចផុតពីការដួលរលំដោយចលនាមហាជនពេលនេះទេ។
ចុះផ្សាយនៅថ្ងៃ៖
ស្តាប់ - ០១:៣០
« ផ្លូវកំពុងពោរពេញដោយអន្ទាក់ស្អេកស្កះ។ គ្មានការងឿងឆ្ងល់ទេថា ដើម្បីឈានទៅសម្រេចគោលដៅរបស់ខ្លួន ចលនាបាតុកម្មមួយនេះត្រូវតែឆ្លងកាត់ផ្លូវឡើង និងផ្លូវចុះ។ តែខ្ញុំគ្មានមន្ទិលទេថា យើងកំពុងស្ថិតនៅចំណុចដើមនៃការបញ្ចប់របបសាធារណរដ្ឋអ៊ីស្លាមអ៊ីរ៉ង់។ ក្រោមហេតុផលប្រវត្តិសាស្រ្ត ប្រជាសាស្រ្ត សន្តិសុខ និងសង្គមវិជ្ជា របបនេះគ្មានសមត្ថភាពក្នុងការគ្រប់គ្រង និងដោះស្រាយវិបត្តិធ្ងន់ធ្ងរ ដូចជាបរិស្ថាន សេដ្ឋកិច្ច នយោបាយ និងសង្គមទេ។
ទោះបីជាមានការប្រាថ្នា និងការប្រកាសពីភាពជោគជ័យក៏ដោយក៏របបនេះគ្មានអនាគត ហើយខ្ញុំជឿជាក់ថា យើងនឹងឃើញមានអ្នកគាំទ្ររបបនេះកាន់តែច្រើនឡើងៗបាននាំគ្នាដកខ្លួនថយ និងបោះបង់ចោលរបបនេះតែម្តង។ យើងបានឮការរអ៊ូរទាំពីមនុស្សជិតស្និទ្ធនឹងរបបនេះរួចហើយ ដូចជាមន្រ្តីសាសនាអ៊ីស្លាម កងទ័ព ឬមន្រ្តីតុលាការដែលមិនសប្បាយចិត្តនឹងការកាច់ចង្កូតនាវារបស់ប្រមុខសាសនាអ៊ីស្លាមអ៊ីរ៉ង់អាលី ខាមេណី។
ក្រោមភ្នែករបស់ពួកគេ នាវាកំពុងលិចទឹក ហើយពួកគេកំពុងព្យាយាមលោតចេញពីនាវា មុននឹងនាវានេះលិចចូលក្នុងទឹក »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ