សហភាពអឺរ៉ុបដាក់ទណ្ឌកម្ម លើមន្ត្រីអ៊ីរ៉ង់ ដែលទទួលខុសត្រូវលើការបង្ក្រាបបាតុកម្ម
អស់រយៈពេល១ខែមកហើយ ដែលប្រជាជនអ៊ីរ៉ង់ ជាពិសេសយុវជន សិស្សនិស្សិត បានធ្វើបាតុកម្ម នៅតាមទីក្រុងធំៗ ដើម្បីតវ៉ាប្រឆាំងនឹង ការដឹកនាំកៀបសង្កត់នៃរបបអ៊ីស្លាមផ្តាច់ការអ៊ីរ៉ង់។ បាតុកម្មដែលបានផ្ទុះឡើង ក្រោយការស្លាប់របស់ស្ត្រីឈ្មោះ Mahsa Amini បន្ទាប់ពីត្រូវនគរបាលសីលធម៌អ៊ីរ៉ង់ ចាប់ឃាត់ខ្លួន ដោយចោទថាមិនបានស្លៀកពាក់និងទទូឡក្រណាត់ឲ្យជិតខ្លួន។ គិតត្រឹមពេលនេះ ការបង្រ្កាបបាតុកម្ម បានបណ្តាលឲ្យស្លាប់មនុស្សជាង២រយនាក់។ ដើម្បីជាការថ្កោលទោសចំពោះការបង្រ្កាបបំបិទសិទ្ធិសេរីភាពនេះ កាលពីថ្ងៃចន្ទម្សិលមិញ សហភាពអឺរ៉ុបបានសម្រេចវិធានការទណ្ឌកម្ម ដាក់ទៅលើមន្ត្រីរបស់អ៊ីរ៉ង់ ដែលក្នុងនោះគឺមានមេនគរបាលសីលធម៌អ៊ីរ៉ង់។
ចុះផ្សាយនៅថ្ងៃ៖
នៅក្នុងបញ្ជីទណ្ឌកម្មថ្មីដាក់ទៅលើអ៊ីរ៉ង់ ដែលរដ្ឋមន្ត្រីការបរទេសនៃសមាជិកសហភាពអឺរ៉ុបបានសម្រេច គឺមានមន្ត្រីអ៊ីរ៉ង់ ចំនួន១១នាក់។ ក្នុងនោះមាន លោក Issa Zarepour រដ្ឋមន្ត្រីក្រសួងព័ត៌មាននិងទូរគមនាគមន៍អ៊ីរ៉ង់ លោក Mohammad Rostami Cheshmeh Gachi មេនគរបាលសីលធម៌អ៊ីរ៉ង់ រួមទាំងមេដឹកនាំស្ថាប័ន៣ផ្សេងទៀតនៃអំណាចនយោបាយ-សន្តិសុខអ៊ីរ៉ង់។ ជនដែលជាប់ទណ្ឌកម្មរបស់អ៊ឺរ៉ុប នឹងត្រូវបានហាមឃាត់ មិនឲ្យទទួលបានទិដ្ឋាការចូលជាន់ដីអឺរ៉ុប។ ប្រាក់សន្សំ និងវិនិយោគ ព្រមទាំងភាគហ៊ុនផ្សេងៗ ដែលជនទាំងនោះមាននៅក្នុងស្ថាប័នអឺរ៉ុប ក៏នឹងត្រូវបង្កកទុកផងដែរ។
លោកស្រី Anna Baerbock រដ្ឋមន្ត្រីការបរទេសអាល្លឺម៉ង់ បានលើកឡើងថា តាមពិតទៅពាក្យថា “នគរបាលសីលធម៌អ៊ីរ៉ង់” នោះ វាត្រូវបានប្រើប្រាស់ដោយមិនត្រឹមត្រូវទេ ព្រោះថាធាតុពិត សមត្ថកិច្ចនគរបាលនេះ គឺជានគរបាលដែលបង្កឧក្រិដ្ឋកម្ម បង្ក្រាប សម្លាប់បាតុការ ជាច្រើនរយនាក់។ លោកស្រីបានបន្តថា អឺរ៉ុបមិនអាចឈរឱបដៃ មើលយុវជនជាពិសេសស្ត្រីអ៊ីរ៉ង់វ័យក្មេងៗ សិស្សនិស្សិត ដែលធ្វើបាតុកម្មដោយសន្តិវិធី ហើយត្រូវសមត្ថកិច្ចនគរបាលអ៊ីរ៉ង់ បង្ក្រាបវាយដំរហូតស្លាប់ ឬរបួស បាននោះឡើយ។ លោកស្រី Anne Linde រដ្ឋមន្ត្រីការបរទេសស៊ុយអែត បានបញ្ជាក់ថា ទណ្ឌកម្មដែលអឺរ៉ុបបានសម្រេចដាក់ទៅលើអ៊ីរ៉ង់នេះ គឺសំដៅវាយឲ្យចំទៅលើមន្ត្រីអ៊ីរ៉ង់ ដែលជាអ្នកទទួលខុសត្រូវ លើការបង្ក្រាបដោយហិង្សាបំផុត ទៅលើក្រុមបាតុករ និងជាពិសេសស្ត្រីអ៊ីរ៉ង់ ដែលបានតវ៉ាទាមទារសិទ្ធិសេរីភាពដោយសន្តិវិធី។
គួរបញ្ជាក់ថា ក្រៅពីសហភាពអឺរ៉ុប សហរដ្ឋអាមេរិក កាណាដា និងអង់គ្លេស បានប្រកាសជាបន្តបន្ទាប់នូវទណ្ឌកម្ម ទៅលើមន្ត្រីអាជ្ញាធារអ៊ីរ៉ង់ ដែលបានចេញបញ្ជា បង្ក្រាបយ៉ាងសាហាវទៅលើក្រុមបាតុករ។ បាតុកម្មដែលបានផុសផុលអស់មួយខែមកនេះ បន្ទាប់ពីករណីស្លាប់ស្ត្រីឈ្មោះ Mahsa Amini។ យោងតាមតួលេខរបស់អង្គការ Iran Human Rights មានបាតុករយ៉ាងហោចជាង២០០នាក់បានស្លាប់។ រដ្ឋាភិបាលអ៊ីរ៉ង់ក៏បានចោទថា ចលនាបាតុកម្មដ៏ខ្លាំងក្លានេះ គឺមកពីអាមេរិកជាអ្នកអុជអាល៕
សូមបញ្ជាក់ដែរថា កាលពីថ្ងៃអាទិត្យទី១៦តុលា មានករណីអគ្គីភ័យឆេះមន្ទីរឃុំឃាំងដ៏ធំមួយ ឈ្មោះ Evine ស្ថិតនៅរដ្ឋធានីតេហេរ៉ង់។ មន្ទីរឃុំឃាំងនេះ ត្រូវគេដឹងថា ជាកន្លែងដែលរបបផ្តាច់ការអ៊ីរ៉ង់ បង្ឃាំងអ្នកទោសនយោបាយ និងបាតុករជាច្រើននាក់។ យ៉ាងហោចណាស់ មានមនុស្សស្លាប់៨នាក់ និងរបួសជាច្រើននាក់ ក្នុងករណីអគ្គីភ័យនេះ។ អាជ្ញាធរអ៊ីរ៉ង់បានចោទថា គឺ “ក្រុមយុវជនអន្ធពាល” ដែលបានបង្កអគ្គីភ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ