ក្មួយស្រីនៃប្រមុខសាសនាអ៊ីរ៉ង់ ត្រូវចាប់ខ្លួន និងអាចប្រឈមមុខជាប់ពន្ធនាគារ១៥ឆ្នាំ
នៅអ៊ីរ៉ង់ បាតុកម្មចេះតែបន្តអូសបន្លាយ រយៈជិត ៣ ខែហើយ។ ការចាប់ឃុំខ្លួននិងកាត់ទោសអ្នកប្រឆាំង ក៏ចេះតែបន្ត។ នៅថ្ងៃម្សិលមិញនេះ ព័ត៌មានច្បាស់ការមួយ បញ្ជាក់ថា ក្មួយស្រីនៃប្រមុខសាសនាអ៊ីរ៉ង់ ត្រូវចាប់ខ្លួន ព្រោះតែបានបញ្ចេញវីដេអូ និយាយរិះគន់រដ្ឋអំណាចអ៊ីរ៉ង់ ហើយថែមទាំងបាន អំពាវនាវឲ្យសហគមន៍អន្តរជាតិនិងរដ្ឋាភិបាលបរទេស ផ្តាច់ទំនាក់ទំនងការទូតជាមួយ អ៊ីរ៉ង់ ទៀតផង។
ចុះផ្សាយនៅថ្ងៃ៖
ស្តាប់ - ០២:៣៦
សកម្មជនការពារសិទ្ធិមនុស្ស អ្នកស្រី ហ្វារីដេហ មូរាកខានី (Farideh Moradkhani ) ត្រូវរដ្ឋអាជ្ញាក្រុងតេហេរ៉ង់ កោះហៅឡើងតុលាការ នៅថ្ងៃទី២៣វិច្ឆិកា ហើយក៏បាត់ខ្លួន ស្ងាត់ដំណឹងឈឹង។ ទើបតែថ្ងៃសៅរ៍ បងប្រុសរបស់នាង ដែលកំពុងតែភៀសខ្លួននៅស្រុកបារាំង បានប្រកាសប្រាប់សារព័ត៌មានថា ប្អូនស្រីត្រូវរដ្ឋអំណាចអ៊ីរ៉ង់ចាប់ឃុំខ្លួនហើយ។ ម្តាយរបស់នាង ទើបស្លាប់ពីពេលថ្មីៗ គឺជាប្អូនស្រីរបស់ប្រមុខដឹកនាំសាសនាអ៊ីរ៉ង់ ដ៏មានឥទ្ធិពល អាលី ខាមេនៃ (Ali Khamenei)។ ម្តាយនាងភៀសខ្លួននៅក្រៅប្រទេស ព្រោះតែមិនពេញចិត្តនឹងរបបដឹកនាំរដ្ឋអ៊ីរ៉ង់។
នាង ហ្វារីដេហ មូរាកខានី តែងតែរិះគន់ថ្កោលទោសរដ្ឋអំណាចអ៊ីរ៉ង់ ដ្បិតថានាងធ្វើការវិស័យសិទ្ធិមនុស្ស និងសកម្មខ្លាំងខាងប្រឆាំងនឹងការកាត់ទោសប្រហារជីវិត។ កាលពីដើមឆ្នាំនេះ នាងធ្លាប់ត្រូវក្រសួងស៊ើបការណ៍សម្ងាត់ ចាប់ឃាត់ខ្លួនម្តងហើយ តែក្រោយមក ត្រូវដោះលែងទៅវិញ ដោយមានលក្ខខណ្ឌ ឋិតក្រោមការត្រួតពិនិត្យ។ ការចាប់ខ្លួនជាថ្មី គឺសកម្មជននារីរូបនេះ អាចនឹងត្រូវរងទោសទណ្ឌក្រោយចម្រឹងដែក ប្រមាណ ១៥ ឆ្នាំ។ នេះបើយោងតាមអង្គការសិទ្ធិមនុស្ស ហ្រាណា Hrana មានមូលដ្ឋាននៅសហរដ្ឋអាមេរិក។
តាមទិន្នន័យរបស់អង្គការដដែល គិតត្រឹមថ្ងៃទី២៦វិច្ឆិកា កម្លាំងសមត្ថកិច្ចអ៊ីរ៉ង់បានចាប់ខ្លួន បាតុករ ប្រមាណ ១ម៉ឺន ៨ពាន់នាក់ (អង្គការសហប្រជាជាតិ ថា ១ម៉ឺន៤ពាន់នាក់)។ ក្នុងរយៈពេលជាង ២ ខែមកនេះ កងកម្លាំងរដ្ឋអំណាចអ៊ីរ៉ង់ បានសម្លាប់បាតុករ អ្នកតវ៉ា ប្រមាណជាង ៤៥០ នាក់ ក្នុងនោះ ជាង៦០នាក់ ជាក្មេងៗ។ មន្ត្រីនគរវិញ ក៏មានស្លាប់ដែរ ចំនួនប្រហែល ៦០ នាក់។
មកទល់នឹងពេលនេះ តុលាការអ៊ីរ៉ង់ បានសម្រេចកាត់ទោសប្រហារជីវិត ៦ ករណីហើយ បន្ទាប់ពីផ្ទុះចលនាបាតុកម្ម ជាប់ៗគ្នា ១១ សប្តាហ៍។ ក្នុងនោះ តារាចម្រៀងញាក់កន្ត្រាក់ រ៉ែប ១រូប ឈ្មោះ ធូមាជ សាលេហី (Toomaj Salehi) ត្រូវកាត់ទោសប្រហារជីវិត ព្រោះតែបាន«ឃោសនាប្រឆាំងនឹងរដ្ឋអំណាច» ហើយត្រូវរងការចោទប្រកាន់ថា «ធ្វើសកម្មភាពប្រឆាំងនឹងសន្តិសុខជាតិ»។ សេចក្តីសម្រេចកាត់ទោសផ្តាច់ជីវិតនេះ ត្រូវរដ្ឋអាជ្ញាអ៊ីរ៉ង់ ផ្សាយពីថ្ងៃអាទិត្យ ទី២៧វិច្ឆិកា។ មុនពេលចាប់ខ្លួន តារាចម្រៀងរ៉ែបនេះ បានបង្ហោះវីដេអូចម្រៀងរិះគន់ និងអំពាវនាវឲ្យផ្តួលរំលំរដ្ឋាភិបាលក្រុងតេហេរ៉ង់។
កាលពីថ្ងៃព្រហស្បតិ៍ ក្រុមប្រឹក្សាសិទ្ធិមនុស្ស នៃអង្គការសហប្រជាជាតិ បានសម្រេច បើកការស៊ើបអង្កេតឯករាជ្យ ចំពោះការបង្ក្រាបបង្ហូរឈាមពីសំណាក់រដ្ឋអំណាចអ៊ីរ៉ង់ ទៅលើក្រុមបាតុករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ